Kapitiang, Udang jo Cumi Bakuah
Kanti lai tau jo kapitiang kan? Baa kok namoe kapitiang? Karano nyo kapik ang. Makoe namonyo kapitiang, cubo kalau kapik den pasti namonyo jadi kapiden. Demikian bana lah.
Kini ambo bacarito saketek tentang kapitiang jo kawan — kawannyo takah udang dan cumi. Baa kok sampai carito tentang mereka? Karano ado nan manuruik ambo menarik. Kalau urang awak nyabuik kapitiang, udang, lobster (udang gadang) dan cumi bajaleh — jaleh. Kalau urang baraik nyo sabuik ciek kato je “seafood” 😁
Tadi malam ambo jo mailap, anak bujang dan mintuo pai makan kapitiang, cumi, dan udang ko ka kadai kawan di Ulak Karang. Kawan ko sanae paten mah, karajo disalah satu Bank ternama di Sumbar. Ambo ndak sabuik namo Bank Nagari lah. Kawan ambo ko dulu kawan SMA mailap. Namoe Budi, kalau panggilan sayang e Abud dan kalau ambo urang Kalumbuk maimbaue Budei.
Setelah manjapuik mintuo, kami cap cus ka kadai e nan balokasi di tapi banda dakek kampus I Bung Hatta. Mailap ko dek pede eh, lah salah lo manunjuakan jalan. Sanae nan tengak ambo lo, manga ndak mancaliak2 tando dek sok sibuk maiduikan IG Live di HP nan bagantuangan di lamari oto.
Setelah sampai dilokasi kami mamasan Paket Goro Kecamatan. Iko paket untuak barampek urang. Ado Goro Kelurahan, Goro Sanagari jo Goro Sa propinsi gai mungkin. O iyo namo kadai e Tapsung. Ambo pasan lo mie abuih ciek dek mintuo padusi mamasan mie abuih pulo. Ndak sampai limo baleh minik tibo pelayan e mangambangan karateh sagadang karateh gambar mahasiswa Arsitek. Sudah tun nyo serakan lah diateh karateh ko Kapitiang, Udang, Cumi dan Jaguang nan lah dimasak jo bumbu khusus racikan si Abud go.
Ndeh, mancaliak jo mambaunan e kadam rasoe. Tambah lo mie abuih e naiak jakun — jakun mambayangkan. Tibo lo nasi ampek sanduak untuak ambo, mailap, anak bujang jo mintuo kilaki. Sabana sero ko ha, manyungkah kapitiang nan mandadadah, udang nan takah basiua siua maimbau dan cumi nan bulek bulek menggoda salero. Sungguah tadi malam tu sabana coga makan malam kami.
Bagi kanti nan taragak makan seafood kecek rang baraik tu, sagirolah ka Tapsung. Sabuik se namo ambo dapek diakon mah. Minimal kuahnyo banyakan bikoh. 😁
Ambo tutuik jo pantun buliah bisa lo ambo jadi Gubernur suak,
Ka Bukik tinggi pai naiak bendi
Sambia mancaliak pamandangan
Makan kapitiang, udang jo cumi
Sabana sero jo manganyanganMain bola tangah malam
Nan manonton anak mudo
Dima makan seafood nan kadam
Yo di Tapsung sarancaknyo
Pay Ganteng
Instagram: @rezki_rifai
