【與股同行】奧園健康大灣區加物管概念有得諗
呢期又興返炒內房，有大灣區概念就更加唔洗講，今個月特別Sexy，新城發展（01030）、時代中國（01233）及中國奧園（03883）坐底都起碼升三成，就連帶相關既物管股都被撻著。事實上，物管股唔係得個炒字，背後都有基本面支持，好似碧桂園服務（06098）同雅生活服務（03319）早前都先後發盈喜，而後者的業績更勝預期。
近日，都有兩者物管股上市，分別係濱江服務（03316）同奧園健康（03662），先唔睇兩者的基本面同背景，大家的認購反應都係差唔多，不足10倍既超額。不過，上市之後市場對佢地的喜愛程度就明顯有落差，前者執筆呢一刻就較招股價升左唔夠一成，而後者則有逾三成的升幅，可以話榮辱互見。
奧園健康走勢咁勁，相信係因為「大灣區+物管」概念，夠晒吸睛，背靠母公司中國奧園在大灣區的土地儲備優勢，絕對可以藉此分一杯羹。同時，自己在物管行業亦做得不錯，據CIA及中國房地產Top 10研究組的資料，就綜合實力而言，過去3年都不斷提升，由排名第22位升至去年既第16位，而雅生活服務同期都係排高佢幾名，佔據第11位。
奧園健康2018年首三季的物業管理服務營業收入及毛利分別為3.22億元及1.05億元，均已經超過2017年全年的情況。2015至2017年兩者的複合增長率高達46 %及63%，意味著2018年全年奧園健康的物業管理服務營收及毛利的年複合增速將會更勝一籌。同時，招股書披露，奧園健康預期上市後每年支付相等於除稅後溢利40%的股息，派息比率遠高於行業的平均水平。
走勢方面，奧園健康就已經日日創新高，所以應該可以跟住個勢炒，首先定左止蝕位係4.5元，因為係星期二最大成交的價位，交投有4.3球。如果現價買入，不幸回調，就先以呢個價斬纜。反之，一買就繼續升，就可以用之前一日既低位作止蝕/止賺。
股壇潘安
Email: panan201810@gmail.com
本文僅屬個人研究，不構成任何投資建議。
