Rirayo Di Depan Mato
Sia nan taragak jo tulisan uda ganteng kito Rezki Rifai a.k.a Da Pay? Iko nyo tibo, liau lah taragak pulo manyapo Kanti Gajeboh kasadonyo. Baa? hahaha
Alah nampak hilal samakin mah yo. Ndak taraso rirayo ampia tibo. Mudah se manandoannyo. Baa caroe kok iyo? Sanak caliak di Surau, Musola dan Musajik shaf sumbayang samakin kamuko. Awal puaso panuah basasak — sasak sampai baun jariang dari nan ndak pakai masker taraso dek jamaah saking padeknyo. Kini? Shaf ko baansua — ansua pindah ka muko. Tingga se garin musajik jo nan tuo — tuo.
Kama pindahnyo jamaah ko? Banyak. Nan partamo mambuek kue rayo. Nan kaduo pai balanjo ka Matahari, Robinson, Suzuya, Transmart atau kadai nan manjua sagalo ado. Untuak amai2 jo anak gadih kini makin santiang dan maju dimuko. Lah banyak outlet Ria Miranda di Sumbar ko. Alun lai Dian Pelangi di Jl Ratulangi dakek rumah dinas Sekdako. Dan nan sadang hits Buttonscraves lah ado pulo. Baa kok ambo tau iko. Bini ambo tagilo — gilo jo RM dan BS ko sanak ambo. Sampai — sampai ulang tahun ambo cari kontak Uni Ria ko untuk sekedar maucapkan salamaik ulang tahun untuk bini ambo. Ceklah di IG ambo @rezki_rifai (promosi stek yo 😅).
Ndak pangaruah gei Korona ko jo urang Minang do. Antah sok ebat atau sok kareh kapalo. Ambo se nan lai manjago prokes akhirnyo lalok juo di RS BMC 10 hari dek kanai virus ko. Alhamdulillah berkat karajo kareh dokter dan perawat, ambo bisa sihaik baliak walaupun ndak 100% takah samulo.
Pasa Raya Padang ndak basiagak raminyo. Bajalan se sampik polai baoto. Kadiberangan baa lah. Kareh lo caruiknyo pado kito. Tapaso basaba sambia badoa mudah — mudaham caruiknyo ndak marusak puasonyo. Eh memangnyo puaso? Patiak rokoknyo ateh pulo pado urang mangganjo dan narkobo (ah iko asa O sajo dibalakang mah yo 😄).
Bukittinggi lah samo pulo. Pasa Takajuik disupanjang lapang kantin sampai Tarok Dipo. Baok oto lah samo lo jo kuro — kuro, maetek — etek jalannyo dek umaik ko sungguah raminyo.
Sanak ambo kasadonyo. Rirayo nan kini ko adalah rayo nan kaduo dalam kungkuangan Corona nan kareh kapalo. Jago bana lah badan sanak. Virus ko ado dan mancido. Jan sakali — sakali maremehannyo. Iko nan kecek urang ketek — ketek lado kutu, di gigih padeh dan badarai aia mato. Takah pinjaik ketek tapi kanai tusuak aduah padiah rasonyo.
Sampai disiko dulu yo sanak. Mokasih Gajeboh.com untuak sagalonyo. Mohon maaf ambo lah lamo ndak manulih disiko dek karano media nan mainstream banyak minta tulisan ambo. Halah
Salamaik hari rayo, mohon maaf kasadonyo dan salamaik makan katupek dan kue rayo.
Salam dari Ambo,
Rezki Rifai “boco”
