ເປັນຫຍັງຕ້ອງຂຽນບລັອກ ?

ຫລັງຈາກທີ່ຜູ່ຂຽນໄດ້ອ່ານບົດຄວາມ Why Every Developer Should Write Blog ທີ່ຂຽນວ່າເປັນຫຍັງນັກພັດທະນາຊອບແວຈຶ່ງຄວນຂຽນບລັອກກໍເລີຍເກີດ Inspiration ເຮັດໃຫ້ຢາກຂຽນນຳ ເລີຍເກີດເປັນບົດຄວາມນີ້ຂຶ້ນມາ ແຕ່ບົດນີ້ຈະຂຽນໃນມຸມມອງຂອງຄົນທົ່ວໄປວ່າເປັນຫຍັງເຈົ້າຈຶ່ງຄວນຂຽນບລັອກ ໂດຍກໍຈະລວມເອົາປະສົບການຈາກທີ່ຕົວເອງພົບຜ່ານມາແນ່ ແລະ ຟັງຄົນອື່ນມານຳ ເມື່ອເຈົ້າອ່ານບົດຄວາມນີ້ຈົບລົງແລ້ວຫວັງວ່າຈະເກີດແຮງບັນດານໃຈມາຂຽນນຳກັນ 55… ເຂົາເອີ້ນວ່າຫາພັກພວກ

ມັນເປັນການຮຽນຮູ້

http://www.lifehack.org/396579/here-are-the-best-ways-to-learn-a-language-and-the-pros-cons

ຂໍ້ນີ້ຍົກໃຫ້ເປັນຂໍຫລັກເລີຍເພາະການຂຽນບລັອກໄດ້ຂໍ້ນີ້ໄປເຕັມໆເລີຍ ຖ້າເຮົາເບິ່ງຈາກກຣາຟ ທີ່ສະແດງການຮຽນຮູ້ຈະເຫັນວ່າ ການສອນເປັນທາງທີ່ເຮັດໃຫ້ເຮົາຮຽນຮູ້ໄດ້ຫລາຍທີ່ສຸດ

ການຂຽນບລັອກກໍເປັນການສອນອີກຮູບແບບນຶ່ງຄື ການອະບາຍເລື່ອງໃດນຶ່ງໃຫ້ຄົນອ່ານເຂົ້າໃຈ ກ່ອນທີ່ຈະອະທິບາຍໃຫ້ຄົນອ່ານເຂົ້າໃຈເຈົ້າກໍຕ້ອງໄດ້ຮຽນຮູ້ໃຫ້ຕົວເອງເຂົ້າໃຈເສຍກ່ອນ ເມື່ອໃດທີ່ເຈົ້າອະທິບາຍເລື່ອງຍາກໆໃຫ້ຄົນເຂົ້າໃຈໄດ້ໂດຍງ່າຍໄດ້ນັ້ນ ສະແດງວ່າເຈົ້າເຂົ້າໃຈເລື່ອງນັ້ນຢ່າງເລິກເຊິ່ງດັ່ງຄຳເວົ້າຂອງ Albert Einstein

“ If you can’t explain it simply, you don’t understand it well enough. “

ເຊິ່ງການຂຽນບລັອກໃຫ້ໄດ້ຈັກນຶ່ງບົດຄວາມເຈົ້າຈະຕ້ອງຮຽນຮູ້ຢ່າງຫນັກ ກວ່າທີ່ມັນຈະອອກມາເປັນໂຕຫນັງສືໃຫ້ຜູ່ອ່ານເຂົ້າໃຈງ່າຍໆ ບໍ່ໄດ້ເວົ້າໃຫ້ຢ້ານແຕ່ເບິ່ງໃນມຸມບວກ ວ່າເຈົ້າຈະເກີດການພັດທະນາເທົ່າໃດຖ້າມາຂຽນບລັອກ.

ພັດທະນາທັກສະ

ແນ່ນອນນອນມັນຈະຊ່ວຍພັດທະນາ:

  • ການຂຽນ: ເຊິ່ງມື້ນຶ່ງມັນອາດຈະຈຳເປັນກັບເຈົ້າກໍໄດ້
  • ການສອນ ແລະ ການສື່ສານ: ຝຶກທີ່ຈະອະທິບາຍບາງຢ່າງໃຫ້ຄົນອື່ນເຂົ້າໃຈໄດ້ແນວໃດ
  • ວິທີການຮຽນຮູ້: ການຮວບຮວມຂໍ້ມູນ ແລະ ຮຽນຮູ້ຢ່າງໄວ
  • ຮຽບຮຽງຄວາມຄິດ: ຈາກການໄດ້ຮຽບຮຽງຂໍ້ມູນ ແລະ ຄວາມຄິດ ໃຫ້ອອກມາເປັນບົດຄວາມ

ໄດ້ຮຽນຮູ້ພາສາຫລາຍຂຶ້ນ

ການຂຽນມັນກໍຕ້ອງມາພ້ອມຫລັກໄວຍາກອນ ບໍ່ວ່າຈະເປັນພາສາໃດກໍຕາມມັນສາມາດພັດທະນາພາສານັ້ນຂອງເຈົ້າໄດ້ ຈາກປະສົບການຂອງຜູ່ຂຽນເອງເມື່ອໄດ້ມາຂຽນແລ້ວ ເຮັດໃຫ້ຮູ້ຫລາຍຢ່າງກ່ຽວກັບພາສາລາວ ບາງຢ່າງເຮົາຄິດວ່າມັນຖືກແຕ່ທີ່ຈິງອາດຈະຜິດກໍໄດ້.

ໄດ້ສ້າງເນື້ອຫາພາລາວໃນໂລກອອນລາຍ

ຕ້ອງບອກກ່ອນວ່າບໍ່ຈຳເປັນຈະຕ້ອງເປັນພາສາລາວສະເຫມີໄປ ອາດຈະເປັນພາສາອັງກິດກໍໄດ້ ແຕ່ໃນຄວາມຄິດເຫັນສ່ວນຕົວຢາກໃຫ້ມີພາສາລາວໃນໂລກອອກນລາຍໃຫ້ຫລາຍກ່ອນນີ້ ເພາະສັງເກດວ່າທຸກມື້ນີ້ເຮົາຄົ້ນຫາໃນ Google ກໍເກືອບຈະບໍ່ມີເນື້ອຫາພາສາລາວເລີຍ ມັນເປັນເລື່ອງທີ່ຫນ້າເສົ້າຫລາຍ T_T.

ໄດ້ແບ່ງປັນ

ຍຸກນີ້ເປັນຍຸກແຫ່ງການແບ່ງເປັນຂະຫນາດເຟສບຸກຍັງສາມມາດກົດ “ແບ່ງປັນໄດ້” ແລ້ວເປັນຫຍັງເຮົາຈະບໍ່ແບ່ງເປັນ ຄວາມຮູ້, ຄວາມຄິດ, ວິໄສທັດ, ເລື່ອງລາວຕ່າງໆໃຫ້ກັນ ບາງທີສິ່ງທີ່ເຈົ້າຂຽນມັນອາດຈະຊ່ວຍແກ້ບັນຫາໃຫ້ບາງຄົນ ກໍໄດ້.

ເປັນທີ່ຮູ້ຈັກ

ເຮົາເປັນຄົນສ້າງເນື້ອຫາໃຫ້ຫລາຍໆຄົນໄດ້ອ່ານ ມັນກໍມີໂອກາດທີ່ຈະເຮັດໃຫ້ຄົນຮູ້ຈັກເຮົາຫລາຍຂຶ້ນ ເຊິ່ງຄົນເຫລົ່ານັ້ນກໍສົນໃຈໃນສິ່ງດຽວກັນກັບເຮົາ ແລະ ມັນອາດຈະມີຜົນຕໍ່ຊີວິດເຈົ້າກໍໄດ້ ຢ່າງຫນ້ອຍກໍສາມາດມາຮູ້ຈັກກັບຂ້ອຍໄດ້ :D

ຊ່ວຍເຕືອນຄວາມຈຳ

ບາງເລື່ອງທີ່ເຮົາຮຽນຮູ້ຕອນນີ້ ອານາຄົດອາດຈະລືມກໍໄດ້ແຕ່ຖ້າຂຽນເປັນບົດຄວາມໄວ້ເຮົາກໍກັບມາເບິ່ງຄືນໄດ້ສະເຫມີ ແຖມມັນຈະຊ່ວຍປະຫຍັດເວລາຍ້ອນວ່າເຈົ້າເປັນຄົນຂຽນເອງຈຶ່ງທຳຄວາມເຂົ້າໃຈໄດ້ໄວຂຶ້ນ ຂ້ອຍກໍໃຊ້ວິທີນີ້ໃນການຂຽນໂປຣແກຣມ.

ເຮັດໃຫ້ເຈົ້າແຕກຕ່າງ

ໄດ້ແນວໃດຫັນຫວາ ສົມມຸດວ່າຖ້າມີຄົນມາຖາມເຈົ້າວ່າ:

“ຕອນວ່າງໆເຈົ້າມັກເຮັດຫຍັງ ?”
ແລ້ວເຈົ້າຕອບໄປວ່າຂ້ອຍມັກຂຽນບລັອກ “ຂ້ອຍມັກຂຽນບລັອກ”

ຮັບຮອງວ່າລາວຕ້ອງເບິ່ງເຈົ້າພິເສດກວ່າຄົນອື່ນ.

ໃຫ້ຄວາມຄິດສ້າງສັນ

ການທີ່ເຈົ້າສ້າງເນື້ອຫາຂຶ້ນມາແບ່ງປັນໃຫ້ຄົນອື່ນເທົ່ານັ້ນເຈົ້າກໍສາມາດເປັນຄົນມີຄວາມ ຄິດ“ສ້າງ”ສັນ ແລ້ວ.

ຮູ້ສຶກເຈົ້າພູມໃຈ

ເມື່ອເຮົາກົດ Publish ບົດຄວາມອອກໄປມັນກໍໄດ້ຄວາມພູມໃຈໃນຕົນເອງຢ່າງບອກບໍ່ຖືກ ຢ່າງຫນ້ອຍກໍໄດ້ເຮັດຫຍັງໃຫ້ສຳເລັດ ແລະ ອາດມີປະໂຫຍດຕໍ່ຄົນອ່ານ

ມັນເປັນການຖ້າທາຍເຈົ້າ

ໃນຊີວິດຄວນທີ່ຈະມີຫຍັງທີ່ມາທ້າທາຍໃຫ້ເຮົາເຮັດແນ່ ແລ້ວຊີວິດຈະມີສີສັນຫລາຍຂຶ້ນ

ເປັນການບັນທຶກເລື່ອງລາວຂອງຊີວິດ

ໃນຊີວິດຄົນເຮົາມີຫລາຍຢ່າງຜ່ານເຂົ້າມາແລ້ວກໍຜ່ານໄປ ຖ້າເຮົາຂຽນເກັບໄວ້ມື້ນຶ່ງຖ້າເຈົ້າກັບມາເລື່ອນເພື່ອອ່ານຄືນ ມັນຈະໃຫ້ຄວາມສຸກເຈົ້າໃນອີກແບບນຶ່ງເລີຍ.

ສຸດທ້າຍນີ້ຖ້າເລີ່ມມີຄວາມຄິດຢາກຂຽນບລັອກຂຶ້ນມາກໍເລີ່ມໄດ້ເລີຍໂດຍໃຊ້ Medium.com ຄືກັບຜູ່ຂຽນກໍໄດ້ ການສະຫມັກ ແລະ ໃຊ້ບໍ່ຍາກເລີຍ ຖ້າເຈົ້າໃຊ້ເຟສບຸກເປັນແປວ່າເຈົ້າກໍໃຊ້ Medium ເປັນຄືກັນ.

ສາມາດຕິດຕາມໄດ້ເດີ :D

F.B: TedDev

Twitter: @196Nong

One clap, two clap, three clap, forty?

By clapping more or less, you can signal to us which stories really stand out.