經驗分享。技術文。以下開心share，有志出版漫畫嘅朋友可以參考吓。
多謝《鏗鏘集》，如果唔係呢集，我都唔知原來咁多香港人唔知聯合＝三中商＝中聯辦，我以為係常識。（呀Sor突然諗起可能有啲業界人士都唔知，例如我舊舊公司）
聯合貴為三中商最大發行，係點樣運作？
簡單講，咪就係「中央運作」囉。
當一本書要發行去書店（講緊三中商嗰啲），由聯合安排車隊，去出版社／印廠運走新書。
新書會運去聯合位於大埔嘅倉庫，聯合會按手上書店訂書資料分書（或者按出版社分書要求），分好每間書店落幾多書，先至再出車去各書店落貨。
呢個過程，最少需要一個星期。
好彩就一個星期，唔好彩…。嗯…。
作為漫畫出版社，真係唔係好鍾意啲書店要咁耐先至見街。
因為一般報紙檔、漫畫店，基本上係今日發俾發行，最遲第二日就會喺報紙檔同漫畫店見倒有得賣。
以發行商嘅功能嚟講，聯合嘅機動性，遠遠唔及香港嘅報紙發行商。
漫畫嘅讀者非常緊張出版日期，喺出版日一定會趕去漫畫店、報紙檔搶最新嗰期漫畫。遇倒好賣嘅期數，漫畫店過兩三日賣晒就要向出版社補書。
（咁當然呢啲CASE喺十年來發生嘅次數，係十隻手指數得晒，漫畫銷量仆直咗十幾年。以上講嘅好賣情況，咪又係《龍珠》《入樽》嗰啲BRAND，《龍珠超》第1期的確係出版一星期要再版。）
當書店要遲成個星期先至可以上架，代表會去書店買漫畫嘅客戶，其實係因為喺報紙檔、漫畫店買唔倒書，先至會去書店搵，書店並唔係第一選擇。可以話，呢個「中央運作」嘅安排，令書店自己斬自己客路。
報紙檔都係「中央運作」，但係佢哋可以做到一日之內發行。
我到而家都唔明，點解聯合要搞咁耐。
(好重要，所以放大啲)
報紙檔成千個銷售點，都可以即日出版，點解三中商得嗰幾十個銷售點，反而要搞咁＿耐？
