Surau, Lapau, dan Marantau
Di maso dahin, tiok anak bujang di ranah Minang yang alah akil baligh pasti alah diagiah tau samo mandehnyo tantang 3 AU yang harus dimiliki oleh tiok anak bujang yaitu Surau, Lapau, dan Marantau. “Jan lupo yo yuang, acok ka surau, harus punyo lapau dan kalau ang nio berhasil, haruslah marantau”, caitu kiro-kiro yang disampaikan mandeh ka tiok anak bujang yang alah akil baligh.
Iko nyo penjelasan ambo tantang 3 AU tu, Nti..
Nan partamo, surau. Dari segi bahaso, Surau bararti tampek sambayang/sholat di dakek rumah yang barukuran ketek. Au yang partamo iko sabana dalam artinyo nti… Nio kayo atau miskin, sholat jo mangaji indak buliah lapeh.. Anak bujang yang marantau harus selalu ingek untuak manunaikan sholat 5 wakatu, kalau bisa di surau atau musajik.
Nan kaduo Lapau. Arti dari Lapau adalah usaha bajaga atau manggaleh. Anak bujang yang marantau haruslah punyo mato pancaharian yang jaleh dan halal, indak buliah mintak2, atau jadi penggangguran. Bukti nyato dari Au yang kaduo iko, awak indak akan pernah basobok jo urang Minang yang jadi pengemis atau suko minta-minta. Kemandirian, itu istilah jaman now ma Nti…
Nan tarakhir Marantau. Dari segi bahaso, rantau sebagai aka kata dari marantau barati wilayah tampek kerajaan pagaruyuang barado atau bisa disabuik daerah Sumatera Barat kini (sumber: https://id.wikipedia.org/wiki/Merantau). Marantau dengan demikian aratinyo pai kalua dari daerah asal di ranah minangkabau untuak mancari panghidupan nan labiah rancak di daerah baru. Sasuai dengan parubahan zaman, kini marantau indak harus identik jo bapindah fisik, Nti. Istilah kekiniannyo marantau adalah kalua dari comfort zone (hehehehe canggih bahaso nyo yo Nti..), mangubah pola pikia sahinggo kasulitan barubah jadi peluang.
Manuruik ambo, 3 AU iko, kini indak lai manjadi monopoli anak bujang sajo, tapi anak gadih minang zaman now harus rajin ka surau (rajin sholat tepat waktu, taaik baugamo), bisa punyo lapau surang (karajo atau manggaleh), dan harus marantau (punyo pola pikia kreatif, indak nio anok se atau terlena di kondisi saat iko). Kalau sado anak mudo minang baiak laki-laki atau padusi alah menerapkan 3 AU iko, maka insha Allah keluarga Minang di ma se akan maju ekonominyo, dijauahkan oleh Allah dari sagalo panyakik dan diberkahi kehidupannyo oleh Allah. Amiiin ya Robbal alamin.
Panulih: Bagindo Kemas, perantau Minang.
Facebook: facebook.com/bagindokemas
Instagram: @bagindokemas
