恒指1月跌6.6%，然後會點？歷史話你知。梗係買啦！
Facebook 專頁有更多短文: https://www.facebook.com/ivanliresearch
1.懶嘅，比結論你先。而家買盈富基金啦，歷史證明，渣得一年幾個月，基本上贏硬咁滯。
2. 上次講過沙士期間嘅港樓港股，今篇只講股票。今次肺炎呢，睇你由邊度計起，但目測恒指調整，已經深過沙士講嘅6.5%。當然你見有啲人又話沙士跌9%（上圖，但用MSCI，喂，蘋果同橙比？）。有啲話18%（下圖，喂，11月開始計起都得？）。個人覺得，6.5%都係比較靠譜，今次跌幅就已經高過上次。不過亦畀你睇到，真係操作，就算都係講沙士，由幾時計起，用咩去度，都有唔同結論，全部都係要判斷。另外都提過，沙士前港股已經係咁跌（所以02年11月計起咪跌18%），相當殘。今次肺炎前明顯唔係，呢個亦有關係。（後記會講多少少）
3. 仲有，Facebook Page有講，經濟學人封面指標。結果寫完兩日，上星期五（1月31號）上咗。當日一度反彈三百點，但倒跌收市。有人覺得係乏力，我覺得係止瀉。
4. 而我呢篇文係星期日（2月2號寫）。今次寫樣好簡單嘅嘢，應該唔使點拗。剛好過咗1月啦嘛，1月恒指跌幾多？照計冇人拗啦？就係跌咗1,877點。咁但當然，睇%啦，6.6%。係咪好多？都幾多。首先，股票多數係升嘅。咁一個月跌6.6%，都幾多。但量化嘛，幾多，即係幾多？
5. 好彩，係有數據嘅。第一組數據，就係盤古初開之時。1964年7月開始。到而家648個月。排一排，見到，今年1月，6.6%嘅跌幅，係排到88位。14th percentile 左右，7個月就嚟一次，係咪差？都幾差。但係咪百年一遇？少年你太年輕，平均一年都有差不多兩次。
6. BTW，648個月入面，374個月係升嘅，佔咗58%。而算術平均都升6.6%。跌嗰274個月，42%入面，算術平均係跌5.9%。可見計月份，恒指6成時間係升，仲要係升幅多過跌幅，日子有功，拉勻咁多個月，指數成長，淡友必定輸仆街，唔好信咩一半半，唔好信咩熊市長，或者跌得多過牛市
7. 好啦，你會問，其實都合理地，遠古嘅數字仲係咪可比？香港經濟增長慢咗咁多，而家又多咗咁多大陸公司，生態不能同以前比。況且其實以前股市波幅大過而家（單月跌幅最大6次都係98年前嘅事，升幅亦都有咁情況）。咁所以，我地拎第二組數據，由2010年開始。點解？避開咗大起大落嘅金融海嘯。你可以當「和平時期」
8. 「和平時期」，剛好10年，120個月。升市亦係佔多，佔咗65個月，54％，平均升4.0%。跌市呢？55個月，46%，平均跌3.9%。股票升多過跌，升幅亦多過跌幅。結論同計埋遠古都差不多，係幅度冇咁明顯。
9. 咁只計「和平時期」，今年1月呢6.6%跌幅，可以排到第13位。11% percentile 左右，一年一遇左右（舊年就已經兩次）。當然幾rare先叫rare，定算medium rare，都仲係好主觀，人腦根本判斷唔到呢啲嘢，亦都會唔同事件唔同時間唔同龍門。
10. 但戲肉嚟啦，在嗰12次一個月超過6.6%調整之後，會係點呢？咩佛多爐治好簡單，就係搵返呢12次，恒指單月大跌6.6%或以上，之後買入。持有1個月，3個月，6個月，同埋1年嘅回報。
11. 結論，都真係好明顯，咪就係，買咯！睇紅色框，恒指單月大跌6.6%或以上之後，你去買。無論係1個月，3個月，6個月，同埋1年，平均都係正回報！
12. 更開心嘅係，渣得越耐，回報越高。都係紅色框，1個月平均回報2.1%，3個月4.5%，6個月7.8%，1年10.7%。
13. 另外，綠色框，其實係贏嘅次數多，輸嘅數次少。你見呢種方法，正回報嘅差不多8–10次（留意有兩次大跌係舊年，未有1年數據），輸錢得2-3次。
14. 不過啦喎，睇藍色框見到，雖則平均係贏，贏嘅次數多，輸嘅次數少。但輸嗰時可以輸幾甘—見到1個月，3個月都好，平均跌幅仲高過平均升幅（但因為贏嘅次數多，拉均晒當然都賺）。點算？渣耐啲，去到6個月同1年，就見升幅大過跌幅（而當然贏嘅次數仲係多過輸嘅次數）
15. 咁當然，會有人質疑選擇性framing．我畀完個圖朋友睇，佢有質疑我係咪因為08啲數唔靚所以唔要。事實真係唔係，我計都冇計到，唔係計完出嚟唔靚先唔用。一開始已經係想避開咗嗰啲大上大落嘅日子。但你鍾意可以計埋08 同 09。我相信結論不變，甚至仲勁。正如你可以同埋由1964年計起都得，相信更加明顯。極速計過下07/08，就會係咁。結論都唔差太遠
16. 睇完都唔知講乜？即係，買咯。嫌行貨？除此以外？其實都塞咗好多嘢入你袋啦。你不經不覺又醒咗。
幾個技術後記：
17. 循例都講，世界如棋局局新，過去表現不代表將來．羅素隻雞畀人劏之前日日都好地地的．不過，挑，講話要跌到四位數嗰啲咪又係拎以前嚟比，話勁過沙士嘅咪又係拎過去嚟比。有冇發現呢種謬誤好常見？啲友批評你拎歷史嚟講而家冇可比性—但佢地認為嘅scenario，一樣係拎歷史講
18. 數據來源都好簡單，彭博機。其實就算冇，你上yahoo download都好易，普通家用Excel搞掂。根本就中學生都做到，與其個撚個防疫大師經濟專家上身，不如睇一次數字。唔使拗。
19. 又講返，當然呢啲就唔係科學亦唔係統計學。但呢，又唔係偽科學得晒。首先，投資呀股票嘅嘢幾時都唔係科學（邊個話你知係？）。二來，好重要嘅一點，我都想講，呢啲每日每月表現，就唔同話擲銀仔擲骰仔，唔係每次隨機的，係有相關性的。首先，講撚咗幾千次，股票係升多過跌嘅。計日數計幅度都係。第二，你跌完八九成當然升返嘅機會大，因為平咗嘛。亦都有數字做過（唔貼了），你恒指PE平嗰時買，幾年回報當然係高過PE貴嗰時買。所以本文呢類測試，就唔同話「睇下以往廿年恒指2月升幾多」，自己諗下點解。
20. 另外朋友有讚呢舊東西，個好嘅地方就係純客觀（除咗揀2010-2020，但你可以自己計埋2008，或任何年份）。唔使理任何解釋，我甚至唔理啲嘢係咪乜千年一遇，唔理係咪支爆係咪沙士係咪金融風暴，總之會跌6.6%咪大鑊嘢，然後再睇會點。我亦唔使理之後係救市，定大家信心返嚟，定防疫成功。只講數字，完全cold blooded.
Facebook 專頁有更多短文: https://www.facebook.com/ivanliresearch
