點解 #火車未到站 ？因為屯馬綫分段通車，啟德受惠程度其實有限

選擇去一個新區做「開荒牛」，最大期盼當然係日後該區發展成熟能夠「坐享其成」。2013年起，啟德發展區住宅及設施相繼落成啟用。然而該區居民期待已久嘅鐵路，卻因為早期宋皇臺站發現文物、後期紅磡站擴建部分審視施工質素而導致延誤。該區私人屋苑業主亦曾舉辦網上簽名，希望沙中綫能早日通車。啟德開荒牛終於等到鐵路服務，但出油尖旺要兜大圈。市區多以站數計車費，啟德居民有機會得不償失？

本系列資料搜集及編寫時間為2019年8–10月，為方便讀者理解，除特別註明外，本文所提及之價格取自於2019年6月生效之成人八達通車費。下文以現有車費結構及過往新路綫收費表之制訂方式作出推測，實際車費或與鐵路公司最終公佈之訂價不符。

啟德前往鑽石山預測車費為非過海第一級車費$4.8，相信大家並無懸念。然而承接過往以屯馬綫九龍段收費「一站跳一級」之假設，搭多一個站去黃大仙或彩虹，預測收費已為非過海第二級車費$5.7。

參照現有收費結構，前往其它車站之預測車費如下：

啟德－鑽石山 預測車費：$4.8（非過海第一級）
啟德－樂富/黃大仙/彩虹/九龍灣 預測車費：$5.7（非過海第二級）
啟德－石硤尾/九龍塘/牛頭角/觀塘 預測車費：$7.1（非過海第三級）
啟德－油尖旺區/深水埗區/藍田/何文田/黃埔 預測車費：$8.8（非過海第四級）
啟德－顯徑/大圍 預測車費：$9.3（與現時來往大圍及鑽石山票價相同）

我哋回顧返上回討論站數收費、1996年荃灣區議會提出嘅問題：點解尖沙咀去荃灣同去觀塘，大家都係搭13個站，點解觀塘綫會平過荃灣綫。當時地鐵解釋係「雖然乘搭車站數目相同，但由於觀塘至尖沙咀的路線較為迂迴，因此收取一個較低的車費以保償較間接路線所帶來的不便。」

屯馬綫一期去到啟德止步，意味經鐵路出油尖旺的話，路線將會非常迂迴。然而路線迂迴係一回事，收唔收平啲又係另一回事。從九龍南線通車後解決車費「短貴長平」嘅方法可見，條路短咗唔會減價，反而係收平咗嘅路段不斷加價。即使等到屯馬綫全線通車，啟德出油尖旺條路短咗，但唔好意思，車費等級好大機會不作任何調整。

屯馬綫一期預計2020年1月通車，鐵路公司亦已開展屯馬綫一期嘅「試營運」。參考過往新鐵路通車安排，新路段車費表約於通車前一個月公佈。擱筆之時，鐵路公司應對屯馬綫一期車費有最終定案。一日未正式公佈新車費表，一日都仍然有轉機。

香港出現鐵路車費問題，乃在兩鐵合併時並無認真整合「車費結構」，只根據兩鐵合併時車費再不斷加加減減。我哋最大心願，係鐵路公司能夠認真對外「諮詢」而非「知會」新路段車費，最終票價比「預言車費」平同合理，長遠更應認真研究制訂一套具透明度嘅收費模式（如按距計費）。