走一步，再走一步

訪問員: Yan 訪問日期: 2016年9月21日

兩個多月前，琛藍才跟爸爸來港定居，現在與公公、舅父、爸爸、媽媽同住石硤尾白田邨。

媽媽在西九龍做廚房工作，工時長，每星期只有一天假期，見面時間不多:
「媽媽工作好辛苦，我好想佢同爸爸可以住得好少少、舒服啲。」而一提到爸爸未來的工作，琛藍便顯得憂心忡忡:
「爸爸之前掛住幫我搵學校，耽誤咗好多搵工時間。而家爸爸或者要去新界當裝修建築工人，可能唔可以成日見面。嗯……我唔想佢做呢份工，因為睇新聞，見成日有意外發生，好驚佢有危險，所以我……真係唔想佢做。」

13歲的小女孩，腦中記掛的滿是大人的事情，那自己呢?

生活及學習上都適應了嗎?
「仲適應緊。其實講廣東話我冇問題，但文化上係唔太習慣。香港人講說話成日會夾雜英文，有時我會聽唔明，都會唔開心……學習上，內地係用簡體，所以除咗要追番上啲英文，我都仲要努力學好繁體字。」

來港第一個星期，父母已帶琛藍去申請公共圖書證。琛藍一星期最少去一次石硤尾圖書館，甚麼書都看，不想局限自己。
「爸爸媽媽話幫我申請咗圖書證，以後就靠自己去學習新知識。」
「爸爸媽媽成日教我要自己解決問題，唔提倡遇到問題就放棄。佢地話讀書排名唔重要，最緊要將學習所得銘記在心，將來可以用得著，咁就夠喇!」

在家鄉經常會去圖書館嗎?
「我住果區好少圖書館，從前會去果間已經拆咗。所以主要都係去書店買書或上網睇小說。以前最鐘意睇漫畫同動畫，嚟咗香港，我就鐘意睇國際時事，因為以前好少接觸，好新鮮。同埋，而家我會多借英文書，唔明就會上網查翻譯同發音，想盡快學好英文。」

最近讀過的哪一本書是你最喜愛的?
琛藍想了想，回答是高爾基的《童年》。小說是高爾基自傳體三部曲中的第一部，透過孩童「我」的視角，道出了作家童年時代的孤獨和艱難，以及對真理的不懈追求。琛藍笑謂:「讀起嚟心情都幾沉重。」

琛藍仍記得開學時，語文老師教導的第一篇課文《走一步，再走一步》。她很感激老師，沒有忘記老師當日的叮囑:「遇到困難，唔好放棄，要一步一步嚟，將大困難化為小困難，逐步解決。」

如果將來你有機會，會否幫助一些新移民小朋友? 琛藍眼神變得很堅定:「我會幫!絶對會幫!」

會跟他們說甚麼?
「我會問佢地適唔適應到，然後分享自己經驗，我會同佢地講，落到嚟就要下定決心，要去適應社會，唔係個社會適應你。」

將來有甚麼夢想?
「我最想做國家隊運動員，我打羽毛球幾好(靦腆地笑了笑)。不過爸爸叫我讀多啲書先，體育活動有時間就玩下，入唔入到國家隊就到時睇運氣。」

區內最想要甚麼設施或服務?
「我想要個唔使比錢就可以入去打波的體育館，因為我真係好鍾意打羽毛球!」

每天放學，琛藍都會一個人沿此路走回白田邨。四周行人不多，琛藍說環境清靜，可以讓她多思考，但太夜便不會選擇這條路，父母也會擔心。

如果，有同伴可以跟琛藍一起走路，沿途風景應該不太一樣。