點解 #火車未到站 ？因為香港鐵路於2019年經歷無數危機，以致火車未能到站
2019年無論對香港人定係香港鐵路而言，都係充滿危機及挑戰。我哋一連兩回，回顧2019年嘅香港鐵路。
#港鐵四十週年
雖則 「港鐵」只係得12年貨仔，而「香港鐵路」歷史接近110年，鐵路公司則宣稱自己「（地鐵修正早期系統通車）四十週年」。
點都好，呢個四十週年過得非常黯淡：對外負面形象無法消除，加上2019年年中更正式冠以「党鐵」美名，而本應期望能夠「沖喜」 嘅屯馬綫今年無法通車。結果截至擱筆之時，鐵路公司網頁有關40週年內容只有品牌故事、以花展未來、「鐵仔」見工成功啦﹗及港鐵40旅「圖」大募集，對外慶祝活動只得 3月「香港花卉展覽2019」之花壇，鐵路公司亦無發售任何四十週年紀念車票。
#撞車
以前用地鐵塞車、撞車做遲到理由，大家都會得啖笑；但今年香港鐵路話畀各位乘客聽：地鐵係會撞車的。3月18日凌晨，當進行荃灣綫新訊號系統測試期間，兩列列車於中環站附近軌道相撞，事後發現肇事原因為當晚測試用嘅備用電腦系統程式出現編寫錯誤。
至於呢單事故應該定性為「與外物碰撞」，定係「受工程影響」，最後處理方法又係咪「拖返柴灣車廠」？睇怕要眾人皆醉佢獨醒嘅「鐵路公司影子」先最清楚。
至於另一單「碰撞」，則發生於美孚與荔景之間嘅軌道。
#出軌
講明先，以運輸及房屋局局局長陳帆用語，呢度所指嘅「出軌」，係「列車偏離軌道」而非「婚外情」。
東鐵於2019年下半年出現兩次出軌意外：7月中， 大學站以北有工程車出軌，以致火炭至大埔墟站嘅列車服務暫停。
至於9月中於一列東鐵列車由旺角東站駛進紅磡站時，其中三節車廂偏離路軌，車廂之間接駁位斷開。事發時正值上班時間，嚴重影響東鐵服務。
由於早前鐵路沿線出現多宗破壞事件，中央喉舌以至中國網民曾質疑「紅磡站出軌意外」乃「外國勢力背後策劃的恐怖襲擊」。然而，近日機電工程署署長薛永恆在電台節目上表示，呢單意外與外物或惡意破壞無關。
#加價
無錯，今年鐵路公司又再加價3.3%，而未來兩年仲回追加返今年未加嘅 0.3%。但鐵路公司話因為要「慶祝四十週年」，而提供四十星期「3.3%車費回贈」，從而「暫緩」加價。
但正如我哋一直所言： 帳面上（八達通）票價雖然無實質調整，甚至部分車程打咗折扣仲平過「票價調整前」嘅車費，但「加價」仍是不爭事實，正如「暫緩」不等於擱置或撤回。
#屯馬綫
紅磡站施工質素叫人擔心，專家最終結論係「加固車站結構」而無須重建。原先預計今年能夠開放嘅大圍至紅磡段，未能如期通車；而大圍至啟德段，則預計於2020年第一季通車，並命名為「屯馬綫一期」。Riders於2019年10月曾引用鐵路公司內部資訊，指出擬訂通車日期為2020年1月5日或12日。但以現時情況而言，屯馬綫一期能於上述日期通車機會甚低。最少，鐵路公司呢一刻連新綫車費表都仲未肯公佈。
參考過往新鐵路綫通車經驗，鐵路公司會於新車站啟用前約一個月對外公佈車費表，以及向立法會提交文件交代營運準備工作。如同我哋過去大半年討論屯馬綫車費問題提到，若不認真處理將會導致大量不合理車費組合出現。鐵路公司到底係扮聽唔到，定係已經諗到絕世好橋處理？真係要坐冷氣房班高層先知道了。
鐵路迷們真係好期待沙中綫早日全線通車，期待到要潛入非公眾範圍。基於安全考慮，我哋唔建議各位擅自進入未開放區域。
#環保連接系統
政府打算於兩個新發展區建立「環保連接系統」，包括啟德/九龍東及洪水橋/厦村：前者今年繼續毫無聲氣，至於後者則於今年年底展開諮詢。
政府於2019年先「發現」九龍東環保連接系統「有技術挑戰」，預計下年先會再攞出嚟諮詢。近日我哋收到讀者訊息，話不如搵區議會傾下係咪提出擱置。睇下來年政府係咪可以交出一個大眾接受、合乎成本效益嘅方案，在此我哋暫不表態。
至於洪水橋/厦村環保連接系統，政府則否定延伸現有輕鐵系統，而建議於區內設立新運輸模式服務新區。土木工程拓展署將於2020年1月4日舉辦公眾論壇，歡迎各位朋友到場發言表達意見。
#屯門南延綫
政府原訂於今年年初向立法會就屯門南延綫提交文件，但年中有傳媒引述不具名消息，指鐵路公司擬於屯門泳池增設車站並發展上蓋。屯門區議員有感未被諮詢向政府表達不滿，立法會相關議程亦被抽起。
直至年底， 民建聯立法會議員梁志祥提出質詢，查詢屯門南延綫最新進展，局長淨係話要求為中部水域人工島鐵路預留接駁位，車站位置及融資安排「無嘢講」。
#南港島綫西段
另一個今年有較多討論嘅新鐵路項目為南港島綫西段。政府於今年中向鐵路公司邀請提交南港島綫西段計劃書，地區人士踴躍表達意見並提出構想，不過部分構想就認真嚇人，例如係建議為兩座樓設立專屬出口。
#鐵路監管部門
兩鐵合併後，鐵路公司作風仿如獨立王國。但近年來鐵路公司無論於新鐵路項目管理，抑或處理車務延誤等手法，均惹來非議，並質疑政府是否無法有效監管鐵路公司運作。歸根究柢，監督鐵路運作部門「政出多門」。
行政長官林鄭月娥於2019年施政報告提到：「於監管鐵路公司方面，運輸及房屋局將跟進強化港鐵公司的企業管治，推動提升各項服務的事宜，並研究成立一個全新的部門，專責處理和監督鐵路規劃和建造事宜。」
#鐵路博物館
香港鐵路博物館被譏笑為「鐵路公園」，以展示退役車卡及舊火車站設施及用具為主，甚少涉獵鐵路技術、工程或科學範疇。康樂及文化事務署近年計劃更新香港鐵路博物館內容，亦將於日內將歷史車廂313號運送至博物館。
今年香港鐵路得上面咁多嘢講？傻啦。
其他關鍵字，留待下回詳細討論。
