Mangalola Kepeang
Ko ado saketek carito nan agak balain dari nan sudah-sudah Nti, kali iko kito cubo babagi informasi jo tips takaik baa caro mangalola isi puro kito. Jan maabihan se nan pandai. Hehe
Tantunyo pasti alah banyak informasi nan Kanti dapek di lua sinan tantang iko, kami cubo marangkum mudah-mudahan bisa mudah dimangarati jo lasuah dicubo kan sakali.
Tulisan iko baguno baiak bagi Kanti nan alah punyo panghasilan surang, ataupun Kanti nan masih manadah tangan ka rang gaek, bahaso lainnyo pitih lanjo.
Bamacam caronyo Nti, ado nan manarimo panghasilan bulanan, mingguan, bahkan harian. Nah sadonyo tu tagantuang kabijakan masiang-masiang tampek wak karajo.
Kalau mahasiswa lain pulo caritonyo mungkin, ado nan dari rang gaek, ado pulo nan lah pandai cari pitih surang. Kok Kanti lah pandai cari pitih surang jan tinggakan kuliah ndak, kadang kalua lah macik pitih tu lah lupo se manyalasaian kuliah. Hehe.
Tips maalokasikan pitih ko Nti ado 3 Nti. Jadi satalah Kanti dapek panghasilan alokasikan ka 3 macam ko yo.
- Biaya iduik sahari-hari
Pastinyo kito paralu biaya untuak kabutuhan sahari-hari. Antaro lain kabutuhan pokok sarupo zakat, biaya makan, listrik, pulsa, jo lain lain. Kecek parencana keuangan professional, alokasi untuak biaya iduik ko 60% dari panghasilan kito Nti.
2. Tabuangan/Investasi
Nah alokasi iko paralu untuak kito dimaso nan ka datang Nti, contohnyo ado nan namonyo pitih nganggur nan bisa dipakai sawaktu-waktu, tabuangan untuak maso tuo, jo kalo paralu asuransi kasehatan jo jiwa Nti. Sadonyo untuak nan alun tajadi supayo kito lah siap jikok ado tajadi nan indak diarok an. Biasonyo alokasi tabuangan/Investasi ko 30% dari panghasilan kito Nti
3. Biaya main-main
Biaya iko tujuannyo untuak maagiah apresiasi ka diri sorang Nti, bisa dipakai untuak manonton bioskop, pai jalan-jalan, ataupun maagiah hadiah ka Kanti nan ulang tahun. Biasonyo alokasi tabuangan/Investasi ko 10% dari panghasilan kito Nti.
Nah itu nyo Nti, tips untuak mangalola kepeang kito supayo indak abih ilang tandeh se katiko kito dapek panghasilan. Mudah-mudahan bisa saketek mabantu Kanti nan ndak tau atau payah baurusan jo pitih-pitih ko. Hehe.
Ditulih dek Uda Yamin, kanti bisa silau liau di medsos di akun @DonYamin dih.
