Alang sa mga naligsang baki sa Campo
9:02 AM
Subaya ang kalsada sa Campo
ang mga espasyo ug libaung
bag-ung kinurisan sa tumuy anang
silhig-tukug nga mibagnus ug
mipadaplin sa dahong nalaya
ug natulog sa espalto.
Subaya ang kalsada ug ayaw’g lihay,
tutuki ang mga napigsat nga baki
nga tungud sa ulan pagkadlawun
nanggawas ug nagsaba-saba
apan wala’y paki ang mga ligid.
Ang ilang kalingaw sama ra pud sa ilang kinabuhi:
mubu.
Nag-ilug ang green, yellow, ug butuy-butuy
sa ilang panit nga maayung pagkapilit sa kalsada.
Gipabuhagay sa pislat nga mga baki
ilang tinai ug unud gawas anang ilang baba,
lubut o di ba kaha, kiliran.
Subaya ang kalsada nga gibantayan
sa mahogany, acacia ug kaimito
paminawa baya ang halad nga kanta
anang langgam nga dili na matultulan sa imung mata
tungud sa kataas sa mga kahoy
ug kabaga sa dahon niini.
Inig human,
tang-tanga na ang mga earphone
sa dalunggan ug ihipus sa bag,
pangukay ug kinse pesos
para sa habal-habal nga sa layo pa,
nagsenyas na.
~
Ayaw’g kalimut pislit anang ♥ kung naganahan ka ining balaka :)
(Don’t forget to hit that ♥ if you liked this one)
