對上一次我差一點入場去看live的時候是2019年11月的一次。當時有一個一起讀書「焗住」熟嘅朋友話想一齊去睇，本身我都幫佢買咗飛，但係之後我追開幾年嘅韓團Nu’est，同一時間係韓國有演唱會。如果我去韓國睇就好似俾自己安排一個小旅行咁，同比較上志同道合嘅朋友一齊去追星。
同朋友直接講，韓國個演唱會好遲先公佈時間，撞咗期，而我想去韓國睇。本來自己都好唔好意思，因為一早應承咗人，但係香港live睇完就返屋企，回家嘅路上大家各自都要趕回家，根本傾唔到咁多。所以我就的起心肝推咗佢。唔好意思之餘自己理虧在先，我都有自己搵人要飛，但最好梗係朋友可以同佢識嘅朋友一齊去。結果佢都搵到人一齊睇，但又遲遲唔諗住俾返錢，仲要問返轉頭我係咪好趕。最後朋友都有退返錢俾我，但係我就再無同佢聯絡。
因為真係識咗一段時間，一齊去過幾次旅行，所以都係識但係又焗住熟。但到頭來發現原來佢根本唔明白我諗咩。好多時都係我配合佢嘅諗法。所以2020年啱啱有事都有同佢講，但係後來我都唔想再執着，不如就咁平水相逢略過就算。
見到今年出咗新歌無幾耐之後，因為我無用ig，只係喺YouTube 見到my little airport 10月13號出咗演唱會片段。我先知道佢哋又開咗演唱會。
因為19年錯過咗可能係我人生最後一個可以「企」嘅live，就算我之後都未必會坐輪椅入場睇live，我都想了解下我缺席咗兩、三年嘅my little airport點樣。（因為企係到睇比坐喺度睇正好多，如果我唔可以企係度睇，咁我寧願係屋企睇片段）。
所以十月之後，有事無事我都會聽佢哋嘅歌，仲要深入解讀歌詞意思 – 或者係，其實唔使套費勁執解讀，一聽就已經知道林阿p想表達啲咩。
唔知係咪我鍾意去主動發現自己鍾意嘅對象，多過人地去主動鍾意我。對於自己一相情願，用盡心機去表達善意同真誠，我都會好有耐性。因為好似將自己嘅一部分投入去對方身上。而期待對方都可以同理或者理解我嘅感受，繼而會分享佢哋發生嘅事。如果係我關心、欣賞同在乎嘅對象，我都會有興趣知道佢哋遇到嘅事，或者對唔同事情嘅想法。（得到人哋嘅信任，有一種成功感（？）
但事實上，我唔可以控制對方嘅感受同思維，即使刻意討好，人地可能未必會珍惜同重視。對我來講係用最好嘅方式去表達，但係人哋有無在意同回應都係不可控制。
所以今年嘅得着就係：
對於會用心回饋嘅屋企人同朋友，我都視如珍寶。
畢竟對方唔一定要選擇對我好，對於選擇用自己耐性同真誠同我相處嘅人，我都非常感激！
又離咗題太遠。其實係想推薦幾首my little airport單戀慘情歌。人嘅感情錯開，唔能夠兩情相悅都好，即使對方唔能夠回應我嘅心意。 都希望我珍惜重視嘅對方可以好好咁生活。（就好似我有個唔太親嘅親生細佬，我WhatsApp 問佢嘢，佢唔會應。只會係關於今日洗唔洗食外賣嘅急切問題先會覆。唔係我出去買，我只係傳個話，就算佢最後無覆我，幫到佢同老豆老媽聯絡到，幫佢買到飯，我都已經好開心☺️）
My little airport – 每次你走的時分
每次到了你要走的時分 我的心都會痛一陣
終信有人會對你更貼心 但又怕你不再接近
- 作者明白自己只是其中之一，而不是唯一，因此不敢再推進大家關係。
世上總有人純粹而聰敏 能夠明瞭這情感
盼望你能被照顧得開心 遙距與我共渡餘生
- 依到純粹而聰敏，係指作者明白對方唔再想接受自己嘅心意，因此自己醒水。明白對方想俾下台階，而得知自己沒有資格成為照顧者。但同時希望對方選擇嘅人可以令佢幸福。而只要對方能幸福，作者都會遙遠地感到幸福。
愛就似條河水半支分 不由得流向他人
這種抽離或這種癡心 一秒即永恆（不留傷痕）
- 就典型我愛佢，但佢嘅心情就如河水流向他人，自己係傷心，但都無奈接受。
My little airport – 循環的夜
這樣的問題 只可以是個謎
若你要問到底 把黑夜都摧毀
喜不喜歡我 可否拖著我
真的需要直接回答麼
- 女仔鍾意男仔，期待男仔問可唔可以拖，但自己又怕一問一答就會將一切不確定的曖昧可能都摧毁，所以寧願安靜，維持現狀就好。
答案在風裡 線索在夜裡
眼睛不早已傳遞訊息一堆
最後的事情 留待路線說明
每步都在決定 下一站的風景
- 一切都係描述景色，女仔都期待男仔可以主動，一切好像在男仔掌握之內。
散步的風格 古典的想法
已置身到無辦法掌握
海風吹的你 不真實的你
有點想接近 也許只是好奇
- 女仔有點心急，古典的想法就是指不敢主動和主導兩人關係。也明白現時情況自己無發掌握。因此只是安慰自己的不作為是因為自己只是對男方有點好奇。
啦啦啦啦啦
有把聲音說 早晚亦會遠離
啦啦啦啦啦
你只不過是對他有點好奇
再介紹一首根本係我心聲嘅歌
My little airport – 我不適合聚會
我不適合聚會 不知道聚會的規矩
不知道帶什麼酒精 蜜瓜 香料 毒品 火腿
我不適合聚會 不知道準時的樂趣
不知道說什麼笑話 是非 天氣 社會 過去
我不知怎聚會 吸煙的習慣已失去
再不知怎隨意轉身到露台去
- 好多時吸煙的習慣都是為了融入其他人的社交圈子，從而令自己不太「奇怪」。但作者已經對於這種偽裝厭倦，反而不知道應該如何自在地走去露台放鬆心情。
我不適合人類 超過半小時的派對
靈魂在這裡 沒有同類
- 在派對中沒有目的的無謂對話和形式上的演技，不能滿足作者想要和人交流的意義。和派對上別人不同頻率令人感到孤獨。
My little airport仲有好多令人真實得心酸共鳴的作品，我認為就係因為人類情感嘅複雜，令得唔到嘅人、事、物有價值。而令人更加有動力去爭取自己想要嘅嘢。
歡迎拍手！likecoin！
