最近睇咗一首林家謙倫敦演唱會fans拍嘅live，YouTube演算法就不停推薦佢嘅演唱會拍攝片段俾我（以下文章會大量提及林家謙，因為稱「家謙」個人認為會有點肉麻，所以我稱呼為「林」）。（在substack觀看全文）
其中有一首歌《重陽》聽過一次之後一直縈繞在我心頭。每聽一次林嘅演唱，我就好似油麻地榕樹頭下嘅觀眾咁，聽佢講故事（sorry其實我冇經歷過，但係諗唔到第二個講法）。不過同一般講故佬誇張、喜形於色嘅表達唔同。佢係一種冷靜、平靜，用低沉嘅聲線訴說着故事，佢嘅演繹方法令整個故事都染上一點悲傷、無奈嘅色彩。明明只係歌詞，對聽眾來講未必係一個有親身切膚經歷嘅故事。但經佢低沉、獨白mode演唱之後，觀眾都可以明白故事中主角的感情和經歷，慢慢對故事中人物建立一種同理心。
最誇張係林係演唱其他人嘅歌（佢同時係歌曲嘅作曲人），但係經佢演繹之後，個感覺同原唱者完全不同！本來不太留意香港樂壇、廣東歌嘅我，可能偶爾會經過商場商店播放有聽過林作曲嘅歌而有淺淺嘅印象。但真正聽佢演唱帶來嘅係一種更深入、更真誠、更能觸動人心而令我有共嗚。從一種新途徑去解讀歌詞意思。對我來說就好似為首歌帶來新嘅靈魂。亦都令我重新留意除咗my little airport之外嘅廣東歌。
另外，我覺得佢應該係幾識做生意@@。因為佢翻唱嘅歌都係佢作曲。其他人聽完之後可能會去關注一下原唱版本係點。自己翻唱俾到觀眾新鮮感之餘，又可以帶挈到流量俾自己已經推出過嘅作品。我唔知道個分紅係一次過俾哂，定首歌愈多人聽分紅出就愈多。但長遠來講，翻唱增加到嘅流量都可以令林同埋唱佢作品嘅歌手（a.k.a林嘅客人)都帶來人氣。喺現今流量就係金錢嘅時代，原材料供應商又係你（即係作曲），商店販售又係你（即係作為演唱歌手）。肥水不流別人田，咁佢應該玩哂@@。當然前提係佢有實力，有觀眾先會成事。
上面提及我本身少接觸廣東歌，所以都係透過林翻唱先知道《重陽》依首歌。林嘅演繹對我來講係首歌嘅first impression，之後再聽原唱歌手演繹，就發現完全不同感覺。林嘅演繹係自帶一重淡淡悲傷嘅獨白能力。而原唱就一種凄美憂傷、無力嘅感覺。都好感動。兩個歌手都有自己嘅演繹方法延伸為兩種唔同嘅講故事風格。都非常觸動。
但我更偏好家謙版本。因為小巧版本有一種無力感。感覺好似仲未接受到伴侶已死嘅事實，而家謙版就一種冷靜得來沉穩嘅獨白，細仔聽都聽到掛念已逝伴侶嘅情感，但感覺唔會有疲倦、無力感，感覺已經接受現實，只係偶爾重陽節整一日記返起當時嘅感情。引申於我自己對於逝去的人和感情，我都認為應該要「冷靜」，接受事實，活在當下地過日子。
