អ្នកវិភាគ៖ រូបមន្ត ២​ភាគ​៣ ជា​ស្មារតី​ដើម​នៃ​ការ​ថែរក្សា​ផលប្រយោជន៍​ជាតិ​ដែល​ផ្ទុយ​ពី​រូបមន្ត ៥០%​បូក​១

អ្នក​តាមដាន​ខាង​ផ្នែក​កិច្ចការ​សង្គម និង​នយោបាយ​នៅ​កម្ពុជា លើកឡើង​ថា រូបមន្ត ២​ភាគ​៣ គឺជា​ស្មារតី​ដើម​នៃ​ការ​ថែរក្សា​ផលប្រយោជន៍​ជាតិ និង​ប្រជាជន​ដែល​ផ្ទុយ​ពី​រូបមន្ត ៥០% បូក​១ គឺជា​ស្មារតី​ដើម​នៃ​ការ​ចរចា​នយោបាយ​ដើម្បី​រក​ផលប្រយោជន៍​សម្រាប់​មេដឹកនាំ​នយោបាយ​ប៉ុណ្ណោះ។

អ្នក​តាមដាន​ផ្នែក​កិច្ចការ​សង្គម និង​នយោបាយ​នៅ​កម្ពុជា លោក ឌី គន្ធា បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​ថ្ងៃទី​២០ មិថុនា ថា ស្មារតី​នៃ​រូបមន្ត ២​ភាគ​៣ ដែល​បាន​ចែង​ក្នុង​រដ្ឋធម្មនុញ្ញ គឺជា​គោល​គំនិត​ដើម​ដែល​មិន​អនុញ្ញាត​ឱ្យ​គណបក្ស​ណា​មួយ ឬ​មេដឹកនាំ​នយោបាយ​ណា​មួយ​ដឹកនាំ​ប្រទេស​ផ្ដាច់មុខ​ដូច​សព្វថ្ងៃ​នេះ​ទេ ដែល​ជា​ហេតុ​នាំ​ឱ្យ​ពួក​អ្នក​នយោបាយ​មាន​លទ្ធភាព​រៀបចំ​ទៅ​រក​ការ​ដឹកនាំ​នយោបាយ​ប្រមូលផ្ដុំ​អំណាច​ទាំង​ក្នុង​រដ្ឋសភា និង​រដ្ឋាភិបាល​ដូច​សព្វថ្ងៃ។

លោក ឌី គន្ធា លើកឡើង​ថា ការ​កែប្រែ​រូបមន្ត​បង្កើត​រដ្ឋាភិបាល ២​ភាគ​៣ ទៅ​ជា ៥០​ភាគរយ​បូក​១ របស់​មេដឹកនាំ​នយោបាយ​ខ្មែរ​កំពូលៗ​នា​ពេល​កន្លងមក បាន​ជះ​ឥទ្ធិពល​អាក្រក់​យ៉ាង​ធ្ងន់ធ្ងរ​ដល់​សង្គម​កម្ពុជា ដូច​ដែល​កំពុង​កើតមាន​សព្វថ្ងៃ​នេះ ព្រោះ​ថា​ពួកគេ​បាន​នាំគ្នា​ក្បត់​ស្មារតី​ដើម​របស់​រដ្ឋធម្មនុញ្ញ​ដែល​ជា​គោល​គំនិត​រួម​របស់​ពលរដ្ឋ​ខ្មែរ​ក្នុង​ការ​រក្សា​នូវ​ដំណើរការ​លទ្ធិប្រជាធិបតេយ្យ និង​ផលប្រយោជន៍​ជាតិ​កម្ពុជា​ទាំងមូល។

អ្នក​តាមដាន​ស្ថានការណ៍​នយោបាយ​កម្ពុជា​រូប​នេះ​បញ្ជាក់​ថា វិបត្តិ​ដែល​កម្ពុជា និង​ពលរដ្ឋ​ខ្មែរ​កំពុង​រងគ្រោះ​ជាក់ស្តែង​សព្វថ្ងៃ​នេះ ដូចជា​ការ​បង្ខាំង​មិន​ឱ្យ​កម្ពុជា​ចូល​ជា​សមាជិក​ក្របខ័ណ្ឌ​សេដ្ឋកិច្ច​ឥណ្ឌូ-ប៉ាស៊ីហ្វិក​អាមេរិក-ជប៉ុន ការ​ព្យួរ​ប្រព័ន្ធ​អនុគ្រោះ​ពន្ធ EBA ២០% របស់​សហគមន៍​អឺរ៉ុប និង​ការ​ផ្អាក​ប្រព័ន្ធ​អនុគ្រោះ​ពន្ធ GSP របស់​អាមេរិក រួម​ជាមួយ​នឹង​ការ​ដាក់​ទណ្ឌកម្ម​ជាច្រើន​មក​លើ​កម្ពុជា។

រដ្ឋធម្មនុញ្ញ​កម្ពុជា​ត្រូវ​បាន​ធ្វើ​វិសោធនកម្ម ឬ​កែប្រែ​ចំនួន ៩​លើក​រួច​មក​ហើយ ក្នុង​នោះ​សមាជិក​រដ្ឋសភា​មកពី​គណបក្ស​ប្រជាជន​កម្ពុជា និង​គណបក្ស សម រង្ស៊ី បាន​ចាប់​ដៃ​គ្នា​កែប្រែ​រូបមន្ត​បង្កើត​រដ្ឋាភិបាល​ពី ២​ភាគ​៣ ទៅ ៥០%+១ កាលពី​ឆ្នាំ​២០០៦ ដែល​ធ្វើ​ឱ្យ​បក្ស​កាន់​អំណាច​របស់​លោក ហ៊ុន សែន អាច​ដឹកនាំ​រដ្ឋាភិបាល​ផ្ដាច់មុខ​ដូច​សព្វថ្ងៃ​នេះ។

អតីត​ប្រធាន​ចលនា​និស្សិត​ដើម្បី​លទ្ធិប្រជាធិបតេយ្យ លោក សារ៉ូ សុវិជ័យ បាន​លើកឡើង​ក្នុង​កិច្ច​ពិភាក្សា​នេះ​ដែរ​ថា កម្លាំង​នយោបាយ​ខាង​ក្រុម​លោក សម រង្ស៊ី បាន​ចូលរួម​ធ្វើ​ឱ្យ​សង្គម​កម្ពុជា​អាប់អួរ​មិន​ចាញ់​គណបក្ស​កាន់​អំណាច​របស់​លោក ហ៊ុន សែន ប៉ុន្មាន​ទេ ជាពិសេស​ការ​ជេរ​ប្រមាថ ការ​លាប​ពណ៌​អ្នក​ប្រជាធិបតេយ្យ​ដូច​គ្នា​ក្នុង​ពេល​បច្ចុប្បន្ន​នេះ។

អតីត​ប្រធាន​ចលនា​និស្សិត​រូប​នេះ​បញ្ជាក់​ថា ការ​លេង​ល្បែង​នយោបាយ​ក្រោម​ការ​រៀបចំ​របស់​លោក ហ៊ុន សែន គឺ​គ្មាន​ប្រយោជន៍​សម្រាប់​ជាតិ​កម្ពុជា​នោះ​ឡើយ។ ផ្ទុយទៅវិញ ពលរដ្ឋ​ខ្មែរ​នឹង​រងគ្រោះ​នូវ​ល្បែង​នយោបាយ​របស់​មេដឹកនាំ​ខ្មែរ​ទាំងនោះ​យ៉ាង​ធ្ងន់ធ្ងរ។ ជាក់ស្តែង វិបត្តិ​នយោបាយ​ដែល​កំពុង​កើតមាន​នូវ​ពេលនេះ គឺជា​ឧទាហរណ៍​ស្រាប់​ដែល​គេ​អាច​មើល​ឃើញ​នឹង​ភ្នែក​ទាំងអស់​គ្នា។

ក្រុម​អ្នក​សង្កេតការណ៍​អះអាង​ថា រយៈពេល​ជាង ១៥​ឆ្នាំ​ក្រោយ​វិសោធនកម្ម​រដ្ឋធម្មនុញ្ញ​ពី ២​ភាគ​៣ មក ៥០​ភាគរយ​បូក​១ កម្ពុជា​បាន​ប្រែ​ក្លាយ​ជា​ប្រទេស​ដែល​ដឹកនាំ​ដោយ​ពហុបក្ស​ទៅជា​ការ​ដឹកនាំ​ដោយ​ឯក​បក្ស ដែល​ធ្វើ​ឱ្យ​មាន​ការ​ព្រួយបារម្ភ​ពី​អធិបតេយ្យភាព បូរណភាព​ទឹកដី និង​នីតិរដ្ឋ​របស់​កម្ពុជា​យ៉ាង​ខ្លាំង ស្រប​ពេល​ដែល​រដ្ឋាភិបាល​ក្រុង​ភ្នំពេញ​ប្រើ​សភា​ឯក​បក្ស​របស់​ខ្លួន​កែប្រែ និង​បង្កើត​ច្បាប់​ថ្មីៗ​ជា​បន្តបន្ទាប់ ដើម្បី​គាប​សង្កត់​សិទ្ធិ​មូលដ្ឋាន​របស់​ពលរដ្ឋ និង​ការពារ​អំណាច​របស់​ខ្លួន​ក្នុង​ពេល​បច្ចុប្បន្ន​នេះ។

យ៉ាងណាក៏ដោយ កាលពី​ថ្ងៃទី​១៣ ខែ​មិថុនា ឆ្នាំ​២០២២ មេដឹកនាំ​បក្ស​កាន់​អំណាច លោក ហ៊ុន សែន ធ្លាប់​បាន​អះអាង​ថា យោង​លទ្ធផល​បោះឆ្នោត​ក្រុមប្រឹក្សា​ឃុំ-សង្កាត់​កាលពី​ថ្ងៃទី​៥ ខែ​មិថុនា ឆ្នាំ​២០២២ កន្លងទៅ​នេះ រដ្ឋសភា​កម្ពុជា​នឹង​មាន​ពហុបក្ស ដូច្នេះ​លោក​រង់ចាំ​មើល​ថា​តើ​នឹង​ហៅ​រដ្ឋាភិបាល​របស់​លោក​ជា​រដ្ឋាភិបាល​ឯក​បក្ស​បន្ត​ទៀត​ដែរ​ឬ​ទេ។

បញ្ហា​នេះ ត្រូវ​អ្នក​ឃ្លាំមើល​សង្គម​រិះគន់​ថា លោក ហ៊ុន សែន អាច​ឱ្យ​មាន​គណបក្ស​ចម្រុះ​ក្នុង​រដ្ឋសភា ក្រោយ​សភា​ឯក​បក្ស​របស់​គាត់​បាន​កែប្រែ​ច្បាប់​គ្រប់​បែប​យ៉ាង​ទៅ​ហើយ​នោះ ប៉ុន្តែ​លោក ហ៊ុន សែន នឹង​មិន​អនុញ្ញាត​កែប្រែ​រូបមន្ត​ពី ៥០%+១ មក​ជា ២​ភាគ​៣ វិញ​ជាដាច់ខាត ព្រោះ​រូបមន្ត ៥០%+១ នេះ គឺជា​រូបមន្ត​រក​ផលប្រយោជន៍​ឱ្យ​បក្ស​កាន់​អំណាច​រហូត​មក៕

https://www.cambodiadaily.com/2022/06/22/23/26/62971/?feed_id=210

--

--

--

គេហទំព័រផ្លូវការ សារព័ត៌មាន ឌឹ ខែមបូឌា ដេលី ជាភាសាខ្មែរប្រចាំថ្ងៃ

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store
The Cambodia Daily

The Cambodia Daily

All the News Without Fear or Favor

More from Medium

The Embassy Row Project Launches Four New Philanthropic Initiatives

Earnings prospects behind the DO unique economic model — — Client

WWW.PLACEATRADE.COM

Mahler’s Version?