Dapek Sanak di Rantau

Kecek urang hujan batu di kampuang awak labiah rancak daripado hujan ameh di kampuang urang dak nti? Tapi Baa kolah rasonyo kok indak Pai marantau tu, ado se rasonyo yang kurang. Mode sayua indak bagaram, rokok indak ba api, Indonesia indak Ado korupsi. Hehe bagarah nyo nti.

Jadi carito awal mulonyo ko waktu awak Pai mancari tampek kuliah nti. Gaek awak manyuruah kuliah di Padang se, Tapi baa kolah hati ko kareh jo ka pai kalua. Gaek awak ko nyo indak tega do mancaliak awak pai jauah do. Singkek carito dapek lah awak tampek kuliah di Bengkulu, awak sanang awalnyo pai marantau ko nti. Indak Saba se rasonyo a pai ka Bengkulu tu ehh.

Waktu awak patamo kali Pai ka Bengkulu indak tau awak ka lalok dima do nti. Yang jaleh dek awak waktu tu marantau kalua dari kampuang. Lah lamo awak puta-puta akhirnyo sampai lah awak di kampus impian ko, awak caliak-caliak gadang juo kampus ko ehh. Maklum lah awak baru partamo kalua dari kampuang mah.

Wak ka kampus ko pai maurus registrasi nti, tau nyo indak salasai sahari urusan ko do, paniang lah awak mancari tampek lalok. Sampai laruik malam sobok dek awak pombensin, tu manumpang lalok awak di teras Mushola pombensin tu nti. Yo bedo nti, banyak bana rangik malam tu ehh.

Bisuaknyo awak lanjuik maurus registrasi kuliah nti, tapi kan indak lo lamak indak mandi do. Aia wc Pombensin ko indak lo baraia do. Awak bae se mandi di WC rektoratnyo nti, daripado baun lo badan awak ehh.

Waktu sudah salasai urusan di kampus ko pulang lah awak ka kampuang liak nti, manunggu 2 bulan lai sabalum kuliah dimulai. Tu di pul oto sobok lah urang awak yang ka pulang lo. Tu bacarito lah kami, sampai awak caritoan lo wak lalok di Pombensin. Tu inyo kecekan lah kalau di Bengkulu ko ado ikatan keluarga mahasiswa minang (IKAMAMI), awak minta lah tolong untuak mamasuak-an awak ka grup WhatsApp IKAMAMI ko nti.

Singkek carito awak lah baliak lo liak ka Bengkulu. Tapi awak cubo hubungi sanak-sanak yang ado di Bengkulu ko nti. Waktu awak baru sampai langsuang nyo japuiknyo dek sanak-sanak IKAMAMI. Tu nyo ajak ka Uda-uda yang alah dulu ado di situ nti. Nyo carian lo awak dek Uda tu tampek kos nan aman, Karno awak indak tau apo-apo tu wak manuruik se nti. Tau nyo lamak lo bagaua jo kawan-kawan dari IKAMAMI ko nti. Nyo lah anggap awak mode sanak yang lah lamo kenal.

Taunyo IKAMAMI ko organisasi nti, diajaklah awak bagabuang. Tu kini awak lah semester akhir nti, awak kini masih aktif di IKAMAMI untuak manampuang jo mewadahi adiak-adiak dari kampuang yang pai ka Bengkulu.

Segitu se carito dari awak nti.

Nan jaleh Dima se awak Pai nti, cari lah dunsanak sa darah Minang nti.

Dikirim dek Kanti Gajeboh, Uda Rafi Afdhal Zikri, Mahasiswa Teknik Elektro Universitas Bengkulu.