劉德華2018紅館跨年演唱會，到第14場黯然落幕。
劉德華本人吊到半空都要喊住講對唔住，成場FANS有人一齊喊。
然後，12月29日，官方宣佈29日、30日場次取消；12月30日，官方宣佈餘下場次因為劉德華本人確診流感，只可以全部取消。
紅館要過一個可能係1983年開館以嚟最寂寞嘅除夕（唔計佢裝修嗰排）。
因為我阿媽係劉華迷，所以當我搵倒錢之後，劉華一喺紅館開SHOW，我都會請阿媽睇劉華。五年前佢因為大病入院，入院前一日，我仲陪佢去數碼港睇劉華表演小強生命力嘅《風暴》。所以劉華演唱會取消，喺我屋企係一件暗湧大事。
（好煩㗎，阿妹係黎明迷，屋企有兩個天王嘅FANS同時存在於同一個空間，嗰種你唔會想面對嘅氣場真係好煩㗎…）
今次紅館跨年演唱會2018[My Love]，都好在朋友李小殘幫手搶飛，撲到兩張去慰藉我阿娘。只能講句好彩買嘅係第三場飛，當歌手年紀去到咁上下，我寧願睇頭場，喺歌手狀態仲係最好嘅時候欣賞最好嘅演出。
個人記錄：(噗浪/私河，需登入)
雖然成場都冇上一次[Unforgetable]咁好睇，但係以一個狀態唔好（有傷患、就嚟病）嘅57歲男人嚟講，[MyLove]的確係唔錯嘅演出，只係成個RUNDOWN深度欠奉，簡單講係個同FANS互相抱抱嘅演唱會。
嗰日完場，我發現喺紅館外面，有人賣緊演唱會期間影嘅明星相。
係，你冇睇錯，係賣緊明星相，而且唔止3R、4R，仲有沖曬到好大張嗰種，仲有好多人圍住嚟買。
我嗰一刻嘅感受係：劉華，你不愧係經歷過明星相年代嘅洗禮。
（可能有其他歌手／團體開SHOW嗰陣都有人賣明星相，但係我冇為意都唔定，係我OUT）
