點解 #火車未到站 ？因為土瓜灣睇落多咗鐵路呢個選擇，實際上有機會得不償失

過往討論中，我哋都假設屯馬綫九龍段預測車費有機會一站跳一級。放落全新車站去睇的話，情況又會如何？呢次不妨望下現時服務人口最多嘅九龍城區新建車站：土瓜灣。

本系列資料搜集及編寫時間為2019年2–4月，為方便讀者理解，除特別註明外，本文所提及之價格取自於2018年6月生效之成人八達通車費。下文以現有車費結構及過往新路綫收費表之制訂方式作出推測，實際車費或與鐵路公司最終公佈之訂價不符。

搭車快咗，收貴少少唔出奇，但收貴多多又講唔講得通？

承襲上兩篇文章屯馬綫九龍段收費「一站跳一級」之假設，土瓜灣前往下列屯馬綫車站收費推算如下：

土瓜灣－鑽石山 預測車費：$6.9（非過海第三級）
土瓜灣－啟德 預測車費：$5.5（非過海第二級）
土瓜灣－宋皇臺 預測車費：$4.6（非過海第一級）

土瓜灣－何文田 預測車費：$4.6（非過海第一級）
土瓜灣－紅磡 預測車費：$5.5（非過海第二級）
土瓜灣－尖東/尖沙咀 預測車費：$6.9（非過海第三級）

至於前往其它車站，則參照現有收費結構，推測如下：

土瓜灣－旺角/油麻地/佐敦 預測車費：$5.5（非過海第二級）
土瓜灣－旺角東/太子/深水埗 預測車費：$6.9（非過海第三級）
土瓜灣－長沙灣/荔枝角/美孚/西九龍新區 預測車費：$8.5（非過海第四級）

土瓜灣－黃大仙/彩虹 預測車費：$6.9（非過海第三級）
土瓜灣－九龍灣/牛頭角/觀塘/藍田 預測車費：$8.5（非過海第四級）

由現有車站前往屯馬綫新車站收費如何，係咩概念？以土瓜灣前往九龍灣或長沙灣為例，乘車距離分別為約5.78公里及約5.95公里，推測車費為$8.5。倒轉頭，由九龍灣或長沙灣前往區間距離相若車站（九龍灣－九龍塘，約5.11公里／長沙灣－黃大仙，約5.73公里），現時車費僅為$6.9。大家都係搭5公里鬆啲，點解去土瓜灣又有機會特別貴呢？

值得留意嘅係，沙中線項目係以「服務經營權」授予鐵路公司進行營運，而興建成本亦由公帑支付。政府代表納稅人對鐵路公司「請客食飯」之餘，鐵路公司呢個「客人」仲可以響通車後向各位攤大手板，收返高於合理水平嘅車費，真開心。另一方面，如果新鐵路通車後會扼殺其他路面交通選擇，變相焗沿線居民搭新綫，收咁貴又合理嗎？

搭鐵要轉車，仲想有點對點巴士？傻啦！

在「以鐵路為骨幹」政策下，新鐵路線通車後，現有路面交通服務無可避免出現大規模重組。部分途經土瓜灣嘅跨區路線，即使沿線居民並非直接受惠於新鐵路線之落成，但依然有被削減服務甚至取消嘅可能性。今次討論嘅係來往黃大仙/觀塘區及紅磡/土瓜灣一帶路線：14、15、11B及21。

14號來往鯉魚門邨及中港碼頭， 經觀塘道、太子道東、馬頭圍道、漆咸道及佐敦站，走線跟觀塘綫東段及屯馬綫新建路段大致相似。14號全線收費為$6.8，中港碼頭方向於彩頤花園站則設有$5.8分段收費。14號大部分路段與鐵路平行， 參考過往巴士路線重組經驗，此線被「 陰乾」機會極高。

來往平田及紅磡紅鸞道嘅15號，同樣經觀塘道、太子道東、馬頭圍道，全程收費為$6.8。對比起14，此線覆蓋遠離鐵路車站出口嘅藍田山，但觀塘至紅磡路段與鐵路走線大致相似，同樣有被大幅削減班次嘅可能性。

11B來往觀塘翠屏道及九龍城碼頭，途經觀塘道、太子道東及土瓜灣道，全程收費$5.1。對比其他來往觀塘區及土瓜灣一帶路線，11B班次較疏、價格較低，且行經遠離新鐵路線嘅「土瓜灣下路」。不過，正正就係因為佢夠「平」，假若如過往路線重組般「留貴不留平」，11B可以「係咁先」。

另一條收費較低、班次較疏嘅21號，同樣可以「RIP」。21號來往彩雲及紅磡站，行彩虹道、土瓜灣道及機利士南路，車費僅為$4.9。雖然21號走線睇落同新鐵路車站有一段距離，但只要途經地區屬於「車站500米可步行距離」內，「定義上」就算係「接近鐵路車站」。以過往巴士路線重組方式而言，21號一樣可以照「處理」。

黃大仙及觀塘區看似並非直接受惠於新鐵路通車，但上述地區有多條巴士路線，經土瓜灣前往油尖旺一帶。巴士路線重組下，呢類路線同受牽連。對遠離鐵路嘅地區如慈雲山、富山邨、四順、藍田山等，巴士服務重組影響更為明顯，需小心提防。

撇除早年馬頭圍道樓宇出現震動、扶手電梯與樓梯隔牆被削、附近樓宇沉降呢啲因素，呢個站係安全的（好似係）。馬頭圍、土瓜灣居民迎來新鐵路線時，面對「新鐵路建造」嘅樓宇結構滋擾、「新鐵路概念」下嘅市區重建，再加上「新鐵路通車」有可能收取高昂車費、以至「新鐵路通車後」嘅路面交通服務重組，種種變化是危是機？每當變幻時，最後係「石頭他朝成翡翠」，定只係「悲苦深刻藏骨髓」？