【與股同行】成交角度看銀城國際
恒指喺兩萬九水平忽上忽落,都幾消磨好淡友的鬥志,話A股帶動港股,又好似唔係好跟得足咁,但那邊廂美股回,又未足以令港股出現很大的調整。喺咁既市況下,開始有一小撮資金就走左去炒新股避開大市。
最近,有兩隻新股都炒到癲晒,冠轈控股(01872)用左短短4日,就由招股價0.43元,飆升到1.99元,1賠3.6。另外,嘉藝控股(01025)以同樣4日路程,都炒左兩倍利潤出黎。
竟然新股有勢,我諗都應該可以「衝衝衝衝衝衝衝衝衝」入去博一博,尤其是最近上市嗰啲股份,至於間公司做乜野,其實都可以唔洗理,自己亦都懶得睇。啱啱新鮮滾熱辣既,就有隻銀城國際控股(01902),它認購不足上市,招股價2.38元。
純以股價走勢同成交分析,似乎都幾值博,首先過去兩日高低波幅只有0.10元,股價只喺係2.32元至2.42元之間游走,唔係好大上落,咁就唔會咁易俾CHOK走。第二,佢喺2.38元的成交特別大,首日有超過9球的交易量喺呢個價位,而宜家又係呢啲位,即呢個位應該有大手係到吸納或者轉手,當然都可以爭拗,話有大手沽出,但用返招股價沽出又為左乜呢?又點解隊唔落啲股價先?
另外,就係尋日(7日)最後個5分鐘特別多大手成交,不論主動買入定沽出,有別於全日大部份時間都係一手黨沽貨。睇返成交記錄,都有啲係以80萬、30幾萬同10幾萬的沽盤,但排隊買入既都係講近十幾廿萬貨,咁即係話其實沽到咁上下就有人排返出黎接貨(因為只看最後畫面,只係純合理推斷,有機會可能排定啲大單係到等沽都唔出奇,但睇多幾個價位的情況就唔係好似。),照咁睇,收市價2.38元係一個唔錯的支持位,亦同首日大成交個價位好吻合。
策略上,就以2.32元(即呢兩日既最低價)作為止蝕,用6格去博2.38元留上既唔知幾多升幅,我自己就覺得幾抵博。
股壇潘安
Email: panan201810@gmail.com
本文僅屬個人研究,不構成任何投資建議。