ເພີ່ມສະມາທິ ແລະປະສິດທິພາບການເຮັດວຽກດ້ວຍ Pomodoro Technique

Thanongsine Chantakham

Follow

Feb 24, 2017 · 1 min read

ມື້ນີ້ມາແນະນຳເທັກນິກການບໍລິຫານເວລາໃນການເຮັດວຽກ ທີ່ສາມາດເຮັດໃຫ້ວຽກສຳເລັດໄວ ແລະເພີ່ມປະສິດທິພາບຫລາຍຂື້ນ ຍັງສາມາດໃຊ້ໃນການຮຽນໄດ້ນຳ ເທັກນິກນີ້ຊື່ວ່າ: Pmodoro Technique

ວິທີນີ້ຜູ່ຂຽນໄດ້ທົດລອງໃຊ້ກັບຕົວເອງມາໄດ້ຫລາຍເດືອນແລ້ວ ປະກົດວ່າໄດ້ຜົນເປັນຢ່າງດີເຫັນແບບນີ້ແລ້ວຜູ່ຂຽນກໍຢາກແບ່ງປັນໃຫ້ຄົນອື່ນຮູ້ນຳ ເລີຍຂຽນເປັນບົດຄວາມໃຫ້ອ່ານໄດ້ກັນ

Pomodoro Technique ແມ່ນຫຍັງ ?

ຄຳວ່າ pomodoro ມາຈາກພາສາອິດຕາລີແປວ່າ ຫມາກເລັ່ນ ເປັນເທັກນິກການບໍລິຫານເວລາເພື່ອເພີ່ມປະສິດທິພາບໃນການເຮັດວຽກ ໂດຍການແບ່ງວຽກອອກເປັນສ່ວນຍ່ອຍໆທີ່ໃຊ້ເວລາປະມານ 25 ນາທີເອີ້ນວ່າ 1 Pomodoro ແລ້ວຂັ້ນດ້ວຍການພັກ 5 ນາທີ ວີທີນີ້ຖືກຄິດຄົ້ນໂດຍ Francesco Cirillo ທ້າຍປີ 80 ໃນເບື້ອງຕົ້ນວິທີນີ້ຖືກໃຊ້ໃນການອອກແບບ ແລະພັັັດທະນາຊອບແວ

ມີຂັ້ນຕອນແນວໃດ ?

ສຳລັບວິທີການກໍງ່າຍໆຕາມປະຕິບັດຕາມລຸ່ມນີ້ໄດ້ເລີຍ

1. ແຕກວຽກອອກເປັນສ່ວນຍ່ອຍໆວ່າຕ້ອງເຮັດຫຍັງແນ່ເພື່ອໃຫ້ວຽກເຮົາສຳເລັດ ແລ້ວຂຽນລົງໃສ່ເຈ້ຍເຮັດເປັນ Todo List ໄວ້
   ຕົວຢ່າງ: ການຂຽນບົດຄວາມອາດຈະແບ່ງເປັນ ຫາຂໍ້ມູນ, ຂຽນເປີດຫົວເລື່ອງ, ເດີນເລື່ອງ, ສະຫລຸບເລື່ອງ, ເພີ່ມຮູບພາບປະກອບ ແລະກວດແກ້
2. ປິດກັ້ນທຸກຢ່າງທີ່ຈະເປັນການລົບກວນການເຮັດວຽກເຮົາ ເຊັ່ນ: ອິນເຕີເຮັດ ຫລືໂທລະພາບ ແລ້ວຕັ້ງເວລາປຸກໂດຍ 1 Pomodoro ປົກະຕິຈະປະມານ 25 ນາທີ
3. ເຮັດວຽກຈົນກວ່າຈະຫມົດເວລາ 25 ນາທີ ໃນຕອນນີ້ຫ້າມບໍ່ໃຫ້ມີສິ່ງໄດ້ມາລົບກວນເຮົາໄດ້ ຖ້າມີໃຫ້ເອົາໄວ້ເຮັດຕອນພັກ
4. ເມື່ອໂມງປຸກດັງຂື້ນແລ້ວກໍເອົາເຈ້ຍທີ່ເຮົາຈົດ Todo List ໃນຂັ້ນຕອນທີ່ 1 ມາຕິກໃສ່ວຽກທີ່ເຮົາເຮັດສຳເລັດແລ້ວ
5. ຫລັງຈາກນັ້ນໃຫ້ພັກປະມານ 5 ນາທີສາມາດເຮັດສິ່ງທີ່ຢາກເຮັດຕາມໃຈໄດ້ ທີ່ບໍ່ເປັນລັກສະນະຄືການເຮັດວຽກ
6. ເມື່ອເຮັດຈົນຄົບ 4 Pomodoro ແລ້ວໃຫ້ຍາວປະມານ 15–30 ນາທີແລ້ວຈຶ່ງກັບມາເຮັດວຽກຕໍ່

ມັນຊ່ວຍເຮົາແນວໃດ ?

• ການໄດ້ພັກຈະເຮັດໃຫ້ເຮົາມີພະລັງຫລາຍຂຶ້ນ ຮູ້ສຶກສົດຊື່ນພ້ອມທີ່ຈະກັບມາເຮັດວຽກຕໍ່
• ເຮົາມີສະມາທິຫລາຍຂຶ້ນ ສາມາດຕັດສິ່ງລົບກວນອອກໄປໄດ້ ວຽກກໍແລ້ວໄວ
• ຊ່ວຍເພີ່ມກຳລັງໃຈໃນການເຮັດວຽກ ເພາະແທນທີ່ຈະເຮັດວຽກຫລາຍຊົ່ວໂມງຕໍ່ເນືອງ ກໍເຫລືອພຽງແຕ່ 25 ນາທີແລ້ວກໍຢຸດພັກເຮັດສິ່ງຢາກເຮັດໄດ້
• ຊ່ວຍເລື່ອງພັດວັນປະກັນພຸ່ງໄດ້ ເພາະເຮົາແບ່ງວຽກອອກເປັນສ່ວນຍ່ອຍໆ ຄົນເຮົາມັກຫຍັງທີ່ມັນນ້ອຍໆງ່າຍໆ

ເຫມາະກັບໃຜແນ່ ?

• ນັກຂຽນ
• ນັກພັດທະນາຊອບແວ
• ນັກຮຽນ
• ນັກອອກແບບ
• ຜູ່ຈັດການ
• ນັກກົດຫມາຍ

ນອກຈາກນີ້ຄົນທີ່ເຮັດວຽກດ້ານອື່ນໆກໍສາມາດນຳໄປປະຍຸກໃຊ້ງານໄດ້ເຊັ່ນກັນ

ແນະນຳຊອບແວ

ສະລັບໃຜທີ່ບໍ່ຢາກຂຽນໃສ່ເຈ້ຍກໍຍັງມີແອັບຯໃຫ້ຕິດຕັ້ງໄດ້ ໂດຍຜູ່ຂຽນຈະແນະນຳແອັບຯທີ່ຜູ່ຂຽນໃຊ້ຢູ່ຄື Pomotodo ເຊິ່ງໄດ້ລອງໃຊ້ຫລາຍອແອັບຯແລ້ວແຕ່ມັກໂຕນີ້ຫລາຍທີ່ສຸດເພາະມັນໃຊ້ງ່າຍ ແຖມມີປະຫວັດ ແລະເສັ້ນສະແດງການເຮັດວຽກໃຫ້ນຳອີກ ສາມາດດາວໂຫລດຕາມລິ້ງນີ້ເລີຍ https://goo.gl/KaV39A

ສະຫລຸບ

ຈາກປະສົບການທີ່ຜູ່ຂຽນໃຊ້ເທັກນິກນີ້ກັບການຮຽນ ຫລືເຮັດວຽກໄດ້ປະມານ 4 ເດືອນ ໄດ້ຄົ້ນພົບວ່າ ວິທີນີ້ມັນສຸດຍອດຫລາຍ

ຈາກທີ່ຜູ່ຂຽນນັ່ງຢູ່ຫນ້າຄອມຕໍ່ເນືອງຫລາຍໆຊົ່ວໂມງກໍເຮັດໃຫ້ເມື່ອຍ ແລະປວດຕາເມື່ອໃຊ້ວິທີນີ້ ມັນຊ່ວຍແກ້ບັນຫານີ້ໄດ້ ແລະຂໍ້ດີອື່ນໆຕາມທີ່ກ່າວມາຂ້າງເທິງຈຶ່ງຢາກລອງໃຫ້ຜູ່ອ່ານໄດ້ເອົາໄປລອງໃຊ້ເບິ່ງ

ແຕ່ຂໍ້ເສຍ ມັນກໍມີຄືໃນ 25 ນາທີບາງຄົນກຳລັງມີສະມາທິເຮັດວຽກໄດ້ດີ ແຕ່ພັດຕ້ອງມາຢຸດພັກເຮັດໃຫ້ຂັດຈັງຫວະການເຮັດວຽກ ແຕ່ວິທີແກ້ຄືໃຫ້ສັງເກດວ່າ 1 Pomodoro ຂອງຕົວເຈົ້າເອງປະມານຈັກນາທີ ອາດຈະເປັນ 30 ຫລື 40 ນາທີຈຶ່ງພັກກໍໄດ້ເພາະມັນບໍ່ຕາຍຕົວສາມາດຢືດຢຸ່ນໄດ້

ອ້າງອີງ:

http://cirillocompany.de/pages/pomodoro-technique/

http://lifehacker.com/productivity-101-a-primer-to-the-pomodoro-technique-1598992730

http://www.lifehack.org/articles/productivity/the-pomodoro-technique-is-it-right-for-you.html

Related

Originally published at www.thanongsine.com on February 24, 2017.