場仗未完！寫於屯馬綫車費倡議報導見報一年後

去年昨日（27/6/2019），蘋果日報刊登第一篇屯馬綫車費倡議報導（傳送門）。今日重溫當時報導，當中有幾多預想成真？邊啲疑問仍未得到解答？

報導刊登後嘅大半個月（2019年7月），運房局宣佈屯馬綫將分段通車：馬鞍山綫由大圍經顯徑及鑽石山，延伸至啟德並合稱為「屯馬綫一期」；啟德至紅磡段則預計於2021年通車。故此，報導提到牽涉來往鑽石山及何文田，以及來往大圍及紅磡車費嘅問題於此時此刻並未浮現。上述問題尚且能迴避一時，但總唔能夠迴避一世。

報導亦提到：「考慮不改變現有收費表的收費水平為主要原則，意味現有路綫即使在屯馬綫通車後，總車程距離雖有縮短，但不會因此減價」。單從來往大圍及鑽石山車費可見，鐵路公司確實採納上述原則制訂車費，亦「不會因此減價」。響呢個原則下制訂屯馬綫一期車費，出現「紅磡去石門仲平過去顯徑」等怪象毫不出奇。過往帖文已就呢類情況作出討論，在此不贅。

鐵路公司強調：「同一路線上唔會出現短貴長平情況」。至於唔係同一條路線嘅車程組合，出現車費不平衡情況，鐵路公司則多以「牽涉轉綫」及「考慮市場情況」試圖自圓其說。隨著鐵路網絡繼續擴張，鐵路公司繼續以各種理由去迴避鐵路車費結構各種問題，日後只會導致更多不必要爭議。故此，「港鐵票價結構關注組」最終倡議方向乃「以劃一標準，全面按距計費」。

屯馬綫車費議題難以聚焦，或者係呢個題目提倡嘅時間「生不逢時」。雖則如此，我哋亦永不放棄。

在提出屯馬綫車費問題之初，香港社會正處於躁動年代，及後更出現元朗黑夜、太子警暴等場面，部份網民見到牽涉港鐵嘅討論都只會留言一句：「党鐵不了」。去到屯馬綫一期通車前後，大眾始終最關心一眾頭班車乘客，於中国武漢肺炎爆發之時敢於「除罩相見」嘅情境。結果，車費問題太複雜，加上「杯葛港鐵」，所以都係不了。

一年過去，大眾或許對鐵路（公司）觀感出現變化，甚至產生抗拒、厭惡情緒。但大眾係咪因此而忽略、否定所有牽涉車費嘅討論？車費制訂過程關乎公眾利益，而新鐵路綫車費水平亦係乘客考慮選乘鐵路嘅其中一項因素。所謂「知己知彼」，大眾更要知道制訂鐵路車費可以有幾唔合理。而屯馬綫啟德至紅磡段仍未通車，一日未公布呢個路段嘅車費，一日大家仍然有Say。所以呢場仗，根本未完！

雖則如此，自關注組受訪提及鐵路車費結構問題後，我哋樂見其他人士對呢個題目深感興趣。期望日後可與其他同路人一齊合作，希望於唔同範疇上互相補足，甚至向「全民共議」方向進發。要贏，就要一齊贏！