សមត្ថកិច្ច​ចាប់​ខ្លួន​បេក្ខជន​មេឃុំ​ជាប់​ឆ្នោត​គណបក្ស​ភ្លើង​ទៀន​នៅ​ខេត្ត​កំពង់ធំ​ពី​បទ​ប្លន់

បេក្ខជន​មេឃុំ​ជាប់​ឆ្នោត​របស់​គណបក្ស​ភ្លើង​ទៀន​ឃុំ​ចំណារលើ ស្រុក​ស្ទោង ខេត្ត​កំពង់ធំ លោក ឌុក សារ៉ុម ត្រូវ​បាន​សមត្ថកិច្ច​ចាប់​ខ្លួន​នៅ​ថ្ងៃទី​២១ ខែ​មិថុនា ឆ្នាំ​២០២២ នេះ តាម​សាលដីកា​សាលាដំបូង​ខេត្ត​កំពង់ធំ ដែល​បាន​ចោទប្រកាន់​ពី​បទ «ប្លន់»។

លោក ឌុក សារ៉ុម ត្រូវ​បាន​សមត្ថកិច្ច​ខេត្ត​កំពង់ធំ ចាប់​បញ្ជូន​ទៅ​ឃុំ​ខ្លួន​នៅ​ពន្ធនាគារ​ខេត្ត​កំពង់ធំ នៅ​ថ្ងៃទី​២១ មិថុនា នេះ។ ការ​ចាប់​ខ្លួន​នេះ ធ្វើឡើង​ក្រោយពី​លោក​បាន​ជាប់​ឆ្នោត​ជា​មេឃុំ​ចំណារលើ ស្រុក​ស្ទោង ខេត្ត​កំពង់ធំ កាលពី​ថ្ងៃទី​៥ ខែ​មិថុនា កន្លងទៅ។

កាលពី​ថ្ងៃទី​២១ ខែ​មិថុនា ឆ្នាំ​២០២២ សាលាដំបូង​ខេត្ត​កំពង់ធំ បាន​ចេញ​សាលដីកា​បង្គាប់​ឱ្យ​ចាប់​ខ្លួន​លោក ឌុក សារ៉ុម ហៅ​លោក ញឹម សារ៉ុម ពី​បទ​ចោទ «ប្លន់» តាម​បញ្ញត្តិ​មាត្រា​៦ ស្ដីពី​ស្ថាន​ទម្ងន់​ទោស​នៃ​បទឧក្រិដ្ឋ​ដែល​បាន​ប្រព្រឹត្ត​នៅ​ភូមិ​ត្រពាំងជ័រ ឃុំ​ចំណារលើ ស្រុក​ស្ទោង ខេត្ត​កំពង់ធំ កាលពី​ថ្ងៃទី​៣១ ខែ​តុលា ឆ្នាំ​២០០២ កន្លងទៅ។

ក្នុង​សាលដីកា​ដដែល​ឲ្យ​ដឹង​ថា សាលាដំបូង​ខេត្ត​កំពង់ធំ ធ្លាប់​បាន​ចេញ​ដីកា​បង្គាប់​ឱ្យ​លោក ញឹម សារ៉ុម ចូល​ខ្លួន​ឆ្លើយ​បំភ្លឺ​នៅ​តុលាការ​ដែរ ប៉ុន្តែ​លោក​មិន​បាន​អនុវត្ត​តាម​ដីកា​របស់​តុលាការ​ឡើយ​រហូត​ដល់​ចុង​ខែ​មេសា ឆ្នាំ​២០១២ តុលាការ​បាន​ចេញ​ដីកា​ឱ្យ​នាំ​ខ្លួន​ម្តង​ទៀត ប៉ុន្តែ​លោក ញឹម សារ៉ុម បាន​រត់​គេច​ខ្លួន​បាត់​ស្រមោល​តែម្តង។

យ៉ាងណាក៏ដោយ នៅ​ថ្ងៃទី​២១ ខែ​មិថុនា ឆ្នាំ​២០២២ តុលាការ​បាន​ចេញ​ដីកា​ឱ្យ​នាំ​ខ្លួន​លោក ញឹម សារ៉ុម ដោយ​បញ្ជា​ឱ្យ​សមត្ថកិច្ច​តាម​ចាប់​ខ្លួន​លោក​ឲ្យខាងតែ​បាន។

អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា បាន​ប្រាប់​សារព័ត៌មាន The Cambodia Daily នៅ​ថ្ងៃទី​២១ មិថុនា នេះ​ថា អង្គការ​សង្គម​ស៊ីវិល​ដែល​ធ្វើការ​លើ​វិស័យ​ការពារ​សិទ្ធិមនុស្ស​កំពុង​ដាក់​ការ​សង្ស័យ​ថា ការ​ចាប់​ខ្លួន​លោក ញឹម សារ៉ុម អាច​ជា​រឿង​នយោបាយ ជាជាង​ការ​អនុវត្ត​ច្បាប់។ ប៉ុន្តែ​ទោះ​យ៉ាងណា​ក៏ដោយ លោក​មិន​ទាន់​អាច​វាយតម្លៃ​បាន​នៅឡើយ​ទេ ព្រោះ​ថា​ក្រុម​អង្គការ​សង្គម​ស៊ីវិល​កំពុង​ប្រមូល​ព័ត៌មាន​បន្ថែម​ទៀត​ចំពោះ​បញ្ហា​នេះ។

លោក ស៊ឹង សែនករុណា លើក​ជា​ចម្ងល់​ថា បើ​លោក ញឹម សារ៉ុម ជា​ជន​ដែល​ប្រព្រឹត្ត​ល្មើស ហេតុ​អ្វី​ពលរដ្ឋ​ខ្មែរ​ម្ចាស់​ឆ្នោត​បោះឆ្នោត​គាំទ្រ​រូបលោក​ឱ្យ​ធ្វើជា​មេ​ឃុំ? លោក​បន្ត​ថា លោក ញឹម សារ៉ុម មិន​មែន​ជាប់​ជា​មេឃុំ​ត្រឹមតែ​ឆ្នាំ​២០២២ នេះ​ទេ សូម្បី​ការ​បោះឆ្នោត​ក្រុមប្រឹក្សា​ឃុំ-សង្កាត់​ឆ្នាំ​២០១២ កន្លងទៅ ក៏​លោក​ធ្លាប់​ជាប់​ក្រុមប្រឹក្សា​ឃុំ​ដែល​ទទួល​បាន​ការ​គាំទ្រ​ពី​ពលរដ្ឋ​ក្នុង​ឃុំ​របស់​លោក​ដ៏​ច្រើន​សន្ធឹកសន្ធាប់​ដែរ។

មន្ត្រី​ការពារ​សិទ្ធិមនុស្ស​រូប​នេះ​បញ្ជាក់​ថា ក្រុម​អង្គការ​សង្គម​ស៊ីវិល​កំពុងតែ​តាមដាន​យ៉ាង​យកចិត្ត​ទុកដាក់​ក្នុង​ការ​ឃ្លាំមើល​ចំណាត់ការ​របស់​អាជ្ញាធរ​ខេត្ត​កំពង់ធំ ដែល​បាន​ចាប់​ឃុំ​ខ្លួន​លោក ញឹម សារ៉ុម នៅ​ពេល​នេះ ព្រោះ​ថា ចំណាត់ការ​ទាំងឡាយ​របស់​សមត្ថកិច្ច​គឺ​ត្រូវ​ផ្អែក​ទៅ​លើ​មូលដ្ឋាន​ច្បាប់ និង​ការ​គោរព​សិទ្ធិ​ពលរដ្ឋ​ជា​មូលដ្ឋាន។

លោក ញឹម សារ៉ុម ធ្លាប់​ជាប់​ឆ្នោត​ជា​សមាជិក​ក្រុមប្រឹក្សា​ឃុំ​ចំណារលើ ស្រុក​ស្ទោង ខេត្ត​កំពង់ធំ ដែល​មកពី​គណបក្ស សម រង្ស៊ី កាលពី​ឆ្នាំ​២០១២ ប៉ុន្តែ​នៅ​ឆ្នាំ​២០១៧ លោក​បាន​ជាប់​ឆ្នោត​ជា​ជំទប់​ទី​១ ឃុំ​ចំណារលើ ស្រុក​ស្ទោង ខេត្ត​កំពង់ធំ ដដែល មកពី​គណបក្ស​សង្គ្រោះ​ជាតិ លុះ​ដល់​ឆ្នាំ​២០២២ នេះ លោក​បាន​ជាប់​ឆ្នោត​ជា​មេឃុំ​ចំណារលើ ស្រុក​ស្ទោង ខេត្ត​កំពង់ធំ មកពី​គណបក្ស​ភ្លើង​ទៀន តែម្តង។

ចាប់​តាំងពី​ចុងខែ​ឧសភា ឆ្នាំ​២០២២ មក សមាជិក និង​មន្ត្រី​ជាន់ខ្ពស់​គណបក្ស​ភ្លើង​ទៀន ត្រូវ​បាន​អាជ្ញាធរ​កម្ពុជា​ចាប់​ខ្លួន និង​ចោទប្រកាន់​ជា​បន្តបន្ទាប់ ក្នុង​នោះ​រួម​មាន​លោក អៀ ចាន់ណា ដែល​ត្រូវ​បាន​សមត្ថកិច្ច​ចាប់​ខ្លួន​អំឡុង​ពេល​ឃោសនា​បោះឆ្នោត ចំណែក​អនុប្រធាន​គណបក្ស​នេះ លោក សុន ឆ័យ ក៏​ត្រូវ​គណបក្ស​កាន់​អំណាច​ប្តឹង​ទារ​សំណង​ជំងឺ​ចិត្ត ១​លាន​ដុល្លារ​អាមេរិក​ផង​ដែរ​កាលពី​ពេល​ថ្មីៗ​នេះ។

ជុំវិញ​ការ​ចាប់​ខ្លួន​នេះ សារព័ត៌មាន The Cambodia Daily នៅ​មិន​ទាន់​អាច​ទាក់ទង​មន្ត្រី​ជាន់ខ្ពស់​គណបក្ស​ភ្លើង​ទៀន ដើម្បី​សុំ​ការ​បំភ្លឺ​បាន​នៅឡើយ​ទេ​រហូត​មក​ទល់​នឹង​ម៉ោង​ផ្សាយ​នេះ៕

https://www.cambodiadaily.com/2022/06/22/23/35/62977/?feed_id=214

--

--

--

គេហទំព័រផ្លូវការ សារព័ត៌មាន ឌឹ ខែមបូឌា ដេលី ជាភាសាខ្មែរប្រចាំថ្ងៃ

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store
The Cambodia Daily

The Cambodia Daily

All the News Without Fear or Favor

More from Medium

A New Way to Enjoy CNP! What is the burNin’ system?

CS371p Spring 2022 Week 13: Grace Zhu

Call to Action: Safe Injection Sites in Rochester, NY.

Game DevLog (I): Engine and maps