【Teczza專訪】激靚！90後寫港產槍Game 網民捐錢撐
近日，有團隊在連登討論區發貼，說寫了一隻電腦射擊遊戲Raid of Regions，希望網民集氣。一看，以為入錯Post，因為單看畫面，直逼歐美日遊戲級數。
要寫這樣一隻多人對戰第三身槍Game，製作團隊有幾人？金主又是誰？
Toward Games團隊，就得他們三個。位位20歲出頭，每人湊了萬多元。
三人打江山 熱血如上莊
「呢度係比較侷，但你可以用呢把風扇仔。」Jessie指着那把印有Game名Raid of Regions的電話插頭風扇仔，說是在動漫節搞宣傳時派的。每把成本2蚊左右，天時暑熱，即插即用。
訪問場地是他們問一位創業的朋友借來的，位於新蒲崗的一間Coworking Space裏的一間約200呎房間，最多可擠10人。他們三人還未擁有自己Office，通常各自在家工作，方便長期作戰。訪問前一晚，他們只睡了四小時，說是為了趕起遊戲更新，再將畫面擷取成GIF放到討論區宣傳。
「係同上莊差唔多程度嘅熱血囉！」Jessie笑說。他們在城市大學主修Creative Media，負責宣傳和設計的Jessie與團隊主腦Mars畢業已一年，寫Program的Lewis則預備升Year 4。
一齊寫Game，因為鍾意打機。Mars說：「我讀幼稚園小學嗰陣已經睇阿爸玩生化危機，大個咗就同家姐玩模擬市民、夢幻西餐廳嗰啲，再大個啲就同Friend玩射擊Game呀，單機Game Assassin’s Creed、Witcher嗰啲」。
Jessie興奮地插嘴：「我阿爸都係負責買Battlefield畀我嗰個嚟㗎喎，哈哈！嗰時同佢一齊行過Game舖，我同佢都覺得『嘩好正喎』，跟住就買咗」。
Lewis父母不打機，但自從知道兒子進軍遊戲界，竟偷偷在Google自學：「最近佢哋同我傾偈，都會話『嘩嗰啲槍Game點樣點樣㗎喎』，有次佢話『你呢度加多個Buff，粒子彈可能識着火，好玩啲』咁樣，我係完全唔知佢點樣可以知道呢啲資訊」。
放棄手遊 因為興趣行先
父母全力支持，他們放手一搏。但今時今日不做手機遊戲，似乎同錢作對？「手機Game個生產周期短之餘，錢係賺得多啲嘅。」Mars說：「我哋都係做我哋自己想做嘅嘢，多過諗錢…我哋想整槍Game，咁槍Game喺電腦個操控比手機版好好多，就喺電腦整囉」。
「喺個畫質上，其實我哋用咗好多時間去學，外國Game係點做一啲Modeling，一啲後製嘅Effect，或者VFX之類，我哋全部都花咗好多時間去研究，可能個Workflow唔係平時香港啲人整Game會用到」。
辛苦了半年，決定將心血推給機迷試試反應。他們在動漫節前不眠不休地趕工，製成一個試玩版，並在連登開Post，圖文並茂地介紹Raid of Regions，「我哋幻想個Post係，可能有幾十個人睇到，畀啲正評我哋咁，就算㗎喇。但估唔到幾個鐘入面，啲正評已經爆到好高，呢樣係我哋意想唔到嘅Surprise。」
港人撐土炮 我要真香港
網民瘋狂正評，一來畫面有驚喜，二來港人撐土炮，三來，原來很多人想玩香港地圖，「我哋一開始就想出城市場景，無奈資源上好難做到，因為整一個城市，建築物呀、入面啲家俬擺設呀係非常之多，你要花更多時間去做」。
「大家都好想有旺角、果欄嗰一類，我哋覺得必有嘅係天橋、霓虹燈、行人隧道嗰啲，就算欄杆上面嗰啲橫額，我哋都會試整。」橫額？議員「成功爭取」嗰啲？「哈哈，可能係啲畀人篤穿咗嘅都未定，香港特色嘛」。
「我哋想造出香港人眼中嘅香港，唔係外國人覺得嘅香港、好多燈籠嗰種香港。」
為了完成這項複雜工程，時間與金錢，缺一不可，所以他們上Kickstarter搞眾籌，可惜出師不利，「討論區個Post最慘痛嘅經歷呢，就係出Post嘅人唔記得擺番我哋條Link入去…」Jessie聞言大笑，Mars欲言又止：「呢件事教訓咗我嘅係…」Lewis突然搶閘：「教訓咗唔應該畀我開Post！」語畢趴在桌上，笑到失控。
有無因此鬧交？Jessie：「冇呀，笑囉，恥笑自己囉！」
眾籌計劃尚在進行，但進度未如理想。無論如何，他們力爭在今年年底將Raid of Regions放到Steam上架，定價156港元。扣除Steam收取的30%佣金，賣Game錢其實不夠為三人出糧，不過他們目光不止於此。
「我哋都唔敢奢望有好多人玩呢隻Game，畀大家認識到我哋已經係好好喇。其實同時在線人數大槪有幾百或者一千個，已經好滿足㗎喇，作為第一隻作品嚟講」。
「隻Game會出多國語言版本，其實我哋六月份已經將Game trailer send去各大媒體，外國同香港都有，外國媒體都有報道過我哋有Closed Alpha（封測），當時反應都OK，有六、七百個外國Gamers註冊」。
半年零收入 年輕是本錢
為了夢想，Mars和Jessie畢業後放棄全職工作，只靠兼職幫補，月入幾千，公司成立至今零收入。對他們來說，年輕就是本錢，Mars：「我份Part-time有時會Pass我去做其他嘢，待遇都幾優厚，但呢樣嘢始終吸引唔到我嘅原因係，」
「如果我一旦返Full-time，個心穩定咗，我就唔會再敢、亦都唔會有一個契機，令我自己走出嗰個咁穩定嘅環境，所以我寧願困難重重咁去嘗試。」
「咁當然你可能會話，不如返一年Full-time，之後先去做（創業）啦，我覺得未嘗不可嘅。但時間有限，嗰一年可能最終係嘥咗都未定。或者賺咗嗰一年嘅錢，其實係儲唔到嘅，可能你自己洗咗，去旅行或者買其他嘢洗咗。咁其實如果都係會咁嘅時候，不如就由諗到（Idea）嗰一刻開始做啦。」
