TdS= Tagilo gilo dek Sapeda (Kertangin)
Ndeh, lah bara minggu lo ambo perai manulih ko? Maklumlah, sebagai seleb papan bungo di RT tampek tingga di Kalumbuk, jadi banyak hal dan kepentingan nan sabanae ndak penting -penting bana dikarajoan. Kini wak bahas “pinyakik” nan mambuek sehat. A tu kok iyo. Basapeda a.k.a Bakertangin.
Tuo mudo gadang ketek kayo bansaik samo se kini. Sajak pandemi korona ko tajadi ado duo olahraga nan manjadi — jadi kini ko. Nan partamo balari, ambo sebagai humas Karambia Runners semacam komunitas lari nan sadang diateh angin bana kini ko. Baa ka tidak, ambo humas e mah. Tiok santa masuak koran, bilo takana masuak media online. Tapi untuk balari kito tulih nan katibo je lah. Kini dibahas olahraga nan ciek lai.
Nan kaduo adolah bakertangin. Bakertangin ko lah cando makan kacang tojin. Rami sangaik dan ndak namuah baranti. Memang dek korona ko bakertangin lah nan paliang aman, karano bisa jago jarak, jago hati dan jago perasaan sekalian jago kandang. Pai lah sanak ka taplau pas Sabtu jo Akaik kok ndak tacaguik sanak dibueknyo. Kertangin ko dari nan paliang maha sampai nan perai.ado. Sabuik lah merek e ado sinan mah. Sampaai merek federal nan sangaik terkenal ditahun ambo masih basalemo baseleperan, sangkek karaia alun luruih dan katiko baampok ambo anggap halal 😷.
Kertangin ko bamacam lo ragam e, ado nan untuak jalan raya, kertangin gunuang, kertangin trail, kertangin lipek, kertangin dapek sampai kertangin cilok (nan terakhir ko jan serius bana 😁). Harago e jan ditanyo lih. Dari mulai perai sampai saharago rumah subsidi dan rumah sederhana ado. Tingga nio nan ma tagantuang kamauan dan kamampuan. Jan gara — gara bali kertangin tapaso makan nasi jo garam tiok hari bikoh.
Ambo sendiri ado tigo buah kertangin ko. Kertangin gunuang, kertangin lipek jo kertangin bmx. Untuak ambo, mailap dan si bujang kezio. Sebagai humas Kucindan Kertangin Club, awal — awal ambo tamasuak rajin mandacak sapeda ko. Hampia tiok Sabtu jo hari Akaik. Mulai dari sapuluah kilo sampai tigo puluah kilo lah dicubo. Mulaai dari paluah angek sampai paluah dingin alah lo. Sempat lo bakertangin jo Pejabat Samantaro Walikota Padang abangnda ganteng Hendri Septa bagai.
Beberapa wakatu nan lalu ambo sempat mancuru beberapa hari. Nah, pas lah agak bakao ambo pasoan bakertangin ka Siti Nurbaya. Ndeh saparo jalan lah mulai bakunang — kunang. Antaro asam lambuang naiak atau paruik manggadudu pokoknyo sabana ndak lamak. Tapaso lah ambo jo kertangin di evakuasi dek mailap pakai garobak japang ambo 🤭.
Sajak hari tu sampai kini alun tadacak kertangin ko lai, perai santa lu. Kok ndak antahlah. Polai urang sadang kampanye. Barami — rami sarancaknyo dihindari. Padahal apo nan tidak, kertangin ko lah banyak lo kalua pitih mah. Ganti stang, pasang lampu, bali baju e, saruang tangan, cang mato, kauih kaki, sarawa jel bagai supayo katepong ko ndak padeh takah digisa lado lih. Takah tu lah kalau lah tagilo — gilo dek kertangin go.
Alah dulu yo sanak. Iko mailap lah mancaliak buruak ha, hape ka hape juo nan dipacik, hari lah malam, dingin lo lai tu #eh 🤭.
Pay Ganteng
Instagram: @rezki_rifai
