又係講觀音，唔好意思會悶親你。
某日見到陶才子呢篇講述疑似「巴黎聖母院重建籌款騙案」事件，覺得有啲心酸。
捐款俾宗教建築物之後喺入面有自己個名，呢種捐款做法由來以久（捐俾熊本城嘅話，城主都有得你做），但係現代中國人俾太多同胞以祖宗之名呃過，難免心靈受創而變得唔信人，懶理你係聖母定觀音，精明地又踢爆騙徒。
重建籌款用咩方法最好？
聽聞好耐以前，教會係向貴族爵爺同埋啲商家埋手，一次過向有錢佬募集一大筆善款，而唔係「歡樂滿東華式」咁向貧窮小市民籌嘅。
呢一刻已經向有錢佬到籌到10億歐元，睇吓有錢佬為宗教同文化同藝術，幾咁出心出力吖。（曲）
日本教派都有籌款方法
而呢件事令我諗起早排浴佛節［註1］，日本真言宗豐山派總陀主田代弘興［註2］帶埋成班高僧嚟到主持灌頂同浴佛儀式，喺之後由大僧正星野英紀［註3］主持咗一個名為「長谷寺觀音的秘密」嘅講座，吸引咗好多善信同佛學嘅學生去聽。
呢件事點會關我事呢？
因為我負責即時傳譯囉。
（多謝星野老師手下留情，內容淺白又FUNNY，事前仲猛咁話「我講嘢好簡單㗎咋，定啲嚟」，果然係好簡單，即明。）
成個講座一個鐘頭，主要都係旅遊特輯會講嘅內容，用POWER POINT整埋短動畫，講解長谷寺嘅風景、花卉、觀音像嘅來歷等等。
講真嘅，去過奈良嘅長谷寺［註4］嘅話，就會同意係一個好地方，好值得去完再去。可惜嗰度因為原本係修行地，係近年先至由寺內高僧開拓出「賞花聖地」嘅新方向，所以交通實在非常唔方便，最好預多一晚留宿喺附近。圍住長寺谷嘅地區有平靚正舊式民宿，我以前住嘅一間舊到個電視仲係用天線，成個環境都好似停留喺幾廿年前咁，堅係洗滌心靈。
真言宗豐山派總本山 長谷寺網站：（網站係有日／英／中文）
http://www.hasedera.or.jp/
吹遠咗。講番重點。
個講座介紹完長谷寺嘅觀音像，喺最後10分鐘，個POWER POINT畫面由風光明媚嘅長谷寺，變咗FOCUS寺內建築物慘遭風吹雨打年久失修後嘅主堂、講堂，上面嘅瓦啦橫樑啦之類，都因為幾百年嚟遮風擋雨而受到浸蝕。於是宗派決定，喺2019年4月開始為期22年嘅修葺工程，整個工程需要64億YEN。
「講緊64億YEN呀哪有錢，所以我哋開展咗籌款運動。」星野老師如是說。
64億YEN又唔係全部要籌番嚟嘅，因為長谷寺嘅本堂係國寶，所以日本政府會負責一半維修費，即係要籌32億YEN。
不過，阿高僧，你以為一個鐘頭講座，求其介紹吓日本風情畫，就可以令人捐錢去一個三九唔識七嘅寺院？
高僧當然冇咁蠢。
又唔係CCTV同中央政府嘅世紀廣告套餐。［註5］
其實高僧經已同香港分陀講明晒日本總陀嘅情況，喺嚟香港浴佛節之前，香港分陀就舉手話要第一個捐錢，而且個金額唔低。
換言之，按長谷寺嘅CASE睇番，籌款重建／維修，最好方法當然係以宗派之名，向其他分陀收善款。咁多個分陀，個個捐少少，好快到target。
呢個越洋收善款行為，轉番channel，可以稱為「化緣」［註6］，又或者，我私下戲稱「收保護費」［註7］。
我為真言宗豊山派做咗十年傳譯，今年最有新意，過嚟香港傳經兼化緣。咁當然，化緣都要化得有誠意，講座、傳經、灌頂呢啲做到足，加個有誠意嘅POWER POINT，咁咪易啲開心見誠講囉。
我相信巴黎聖母院個CASE都一樣，天主教有咁多教會分陀，點會唔向分陀出手？
寫到嚟呢度，其實都係想幫手宣揚吓，去開奈良嘅話，唔止係去俾鹿餵，其實長谷寺都唔錯㗎，順便添吓香油錢，當係為維修費盡吓力。
又係時候旅遊推介～
★長谷寺係賞花勝地
我個人對花冇咩興趣，只萌長谷寺嘅木建築。不過聽講話呢間寺院一直都係賞牡丹嘅勝地，仲有繡球花 (日本花名係紫陽花)、櫻花，鍾意睇花嘅人可以去。
★長谷寺嘅木建築講堂係國寶
呢個係我最愛長谷寺嘅地方，國寶級講堂有500年歷史，用嚟學經頌經。全木製結構相當穩紮穩打，500年來風雨交加都冇事，只係因為啲屋頂屋簷開始有破損，逼住要去維修。
「一個二個踢都唔郁，唔通等本堂冧咗先整咩，咪由我呢個老嘢開聲話要維修囉！」星野老師如是說。
訓導主任果然老咗都好台型。
★全日本最高木製觀音像
長谷寺最出名嘅，係供奉「十一面觀音像」，木製嘅造像高10.18米，即係大約5層樓咁高。如果你由下面用相機影上去，正常係攞唔晒全個木像嘅（咁當然有專業人士例外）。
雖然長谷寺有1300年歷史，但係呢個十一面觀音像就冇咁耐歷史，都係幾百年左右。而且，現存嘅木像係第7代，即係已經重新雕咗7次。
點解雕咗7次？
因為呢尊十一面觀音像喺歷史上燒過6次，每次燒完之後都會馬上重新雕過。
照計燒完就唔會有人信佢好靈驗吖，但係每燒完一次反而仲有更多人嚟拜，好似話係善信認為咁快可以雕好係證明觀音靈驗。你估雕木像真係咁易？而且10米高喎！仲要喺古代雕木像，難度真係好高。諗諗吓又有道理。
無啦啦觀音都被人燒？
原來係有故仔。
話說古代貴族女子好鬼信呢尊觀音像，尤其係失戀嗰陣，就一定走去同觀音訴苦，當正觀音係白姐姐一樣。又講又喊，喊到攰晒，又夜咯，返唔到屋企，咪喺觀音旁邊過一晚夜囉。喺觀音像旁邊都算安全吖嘛。
你知啦，啲貴族千金唔凍得㗎，做下人嘅當然會點火圍爐取暖啦。可能係貴族千金怕黑啦，又或者山上真係凍，總之啲火越點越多，唔覺意燒着觀音腳，就咁成尊觀音像燒咗。啲貴族千金仲可能慘到失戀變咗失救。
星野老師咁講，我都係當故仔咁聽啦。古時風高物燥，防火意識低係其中一個原因。長谷寺位於山上，風乘火勢，難以救火都係另一個原因。
如果大家有機會去長谷寺，記住摸摸觀音腳趾公，觀音姐姐會保佑你。
講咗咁多觀音，回吓帶：
［註1］4月8日
我知你想講咩，浴佛節係農曆4月8日吖嘛，邊有咁快？
因為日本行新曆吖嘛，咁咪夾硬要令佛誕變做新曆囉。
BTW，２千幾年前印度係用咩曆法？
［註2］田代弘興
以正視聽，成個TITLE係：「日本真言宗豊山派管長總本山長谷寺化主大司教大僧正田代弘興猊下」，我會簡稱做總陀主。
總陀主地位太高，我呢啲小薯見過佢一兩次，只係覺得佢係好好人嘅老人家，今年79歲高齡。
上網Search佢個名，會發現日本新聞都會報導佢嘅言論，佢本人都有好多佛學著作。
［註3］星野英紀
佢個TITLE短啲，係「日本真言宗豊山派宗務總長星野英紀台下」。
星野老師退休之前堅係老師，訓導嗰隻，但係份人極度和藹同好玩得、食得同瞓得，真心佩服。
［註4］真言宗長谷寺
日本有兩間長谷寺，一間係淨土宗所屬，位於神奈川縣嘅鐮倉；另一間就係我講緊嘅呢間，位於奈良縣櫻井市，屬於真言宗，兩間都話自己有1300年歷史，大家都話自己供奉嘅係十一面觀音像。大家都係觀音，拜同一個大佬，不要分那麼細。
［註5］國家級廣告套餐
呢單嘢都係上個月親身體驗過，有時間再寫出嚟。
不過，可能商界好多人都被召喚過去JOIN國家級廣告套餐。
［註6］化緣
化緣嘅緣，原意係與有緣人結緣，順便Ｒ吓啲飯餸或盤川咁，好似係。史上化緣化得最多又最富貴嘅和尚，當然係玄奘三藏。喺佢自己嘅著作《大唐西域記》記載，佢去過咁多國家，化親嘅緣都係啲國王級嘅緣。
［註7］
香港分陀喺日本長谷寺真係有地方住，分陀信徒去到係唔駛錢入住，不過前提係你去嘅目的堅係修行，唔係吃喝玩樂同賞花。
個人BLOGss~
☆伊死的漫畫特區 （講漫畫、讚漫畫）
