「隨筆」回到中學的暑假+阿叔今年四十歲、三叔公園
讀書個幾年接觸到My little Airport就已經好鍾意佢哋嘅歌。好似讀白咁講個故事出嚟，又咁啱得咁橋。林阿p嘅歌詞我都覺得可以完全代入。可能每個人聽都有佢哋自己獨特嘅見解。我唔知我嘅解讀係咪阿p想帶比聽眾嘅真正意思。不過每首佢嘅詞，好似都教緊我一種做人態度。
我聽得最多就係妹妹仔時期代入得最緊要嘅「回到中學的暑假。」
「原諒一下自己吧。你對自己一向這麼差，帶來了這麼多惡果，要你慢慢消化。」
知唔知「惡果」係咩？
我一向都唔鍾意同人太親近，習慣地好多事都靠自己。會突登同其他人保持距離，其他人有佢哋嘅生活，我有我嘅忙碌。
同埋如果有人對我好，反而會令我唔自在，覺得唔好啦，我唔值得你對我好。我無咩嘢可以比到你。
所以我都唔敢去同其他人示愛。
首先因為我唔會主動同人接觸。所以有一啲靚仔又會主動肯聽我講嘢嘅異性都好容易令我記起佢（我暗戀嘅都係生活中面對面見到嘅靚仔，有闊膊頭、身高比我高嘅人），但係通常相處我都係就咁聽就咁講嘢，唔會主動比signal人。好似就咁樣維持原狀最好，我其實唔清楚咩嘢程度應該要表態。之後人地講多兩講就慢慢疏遠咗。好多時我咩都未做，人哋就走咗，之後就會諗住人哋。一種曾經有機會到手又遙不可及嘅感覺隨即而來。
「或者你不夠喜歡他，如果你夠喜歡他，不會暗地喜歡這牽掛。」
我諗我鍾意嘅係對對方有牽掛嘅自己，我係鍾意會對人動情，而心情囉囉攣嘅自己。反正當時我唔相信會有人無親無故會對自己好，我只係一個普通人何得可能。所以唔會嘗試去突破關係。避免自己受傷。
「現在不是更好嗎？他永遠變了一幅畫，你只需要間中掛起他。」
或者只係保存係我腦中，對佢印象完美又遙不可及嘅一面，唔太熟悉而產生距離感嘅幻想，先係我認為最舒服嘅距離。
「惡果」就係，我一直與人保持距離，而要承擔嘅孤獨。
因為唔相信自己值得被愛而對自己好差，覺得自己只會因為距離太近而帶到麻煩令對方討厭。唔敢去爭取自己嘅感情，帶來嘅「惡果」就係寂寞。其實歌詞都好直白，想要又唔主動，個後果要自己承擔同消化。
到另一首最近會聽嘅「阿叔今年四十歲」
第一次聽就覺得歌詞好得意，
「想分享一句人生嘅金句，就係生得靚仔其實真係無罪。」
最深刻嘅係
「聽眾係咁打嚟爆啲秘密出去，係咪世上所有嘅朋友都已經失去？」
個時唔識灘叔，無聽過1872遊花園。
但係依一句就好似話比人聽，係社會上營營役役咁多人。好似都無一個人可以傾訴心事。
「不如今夜讓我做住你伴侶，陪你去尋找上太空嘅樂趣。」
其實就係指灘叔係電台接聽眾電話故事，佢比嘅回饋（即係有時鬧人、寸人嘅意見）就好似陪住聽眾一齊咁。其實依句係幾sweet!
最近佢哋又reunion，新名叫「三叔公園」、有灘叔、迪偉同阿bu。係YouTube 一個星期有三晚開live，佢哋會比建議啲聽眾之外仲會主持互寸，通常就灘寸bu，迪偉有時又加句，但係bu又會笑笑口，佢哋唔同嘅position，配合得好搞笑。而且比啲建議好有用，分析得好通透。每一集都係夜晚10點開，個半鐘。如果我睇就直接快轉去開題目同接聽眾電話。好好笑！我已經推薦比身邊嘅朋友，發現同我同年齡層嘅都未聽過！放一分鐘比大家聽下。
「精神出體」（純口誤搞笑）
「進步論」灘叔戀愛價值觀
純9噏（超好笑）
歡迎拍手！likecoin！
