元州邨百年樹人

訪問者：Vincent、柚子、Lesley
日期：2016年9月18日

「你知唔知婆婆今年幾多歲？」

「嗯⋯⋯七十幾八十？」

「婆婆差一年就一百歲啦！」

喧鬧公園中人來人往，婆婆坐在一旁的長椅上，旁邊正好大樹成蔭，每天如是。訪問開始時，婆婆一邊看着小朋友互相打鬧，一邊跟一個阿姨閒聊，看起來精力充沛，難以相信她已活了一世紀。

「11號車」到處走

對深水埗的認識，婆婆可說是專家。由蘇屋邨落成到清拆，直至重建完成，婆婆全都見證了，屈指一算，已是五十多年光景。隨着重建，婆婆也遷離了居住將近五十年的蘇屋邨，搬到附近的元州邨。

「咁你搬左落黎之後，生活環境覺得點呀？」

「幾好呀，咁靚地方，風涼水冷，住得幾舒服。」婆婆對自己居住多年的地方，好像十分滿意。

「咁平時有咩做呀？」

「有時朝早咪同下街坊飲茶，下晝去公園坐下，有時係附近行下，搬之前有時仲會行下圖書館，夜晚就翻屋企，等新抱煮左飯咪同下孫食下飯咁啦。」

「咁你多唔多同街坊周圍去架？你覺得生活點呀？」

「咁又唔算好多，始終食嘅野唔同，傾嘅野唔同，唔會係好夾到，何必呢？⋯⋯我同啲孫都係咁，佢地翻到黎，叫聲婆婆，我咪講聲乖，你仲想點呀？話唔得你話，講太多都無意思。幾十歲人，坐低肚餓咪食下嘢，安安定定，有時咪周圍行下，11號車行到又識返到去咪無咩所謂，又有幾千蚊生果金同健康，咪求其囉。」婆婆說到這句，像在強調生活滿足，但卻欲言又止，帶著一絲無奈。

「唔好意思，咩係11號車？」我聽過婆婆的話後抱着疑惑，硬着頭皮問。

「咪就係兩隻腳囉！」婆婆瀟灑回答。

今昔對比

「你講左而家嘅野咁多啦，你以前係做咩架？」

「我以前做旅店嘅，做過幾間。做樂思酒店，好多鬼婆，但唔識英文唔緊要，最多『喂幾多號房叫你呀』，你咪拿拿聲去囉。之後我係官涌酒店做，一做做左四十幾年，到七十幾八十歲先退休， 好開心架！」

提到年輕時工作的軼事，婆婆雙眼頓時發光，雙手不時擺動，之前話語中淡淡的無力感霎時消失。

「咁如果而家有得比你做，你做唔做呀？」

「有得做，梗係做嘢好，但係婆婆成百歲人，而家貼錢比人人地都唔請你啦，食啖飯都嫌你慢啦。年紀咁大仲做得咩，有咩用呀？咪等食、等訓，同埋⋯⋯等死。不過我係屋企有時都會自己做下嘢，自己做得到就做，唔好完全唔做呀嘛。」

「咁你又好似好滿足咁嘅？」

「有時做人唔好苛求太多，得唔到個心仲難過。」婆婆淡淡然跟我們分享她的人生道理。

無可避免的問題

即使生活安定，都未必真正過得快活。令長者活下去不難，我們真正要思考的，也許是如何令他們活得有尊嚴，繼續參與社會。這其實是你和我他朝一天都會問下一代的問題。