Parsiapan Hari Tuo
/(Canduang suatu hari.)/Foto EJK-@erisonjkambari
Kabanyakan dari kito urang Indonesia khususnyo urang minang mungkin indak bitu mamikia an hari tuo kito, dalam hal pamasuak an katiko pensiun. Ado nan maandalan gaji pensiun, ado pulo nan manempe ka anak cucu untuak iduik.
Nah, katiko mandangan kato pensiun, pasti nan tapikia dan mandapek an pitih pensiun ko urang nan bakarajo se, katokanlah PNS, TNI jo Polri. Mindset ko masih sambuah di tangah-tangah masyarakaik, sahinggo banyak rang gaek kito nan manyuruah anak e tuak jadi PNS, TNI, jo Polri, supayo dapek pitih pensiun cako.
Cubo kito geser mindset stek dih. Jaman kini sado urang jo sado profesi bisa mandapek an pitih pensiun. Baiak kito sabagai pangusaha, karyawan swasta, ataupun patani di kampuang. Kok bisa? Karano memang kiniko alah banyak caro untuak manyiapkan pitih pensiun walaupun kito bukan PNS, TNI jo Polri tadi.
Kini lah ado produk nan namonyo Dana Pensiun Lembaga Keuangan (DPLK). Produk DPLK ko banyak baserak dima-dimanyo. Rato-rato Bank Negara pasti ado produk iko. Konsepnyo sederhana, kito cukuik mambukak produk DPLK di salah ciek Bank, biasonyo nominal disasuaikan jo syarat Bank surang-surang, piliah jangko waktu DPLK ko, sasuaikan jo bilo rencana target ka pensiun, apo 5 tahun lai, 10 tahun lai, bahkan 20 tahun kamuko.
Katiko lah dibukak, kito punyo duo piliahan, nio manambah dana DPLK ko tiok bulan lewat sistem Autodebet, atau nio transfer manual ka rekening DPLK cako. Konsep iko subananyo maajakan kito untuak manabuang jo manyiap kan hari tuo katiko kito ndak produktif punyo panghasilan.
Jikok lah sampai jangko waktu DPLK cako, kito lah bisa maambiak dananyo lewat duo caro, nan partamu nio dibayiakan tiok bulan sarupo gaji bulanan, nan kaduo nio diambiak sakaligus bisa juo. Tasarah kito nan punyo kepeang.
Nah itu nyo, salah ciek caro manyiapkan hari tuo kito dalam hal pamasukan katiko lah pensiun. Mudah-mudahan kito bisa disiplin jo indak mambarek an anak cucu di kamudian hari. Amiin
