មេធាវី​ការពារ​ក្តី​ឱ្យ​កញ្ញា សេង ធារី ដាក់​ពាក្យ​ស្នើសុំ​ទៅ​ក្រសួង​មហាផ្ទៃ​ចូល​ជួប​កូនក្ដី​នៅ​ក្នុង​ពន្ធនាគារ

មេធាវី​ការពារ​ក្តី​ឱ្យ​កញ្ញា សេង ធារី ស្នើ​អគ្គនាយក​នៃ​អគ្គនាយកដ្ឋាន​ពន្ធនាគារ​ក្រសួង​មហាផ្ទៃ សុំ​ចូល​ជួប​សម្ភាស​កូនក្ដី​របស់​ខ្លួន​ក្នុង​ពន្ធនាគារ​ខេត្ត​ព្រះវិហារ ដោយសារតែ​បារម្ភ​ខ្លាច​មន្ត្រី​ពន្ធនាគារ​ខេត្ត​មិន​អនុញ្ញាត​ឱ្យ​ចូល​ជួប​កូនក្ដី​នៅ​ពេល​ដែល​ទៅ​ដល់​ពន្ធនាគារ។

មេធាវី​ការពារ​ក្តី​ឱ្យ​ជន​ជាប់ចោទ លោក ជូង ជូងី បាន​ដាក់​ពាក្យ​ទៅ​កាន់​អគ្គនាយក​នៃ​អគ្គនាយកដ្ឋាន​ពន្ធនាគារ​នៃ​ក្រសួង​មហាផ្ទៃ សុំ​ចូល​ជួប​សម្ភាស​កូនក្ដី​របស់​ខ្លួន​ក្នុង​ពន្ធនាគារ​ខេត្ត​ព្រះវិហារ នៅ​ថ្ងៃទី​២០ ខែ​មិថុនា ឆ្នាំ​២០២២ ដោយ​បាន​បញ្ជាក់​ថា កញ្ញា សេង ធារី បាន​សុំ​ពឹង​រូបលោក​ឱ្យ​ការពារ​សិទ្ធិ​ក្នុង​សំណុំរឿង​ព្រហ្មទណ្ឌ​លេខ​១១៤០ របស់​សាលាដំបូង​រាជធានី​ភ្នំពេញ​ដែល​បាន​ចោទប្រកាន់​លើ​កញ្ញា​កាលពី​ពេល​កន្លងទៅ​នេះ។

លោក ជូង ជូងី បញ្ជាក់​ថា បន្ទាប់ពី​កញ្ញា​ត្រូវ​បាន​ឃុំ​ខ្លួន​ក្នុង​មណ្ឌល​កែប្រែ «ម​២» បាន​មួយ​ថ្ងៃ មន្ត្រី​មណ្ឌល​អប់រំ​កែប្រែ «ម​២» បាន​ផ្តល់​ដំណឹង​ជូន​រូបលោក​ថា កញ្ញា សេង ធារី ត្រូវ​បាន​បញ្ជូន​ទៅ​ឃុំ​ខ្លួន​នៅ​ខេត្ត​ព្រះវិហារ ជំនួស​វិញ។ ដូច្នេះ ក្នុង​នាម​លោក​ជា​មេធាវី​ការពារ​សិទ្ធិ​ជនរងគ្រោះ ត្រូវ​មាន​ភារកិច្ច​ជួប​កូនក្ដី​របស់​ខ្លួន​នៅ​ពន្ធនាគារ ដើម្បី​ផ្តល់​ការ​ប្រឹក្សា​ផ្នែក​ច្បាប់​ការពារ​សិទ្ធិ​កញ្ញា សេង ធារី តាម​នីតិវិធី​បន្ត​ទៀត។

សាលាដំបូង​រាជធានី​ភ្នំពេញ បាន​សម្រេច​ផ្ដន្ទាទោស​កញ្ញា សេង ធារី ដាក់​ពន្ធនាគារ​ចំនួន ៦​ឆ្នាំ និង​ចេញ​ដីកា​បង្គាប់​ឱ្យ​ចាប់​ខ្លួន​ភ្លាមៗ​នៅ​មុខ​សាលាដំបូង​រាជធានី​ភ្នំពេញ ដែល​មាន​សមត្ថកិច្ច​ប្រមាណ ៥០​នាក់ ដោយ​បញ្ជូន​ពលរដ្ឋ​ខ្មែរ-អាមេរិកាំង​រូប​នេះ​ទៅ​ឃុំ​ខ្លួន​ក្នុង​ពន្ធនាគារ​ព្រៃស​ភ្លាមៗ​ក្រោម​បទ​ចោទ «រួម​គំនិត​ក្បត់»។

ប៉ុន្តែ​នៅ​ថ្ងៃទី​១៥ ខែ​មិថុនា កញ្ញា សេង ធារី ត្រូវ​បាន​សមត្ថកិច្ច​ក្រុង​ភ្នំពេញ​បញ្ជូន​ទៅ​ឃុំ​ខ្លួន​នៅ​ពន្ធនាគារ​ខេត្ត​ព្រះវិហារ ដោយ​គ្មាន​មូលហេតុ​ច្បាស់លាស់ ខណៈ​មេធាវី​ការពារ​ជនរងគ្រោះ​មិន​ទាន់​បាន​ជួប​កូនក្ដី​របស់​ខ្លួន​នៅឡើយ​ទេ​រហូត​មក​ទល់​នឹង​ពេលនេះ។

អ្នក​នាំពាក្យ​អគ្គនាយក​នៃ​អគ្គនាយកដ្ឋាន​ពន្ធនាគារ លោក នុត សវនា ពុំ​ទាន់​អាច​សុំ​ការ​អត្ថាធិប្បាយ​ជុំវិញ​ករណី​នេះ​បាន​នៅឡើយ​ទេ។

ជុំវិញ​ការ​ដោះដូរ​មន្ទីរ​ឃុំឃាំង​នេះ មន្ត្រី​ពន្ធនាគារ​ព្រៃស​ធ្លាប់​បាន​ប្រាប់​សារព័ត៌មាន​ក្នុង​ស្រុក​ថា កន្លងមក កញ្ញា សេង ធារី បាន​ធ្វើ​សកម្មភាព​មួយ​ចំនួន​នាំ​ឱ្យ​មាន​ភាព​ចលាចល ដូច្នេះ​ខាង​ពន្ធនាគារ​ត្រូវ​មាន​ការ​ប្រុងប្រយ័ត្ន​ខ្ពស់ ក្រោម​ហេតុផល​ថា ក្រុម​អ្នកគាំទ្រ​កញ្ញា សេង ធារី បាន​ត្រៀម​ធ្វើ​បាតុកម្ម​នៅ​ខាង​មុខ​មណ្ឌល​អប់រំ​កែប្រែ​របស់​ខ្លួន។

កញ្ញា សេង ធារី ដែល​មាន​សញ្ជាតិ​អាមេរិកាំង​រូប​នេះ​ត្រូវ​បាន​សមត្ថកិច្ច​កម្ពុជា​ចាប់ និង​បញ្ជូន​ទៅ​ឃុំ​ខ្លួន​នៅ​ពន្ធនាគារ​ព្រៃស កាលពី​ថ្ងៃទី​១៤ ខែ​មិថុនា ក្រោយពី​តុលាការ​ក្រុង​ភ្នំពេញ​ប្រកាស​សាលក្រម​ផ្ដន្ទាទោស​ដាក់​ពន្ធនាគារ ៦​ឆ្នាំ ពី​បទ «រួម​គំនិត​ក្បត់ និង​ញុះញង់» ក្នុង​ករណី​កញ្ញា​បង្ហោះ​សារ​គាំទ្រ​គម្រោង​មាតុភូមិ​និវត្តន៍​របស់​លោក សម រង្ស៊ី កាលពី​ឆ្នាំ​២០១៩ កន្លងទៅ​នោះ។

ក្រុម​អ្នក​សង្កេតការណ៍​លើកឡើង​ថា ការ​ចាប់​ខ្លួន​ពលរដ្ឋ​ខ្មែរ-អាមេរិកាំង​នេះ គឺជា​ការ​សាកល្បង​ដ៏​ធំ​មួយ​ទៀត​របស់​លោក ហ៊ុន សែន ដើម្បី​ចង់​ដឹង​ប្រតិកម្ម​របស់​សហរដ្ឋ​អាមេរិក​ក្នុង​កាលៈទេសៈ​នេះ បន្ទាប់ពី​មាន​ការ​ចាប់​ឃុំ​ខ្លួន​ប្រធាន​គណបក្ស​សង្គ្រោះ​ជាតិ លោក កឹម សុខា ពី​បទ​ក្បត់​ជាតិ​ភ្ជាប់​នឹង​សហរដ្ឋ​អាមេរិក​កាលពី​ឆ្នាំ​២០១៧ កន្លងទៅ​នោះ។

របាយការណ៍​ស្ដីពី​នីតិរដ្ឋ​ឆ្នាំ​២០២១ នៃ​គម្រោង​យុត្តិធម៌​ពិភពលោក (The World Justice Project) បាន​រក​ឃើញ​ថា កម្ពុជា​បាន​ជាប់​ចំណាត់ថ្នាក់​លេខ​ទី​១៣៨ ក្នុង​ចំណោម​ប្រទេស​១៣៩ ដោយសារតែ​ការ​ដឹកនាំ​គ្មាន​តម្លាភាព ការ​គំរាមកំហែង​សិទ្ធិ​ជា​មូលដ្ឋាន​របស់​ពលរដ្ឋ និង​ការ​មិន​ធានា​បាន​នូវ​ប្រព័ន្ធ​យុត្តិធម៌​របស់​ខ្លួន​តាម​ផ្លូវ​តុលាការ​ពី​សំណាក់​រដ្ឋាភិបាល​កម្ពុជា​សព្វថ្ងៃ​នេះ៕

https://www.cambodiadaily.com/2022/06/21/15/01/62955/?feed_id=200

--

--

--

គេហទំព័រផ្លូវការ សារព័ត៌មាន ឌឹ ខែមបូឌា ដេលី ជាភាសាខ្មែរប្រចាំថ្ងៃ

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store
The Cambodia Daily

The Cambodia Daily

All the News Without Fear or Favor

More from Medium

GrouPoll

Vision Disabilities and the DMV

SWP TOKEN AND IT'S FEATURES

Proportional Representation Is a Great Idea That The Left Should Embrace