《當首爾仍是叫漢城的那些年》無劇透讀後感

一晚扯哂,唔係野少-此篇內容為廣東話,敬請留意

Daisy Maris Fung
Sep 3, 2018 · 4 min read
Flickr Richy — Korea_220

我講過,我加入Medium會員係為咗等《當首爾仍是叫漢城的那些年》完哂一次過睇。由於我係果種「唔好叫我估,唔好叫我等,我會好辛苦」嘅人,所以我只可以有限度追劇或者文字。例如依傢 TBC story 田少個日常驅魔人,經已追到我個心囉囉攣,之前呀 TV Drama Queen 講 Westworld 係我極之少緊貼追劇嘅一次。所以一等到《當首爾仍是叫漢城的那些年》完結我就即刻睇啦。點知不睇猶自何,一睇停唔到,因為實在太好睇。

講讀後感之前,利申我響作者 Herr Fung 未搬去德國前係識佢本人嘅,但果個認識唔係好熟果種,基本上響某啲飯局同活動接觸吓呢個人,跟手啪一聲佢竟然帶埋老婆去德國落地生根,真係估佢唔到。更估唔到嘅係條友唔止寫 Press Release,寫文原來都有一手。所以我成日都話永遠只可以高估別人低估自己。

返番去漢城個故事,其實作者講果個年代嘅「漢城」我係去過嘅,仲要係好幾次,而且果陣時仲未有梨泰院站,我估都幾近主角響漢城果陣嘅年份,分分鐘我撞過佢哋都唔定。是以故仔入面講嘅景點,講韓國佬好粗魯推人咪以為好似依傢啲Oppa咁爽皮,我係完全投入到個故仔。於是點?於是咪仆街囉,個作者識嘅,啲景又去過,情節又陰功,所以我喊到仆街,咪講笑,由尋日扯咗成晚追故,滴咗兩次細滴(其中唔止係慘嘅,有感動位都令我感動到流淚),跟手到結局我啲眼淚真係爆咗出黎,流咗一陣先至停。

我淨係想講,天呀,係咪痴線傢,點解個天要咁呀!雖然我寫文嘅原則大多數都以盡量唔劇透為主,但既然作者響自己啲免費文都爆咗呢個故仔(咁其實都唔係故仔得哂,大家睇咗就明)大橋唔會係 happy ending,我都預咗有啲唔係咁老黎嘅嘢,但估唔到會係咁傢嘛!為咗貫徹唔劇透,又咁橋張哲生 post 咗《小甜甜》個結局,或者我以佢做例子去講吓我嘅感覺。

天意永遠係要弄人,我真係唔明,點解好哋哋又可愛嘅甜甜唔可以同佢深愛過嘅安東尼同狄理斯(我都係鍾意香港個譯名)有情人終成扣肉,個天硬係要搞啲嘢出黎:陰差陽錯、奸人所害(不過又唔係個個都有心奸嘅,例如救咗狄理斯嘅蘇珊娜搞到殘廢,雖然佢最後得到狄理斯個人但係付人出嘅代價都好大),總係搞到有遺憾,而種種嘅遺憾同巧合,造就咗不可改變嘅結局。有時候人生嘅嘢,真係唔係「無奈」兩個字可以總括,亦唔係你「努力」就可以改變一啲嘢,所以唔只係個故仔嘅表面令我喊,而係想到主角背後「果抽嘢」真係令我覺得好感觸。

個人有返咁上下大,點都會有返一兩件骷髏骨頭,一啲唔見得人嘅情事甚至心事收埋響床下底,如果你真係無,咁你好好彩。主角因為某啲原因不得不選擇(點解我會加「選擇」兩個字,係我識嘅人入面真係有人殺到埋身都唔理,由得佢嗰個唔好返嘅舊傷口爆開、爛肉要截肢都死撐自己無事)面對佢嘅過去,我只可以講佢好勇敢。如果話林亦含係惡意書寫,咁漢城作者嘅書寫除咗係佢情緒上嘅抒發以外,我其實想講我好高興透過佢嘅筆下認識咗一啲可愛嘅朋友仔,尤其係幾位女主角,無論佢哋實際嘅結局如何,我都衷心希望佢哋到最後都好似《小甜甜》結局咁大家圍埋(唔係BBQ)開開心心食野。因為甜甜「想起自己遇過嘅人都祝福他們可以健康快樂,事事順心,亦相信以後無論遇到甚麼事都能夠堅強樂觀地面對它」。

其實我順手問有無人真係有興趣討論劇情?有嘅話下次開返個會員版研究下,如何?

如果你喜歡我的文字,請幫忙按 5 次 LikeButton 化讚為賞,非常感謝!

🦄咪啲吟

Daisy Maris Fung

Written by

香港人,相信互聯網,更相信新媒體;粵文最高,甚麼都寫,不製造高品味假象。又,本 Medium 及相關之社交媒體渠道只反映個人意見,不代表任何機構立場。主網站 daisymarisfung.com 但更多 Medium exclusive

🦄咪啲吟

人開 Publication,我又開 Publication

Welcome to a place where words matter. On Medium, smart voices and original ideas take center stage - with no ads in sight. Watch
Follow all the topics you care about, and we’ll deliver the best stories for you to your homepage and inbox. Explore
Get unlimited access to the best stories on Medium — and support writers while you’re at it. Just $5/month. Upgrade