Kodrompita sonregistraĵo malkaŝas, ke Hillary Clinton konsideras sin reprezentanto de “centra-maldekstro ĝis centra-dekstro”

Foto: Justin Sullivan/Getty Images

USONO — En la kodrompita sonregistraĵo de nepublika konversacio kun donacintoj de ŝia kampanjo en Februaro, Hillary Clinton montris neaprobemon de progresemaj celoj kiel “senpaga universitato, senpaga sansistemo” kaj karakterizis sian politikvidpunkton streĉanta de la centra-maldekstro ĝis la centra-dekstro.

Clinton kontraŭdiris sin jam antaŭe pri la politiketikedoj, kiujn ŝi subtenas. Ŝi fojfoje laŭdis sin kiel lojalulon de liberalismo. Ekzemple, ŝi diris pasintan julion: “Mi estas la plej fervora subtenanto, kiam temas pri batalado por progresemaj valoroj.” Sed kelkaj monatoj poste, ŝi diris al grupo en Ohio: “Nu, oni akuzas min esti eme modera kaj centra. Mi konfesas, ke mi estas kulpa.”

La nun malkaŝitaj komentoj aperis en la formo de sonregistraĵo, ŝajne el kodrompitaj retpoŝtoj, kiuj estis publikigitaj ĉi-semajne de la Washington Free Beacon, konservativa blogo regata de respublikana komunikstrategiisto. Clinton paroladis ĉe Virginia financsubtenejo gastigata de Beatrice Welters, kiu estas eks-ambasadoro en Trinidado kaj Tobago, kaj de ŝia edzo Anthony Welters, kiu estas la ĉefa afergvida prezidanto de investkonsulta firmao fondita de la eks-Clintona helpisto Cheryl Mills.

La kontraŭanto de Clinton tiutempe, Senatano Bernie Sanders, montradis al sukcesaj programoj en Norvegio kaj Svedio, kiuj provizas senpagajn infanvartejojn, forpermeson por gepatroj kaj ŝtate subvenciatajn sansistemojn kaj universitatan edukadon, kiel politikajn projektojn, kiun li ŝatus adopti.

CLINTON: Estas grave agnoski, kio okazas dum tiu ĉi elektado. Ĉiuj, kiuj iam estis en elektado, kiujn mi konas estas tre konfuzitaj, ĉar estas unuflanke speco de popolisma, naciisma, fremdulmalama, diskriminacia aliro, pri kiu ni aŭdas tro multe de la respublikanaj kandidatoj. Kaj aliflanke, estas simple dezirego kredi, ke ni povas havi senpagan universitaton, senpagan sansistemon, ke tio, kion ni faris, ne sufiĉis kaj, ke ni simple devas pluiri, nu, ĝis Skandinavio politike, kion ajn tio signifas, kaj duono de la homoj ne scias, kion tio signifas, sed tio estas io, kion ili vere sentas. Do kiel amiko mia diris antaŭ nelonge, mi okupas spacon de la centra-maldekstro ĝis la centra-dekstro. Kaj oni ne vere havas multajn kunulojn tie. Ĉar estas malfacile, kiam oni kandidatas por iĝi prezidanto kaj oni komprenas, kiom malfacila estas la laboro — mi ne volas tropromesi. Mi ne volas diri al homoj aferojn, pri kiuj mi scias, ke ni ne povas ilin fari.

Aŭskultu tie ĉi (angle):

Clinton tiam klarigis, kial laŭ ŝi, ke tiom da demokrataj voĉdonantoj emis subteni Sanders.

CLINTON: Iuj estas tute novaj en politiko. Ili estas idoj de la Ekonomia krizo de 2008. Kaj ili loĝas en la subteretaĝoj de siaj gepatroj. Ili sentas, ke ili ricevis sian edukadon, kaj ke la laboroj haveblaj al ili tute ne estas la laboroj, kiujn ili imagis por si. Kaj ili ne vidas multe da estonteco. Mi hodiaŭ renkontiĝis kun grupo de nigraj junuloj kaj, nu, unu el la junulinoj diris, “Nu, neniu el ni sentas, ke ni havas la laboron, kiun ni vere meritas post la universitato. Kaj ni ne kredas, ke la labormerkato vere donos al ni tiom da ŝanco.” Do, tio estas pensmaniero, kiu vere influas ilian politikon. Kaj do, se oni sentas, ke oni estas komdamnita al, nu, esti kafejistino, aŭ nu, al alia laboro, kiu ne vere pagiĝas tiom multe kaj ne liĝigas kun kariero, tiukaze la ideo, ke eble, eble, vi povus esti parto de politika revolucio estas sufiĉe plaĉa. Do, mi pensas, ke ni ĉiuj vere komprenu tion kaj penu ne esti, nu, forigantoj de idealismo. Ni volas, ke homoj estu idealismaj. Ni volas, ke ili havu grandajn celojn. Sed prenu, kion ni povas atingi nun kaj provu prezenti tion kiel pli grandajn celojn.

Aŭskultu tie ĉi (angle):

Oni jam multfoje akuzis Clinton pri degna sinteno al junaj subtenantoj de Sanders. Dum Meet The Press, televidaĵo de NBC, en aprilo, Clinton diris, ke “Mi bedaŭras kelkfoje pro la junuloj”, kiuj kredas la asertojn de Sanders, — ke ŝi prenis monon de la fosilibruliga industrio.

Dum siaj komentoj, ŝi ripetis sian kredon, ke politiko estas la arto de la eblo, malakceptante la pliaspiran aliron de Sanders kaj liaj subtenantoj. “Mi volas esti tre klara pri la progreso, kiun mi kredas farebla,” ŝi diris.

Tiu ĉi artikolo estas Esperanta traduko de tiu ĉi artikolo en la novaĵretejo The Intercept. / This is an Esperanto translation of this article in the news website The Intercept.

One clap, two clap, three clap, forty?

By clapping more or less, you can signal to us which stories really stand out.