點解 #火車未到站 ？因為乘客以為鐵路公司全心跟你共度時艱？傻啦。

鐵路公司於2月20日聲稱與市民共度時艱，所以會透過唔同優惠或安排，令車費於今年餘下時間唔會有實際調整。真係咁荀？認真睇，其實只係應付票價機制要求。

每程3%車費扣減

2013年政府與鐵路公司首次檢討「票價調整機制」，引入數項新安排：根據「分享利潤機制」及「服務表現安排」提供車費優惠；引入「負擔能力上限」為增幅「封頂」。2017年票價調整機制第二次檢討後，透過「分享利潤機制」及「服務表現安排」提供嘅車費優惠定為「每程3%車費扣減」，亦規定呢個優惠最少要做六個月。響「分享利潤機制」及「服務表現安排」嘔出嚟舊錢唔夠做六個月？咁就要額外再貼錢了。

負擔能力上限及負擔能力折扣

所謂「負擔能力上限」即係規定「鐵路票價調整機制」調整幅度唔能夠高於上年12月「家庭入息中位數按年變動」，市民普遍稱之為「封頂機制」。

首次觸法「封頂機制」為2019年嘅車費調整，當時透過運算所得嘅調整幅度為+3.6%，而「2018年12月家庭每月收入中位數按年變動」則為+3.3%。剩低嘅0.3%本來就應該分兩年追加返，但最終政府與鐵路公司傾掂數：車費表按+3.3%幅度調整，剩低0.3%於2021年先一次過加返。

今年其實同樣觸及「負擔能力上限」界線，「2019年12月家庭每月收入中位數按年變動」為-2.48%。你以為出負數就可以減價？傻啦，票價調整機制講到明：「如中位數按年變動為負數，中位數按年變動會視為0%。」作為「推廣優惠」，2020年鐵路票價透過提供「八達通負擔能力折扣」而增加0%（或稱凍價）。

咪以為封咗頂就唔駛還，「負擔能力折扣」會於隨後兩年撤回。無論點計，全港乘客都係「欠咗港鐵每一程」。

撇除上述兩項「法定優惠」，先開始係「做好心」嘅部分

回顧2019年，鐵路公司為慶祝「四十週年」，將「每程3%車費扣減」優惠期延長至「四十星期」，折扣率亦提高至與當年車費調整幅度一樣嘅3.3%。鐵路公司叫做「做好心」嘅部分，暫時就只係得延長呢個優惠至六月底。

星期四政府將會公佈「2019年12月運輸業名義工資指數」，屆時就可以得出本年按照方程式得出「車費表」整體調整幅度。若要在調整車費表後，仍然達到「八達通乘客自2019年1月至2020年12月車費維持不變」嘅效果，鐵路公司於扣除「每程3%車費扣減」及「負擔能力折扣」後，應該仍須增撥資源。至於需要增撥幾多資源？「每程3%車費扣減」及「負擔能力折扣」將會一併計算定「折上折」咁計？反正鐵路公司已經「攞曬光環」，應該都無幾多人關心吧～

今年係立法會選舉年，少數派保皇黨近日打出「要求鐵路公司減價」嘅期票，同時要求鐵路公司檢視車費結構。敝站一年前已公開表示要檢討車費結構，甚至提交文件予立法會交通事務委員會。站長樂見少數派保皇黨對呢個題目有興趣，但建議議員提出呢個題目前先做好功課，免得被人貽笑大方。