កម្មករ​រោងចក្រ​ឃែនធើរេន​ស្នើ​ឲ្យ​លោក ហ៊ុន សែន អន្តរាគមន៍​ដោះស្រាយ​វិវាទ​ការងារ

កម្មករ​រោងចក្រ ឃែនធើរេន អីភែរឹល ខេមបូឌា (Canteran Apparel Cambodia) ក្នុង​ខណ្ឌ​ពោធិ៍សែនជ័យ រាជធានី​ភ្នំពេញ នាំគ្នា​យក​ញត្តិ​ទៅ​ដាក់​នៅ​ខុទ្ទកាល័យ​លោក ហ៊ុន សែន និង​ក្រសួង​ការងារ ដើម្បី​សុំ​ជួយ​អន្តរាគមន៍​ករណី​ថៅកែ​បិទ​រោងចក្រ​ដោយ​មិន​ទូទាត់​ប្រាក់​ជំពាក់​កម្មករ​ប្រមាណ ៧០​ម៉ឺន​ដុល្លារ។

ការ​ដាក់​ញត្តិ​របស់​ក្រុម​កម្មករ​ទាំងនេះ បាន​ធ្វើឡើង​បន្ទាប់ពី​រោងចក្រ​នេះ​បាន​បិទ​ទ្វារ​លែង​ដំណើរការ និង​បាន​ដឹក​សម្ភារ​ខ្លះ​ចេញពី​រោងចក្រ​ក្នុង​អំឡុង​ពេល​បុណ្យ​ចូលឆ្នាំ​ខ្មែរ​កាលពី​ខែ​មេសា ឆ្នាំ​២០២២ ដោយ​ពុំ​បាន​ទូទាត់​ប្រាក់​ឈ្នួល និង​អត្ថប្រយោជន៍​ផ្សេងៗ​ជូន​កម្មករ​និយោជិត។

លោកស្រី អ៊ុំ យ៉ាន់ ដែល​ធ្វើការ​នៅ​រោងចក្រ​នេះ ប្រាប់​ក្រុម​អ្នក​សារព័ត៌មាន​ថា ថៅកែ​រោងចក្រ​បាន​បិទ​ទ្វារ​ដោយ​មិន​បាន​ជូនដំណឹង​ហើយ ក៏​មិន​បាន​ទូទាត់​ប្រាក់​អតីតភាព រួម​ទាំង​ប្រយោជន៍​ផ្សេងៗ​ទៀត​ជូន​កម្មករ។ លោកស្រី​ស្នើ​ទៅ​លោក ហ៊ុន សែន ជួយ​អន្តរាគមន៍​ចំពោះ​រឿង​នេះ ដោយ​ថា​បច្ចុប្បន្ន ពួកគាត់​គ្មាន​ប្រាក់​សម្រាប់​ផ្គត់ផ្គង់​ជីវភាព​គ្រួសារ ហើយ​ក៏​គ្មាន​ប្រាក់​សម្រាប់​បង់​ធនាគារ និង​បង់​សាលា​ឲ្យ​កូន​រៀន​នោះ​ដែរ។

ប្រធាន​សមាគម​អភិវឌ្ឍន៍​ជីវភាព​ពលរដ្ឋ​កម្ពុជា លោក ព្រុំ ប៊ុនថន បាន​លើកឡើង​ថា ការ​ដាក់​ញត្តិ​នៅ​ខុទ្ទកាល័យ​លោក​នាយករដ្ឋមន្ត្រី បន្ទាប់ពី​ក្រសួង​ការងារ​នៅតែ​មិន​ដោះស្រាយ​ឱ្យ​កម្មករ​ដែល​ជួប​ការ​លំបាក​ខ្លាំង។

លោក​បង្ហាញ​ការ​ខកចិត្ត​ដែល​ក្រសួង​ការងារ​នៅតែ​ពន្យារ​ពេល​ដោះស្រាយ និង​ការ​ចាត់​វិធានការ​លើ​ថៅកែ​រោងចក្រ ឃែនធើរេន ដែល​ទៅ​បើក​រោងចក្រ​ថ្មី ប៉ុន្តែ​មិន​ទូទាត់​ប្រាក់ និង​អត្ថប្រយោជន៍​ជូន​កម្មករ។

លោក ព្រុំ ប៊ុនថន បន្ត​ថា កាលណា​ក្រសួង​នៅតែ​មិន​ដោះស្រាយ ដោយ​ធ្វើ​មិន​ដឹង​មិន​ឮ​បែប​នេះ វា​បង្ហាញ​ពី​គំរូ​មិន​ល្អ និង​ជា​ការ​ជំរុញ​ឱ្យ​ថៅកែ​រោងចក្រ​ផ្សេងៗ​ទៀត​ធ្វើតាម​ផង​ដែរ។ លោក​បញ្ជាក់​ថា ថៅកែ​រោងចក្រ ឃែនធើរេន ជំពាក់​បំណុល​ក្រុម​កម្មករ​ខ្ទង់ ៧០​ម៉ឺន​ដុល្លារ ខណៈ​ថៅកែ​រោងចក្រ​នេះ​បាន​បិទ​រោងចក្រ​ចាស់ ហើយ​រត់​ទៅ​បើក​រោងចក្រ​ថ្មី។ ទោះបីជា​ថៅកែ​រោងចក្រ​បាន​ដឹក​សម្ភារ ដើម្បី​យក​ទៅ​បើក​នៅ​កន្លែង​ថ្មី​ក៏ដោយ ប៉ុន្តែ​ក្រសួង​ការងារ​មិន​មាន​ចំណាត់ការ​អ្វី​លើ​ថៅកែ​ឡើយ។

ក្រោយពី​រោងចក្រ​បិទ​ទ្វារ​នោះ កម្មករ​កម្មការិនី​នៅ​រោងចក្រ ឃែនធើរេន បាន​នាំគ្នា​តវ៉ា និង​ដាក់​វេន​គ្នា​ដេក​យាម​មុខ​រោងចក្រ​ជិត ២​ខែ​មក​ហើយ ដើម្បី​ការពារ​មិន​ឱ្យ​មាន​ការ​ដឹក​សម្ភារ​ផ្សេងៗ​ចេញពី​រោងចក្រ និង​ទាមទារ​ឱ្យ​ថៅកែ​ចេញ​មុខ​ដោះស្រាយ​សំណង​ជូន​ពួកគេ​តាម​ផ្លូវ​ច្បាប់។

បើ​តាម​សហជីព​កន្លងមក ពួកគេ​ធ្លាប់​ដាក់​ញត្តិ​ទៅ​អាជ្ញាធរ​ខណ្ឌ​ពោធិ៍សែនជ័យ ក្រសួង​ការងារ ស្ថានទូត​ម៉ាឡេស៊ី​ប្រចាំ​កម្ពុជា និង​ស្ថានទូត​អាមេរិក​ប្រចាំ​កម្ពុជា ដើម្បី​សុំ​អន្តរាគមន៍​ឱ្យ​មាន​ដំណោះស្រាយ​វិវាទ​ការងារ​នេះ ប៉ុន្តែ​រហូត​ពេលនេះ​នៅតែ​ពុំ​មាន​ដំណោះស្រាយ​ណា​មួយ​ឡើយ ហើយ​ពួកគេ​កំពុង​ពិភាក្សា​ជាមួយ​មេធាវី​ដើម្បី​ប្តឹង​ករណី​នេះ​ទៅ​តុលាការ​បន្ថែម​ទៀត៕

https://www.cambodiadaily.com/2022/06/22/23/16/62966/?feed_id=206

--

--

--

គេហទំព័រផ្លូវការ សារព័ត៌មាន ឌឹ ខែមបូឌា ដេលី ជាភាសាខ្មែរប្រចាំថ្ងៃ

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store
The Cambodia Daily

The Cambodia Daily

All the News Without Fear or Favor

More from Medium

Ques-tas-ke, the One Who Limps

Reliving History in Video Games Through Virtual Reenactment

Looks like film presets

American Song Contest Should Be Renewed For Season 2