點解 #火車未到站 ？因為除咗鐵路迷外，地產從業員同投資者同樣關心屯馬綫一期

呢幾日響Facebook講得太多屯馬綫一期車費問題，不如轉下話題講下…地產？站長於新蒲崗食飽飯行過地產舖，發現已經有門市即時張貼大海報。新鐵路除為地區帶來多一個交通選擇外，同時帶來投資機遇。

有網友話：「佢收費點計都好，港鐵係世界最佳鐵路之一係無可否認的事實」。港鐵是否位列世界最佳鐵路之一值得斟酌，但新鐵路沿線樓盤係投資者最佳選擇之一，確實係無可否認的事實。

香港嘅鐵路與地產發展之間嘅關係密不可分，鐵路公司更以對外輸出「鐵路加物業」(Railway + Property, R+P)發展模式感到自豪。每當興建新鐵路，充滿期待嘅唔止係沿線居民，仲包括一大班地產從業員同投資者，皆因更方便交通網絡能夠提升物業價值。於發展成熟嘅社區中，新鐵路蒞臨為該區帶動市區重建；而在開發中嘅新社區內，一大班「開荒牛」期待新鐵路通車後能夠讓佢哋踏入「收成期」。

地產代理對新鐵路有幾期待？睇下玻璃櫥窗張貼嘅海報就知。除咗有屯馬綫路線圖外，亦有一張海報特別強調奧運站及九龍站等西九龍新區升值潛力．從而招徠有意「入市」置業者購買鄰近啟德站一帶（啟德坊）嘅樓盤。鐵路公司亦知道啟德發展區乃各大小地產代理嘅兵家必爭之地，故安排其中兩個啟德站舖位作地產舖之用。

公開招標2019(B) — 港鐵屯馬綫一期車站內的店舖

社會科學出身嘅站長對地產行業並無太多認識，反而係會反思香港係咪一個全被地產商牽著鼻子走嘅城市、地產係咪一種霸權、香港人係咪一定要買樓、買完樓係咪要做樓奴。要上車？上火車就得...

呢幾日討論屯馬綫一期車費時，總會有朋友以「時間價值」（Value of Time），將路程縮短但無調低車費之區間嘅行為合理化。到底「計費方式」有無考慮「時間價值」呢個因素？新綫車費又有幾多唔合理地方？下回再講。