【小記者點滴】應變能力 都是由尷尬狀況訓練出來

偶爾寫寫口語,寫寫粗口,減減壓。
這幾年做記者,外出訪問總會遇到大大小小的尷尬情況,例如非被訪者爭講嘢、去影相到現場先知被訪者冇準備product、訪問完先發現成件事同PR 先前present出嚟嘅係兩件唔同嘅事等等,每次都嚇到心跳加速,唔明啲人點諗嘢,一邊心入面暗diu,一邊諗點樣解決,呢個世界好多怪人,成日都估佢哋唔到。有時將呢啲事笑話化,我又宣洩到,大家又當聽笑話,樂也融融皆大歡喜,所以諗咗兩三日,都係寫出嚟同大家分享吓。
話說,上星期五去了一個創業活動,其中一part係關於數碼娛樂分享,其中邀請咗兩個網絡平台的創辦人嚟分享心得,網絡平台A及拍片媒體B。而我前幾星期收到PR邀請,我話網絡平台A好似都已經好多人訪問,我想訪問拍片媒體B,咁可唔可以安排活動後同拍片媒體B做個獨立訪問?PR話冇問題,會幫我安排到。佢話網絡平台A同拍片媒體B會喺4:00pm上台,然後我可以5:30pm做訪問。
活動前一日,我send定將會問拍片媒體B的問題畀PR,方便佢哋準備,佢話冇問題。
好喇,到活動當日,因為同我contact的PR佢太忙,於是搵咗位小鮮肉PR嚟serve我,但佢好似乜都唔知,全部都要我問佢哋將會點安排,先答到我。我就同攝影師講,喺活動上面主力影拍片媒體B的單頭相,同埋一啲wide shot都ok了。
到5:30pm,我見大家開始chit chat,好似冇人記起要幫我拉被訪者訪問咁,於是我就捉住小鮮肉,問佢而家係點ga?說時遲又那時快,另一份報紙的大叔走過嚟,話自己本身約咗網絡平台A喺2:30pm做訪問,但因為A遲到,而活動又開始咗,所以唯有而家先做,佢哋想group埋A同B一齊出鏡,所以講完一大堆嘢,結果係想我畀佢哋訪先,叫我等多20至25分鐘。
小鮮肉喺人地面前問我介唔介意,雖然大家都係受傷者,但我估我嗰吓應該有黑面,我話:「我都冇得揀喇!」就讓咗佢哋入房訪問先。同我contact的PR終於得閒嚟搵我,瘋狂道歉安排失檔,我請他安靜一點,畀啲時間我打畀編輯睇下好唔好唔做呢個訪問,嚇下佢。期間佢不停幫手催嗰間報紙嘅人,然後我估應該15至20分鐘高速完成咗。
於是PR好快速咁帶我入房,完全唔等啲人走晒先。然後A同B都坐咗喺入面,我就先打個招呼,然後背住兩位被訪者,笑住問PR:「咁我開始訪問?」
而其實我當下打咗眼色,想示意話佢知:
Hi!我淨係約咗B訪問,可唔可以請A出去呀?
﹙我喺心入面應該有出力地講咗5次,希望佢聽到﹚
但!
佢,完全,GET唔L到呀SOSAD!!!
佢仲愉快咁回應我:「咁我唔阻你哋喇!」
然後,閂門。
嗚!係乜事呀HELP!點解就咁走9咗去咖喂hahaha
佢閂門嗰吓,我真係呆咗,喂呀!即係焗9我訪埋A啫而家!
A,我真係完全咩問題都冇準備過,真係零。
係零呀!喊出嚟!
尷L尬到PK呀YEAH!!!!!!!!!!!!!!!
唯有即席freestyle,雖然都係咁訪,但事前準備唔太足,感覺真係唔太順嘅。A問我有冇睇過佢哋啲乜乜乜,我都淡定話:「呀!係!」好彩都有啲真係睇過喳。同埋好彩A有好多被訪經驗,所以就算我唔使問太多,佢都會喺適當時候畀意見同答問題,訪問先叫順利完結。雖然有啲本身想深入問B嘅問題問唔晒,但都夠寫一篇嘅,但就真係感覺唔多好。
所以呀,我覺得同PR夾到,係一件好難得的事,當然我有遇到過信得過又安排得好好的PR,所以那些都順利變成朋友了。而這些安排得如此混亂的,真的只可一次起兩次止。
咁我唔阻你哋喇!: ) 早唞!

