「荷里活真人電影版真係超大鑊。」
其實呢個係舊聞,嚟自久保帶人上TBS電台節目『サンドウィッチマンの週刊ラジオジャンプ』嘅錄音,第20、21回。因為《BLEACH》真人版就嚟上畫,作者本人又突然有新作,我就抽起條筋重聽一次佢嘅爆料節目,有部份係講到《BLEACH》日本真人電影版vs荷里活真人電影版,同埋業界內幕,都幾值得俾多啲人知。
電台節目連結(節目已在官網下架,可以去Youtube聽):
★第20回 ★ 第21回 ★
提起久保帶人,除咗諗起長壽漫畫《BLEACH》(睇晒74期嘅人舉手!哦,明晒…),佢仲有好多奇怪傳聞。例如久唔久就有人傳佢已經死咗,而最多人傳嘅,就係曾經有個疑似同佢同名同姓(明明係筆名)嘅AV男優,搞到喺網上SEARCH「久保帶人」,就有個戴黑超嘅阿叔,一時之間喺網上傳到全日本漫迷都知,超陰功。
講番個電台節目,佢喺節目入面真係盡訴心中情,連載15年《BLEACH》生涯,令佢擠身最賺錢漫畫家行列,但係同時佢都積咗一堆怨氣,大把料爆。聽完個節目,我個人係愛上久保帶人嘅Personality,唔理你有冇睇佢嘅作品,佢個人嘅故事絕對精彩。
1. 連責任編輯都睇我唔起
[事件一]
第一次有JUMP編輯跟,久保帶人份人又幾怕生保,於是同編輯保持距離,同時又有啲疑惑:「編輯嚟收稿,通常都會帶啲慰勞品嚟俾漫畫家㗎喎?」
於是,有一次,佢就直接問個編輯:「點解個個漫畫家嘅編輯都對佢哋咁好,唯獨我冇任何慰勞品?」
好嘢,攤咗牌,下一次,個編輯都算識做,送咗某套久保帶人鍾意嘅作品DVD去慰勞。就係咁,佢哋兩個就FRIEND咗,以後個編輯仲會成日買久保帶人鍾意嘅蛋糕先至收稿。(最愛栗子蛋糕)
我補充吓,喺日本,責任編輯上門去收稿,絕對唔可以兩手空空,帶嘢食又好、玩具又好咩都好,都要帶啲嘢去送俾漫畫家,以示尊重。
咩話?
「買嘢可唔可以claim番錢?」
你新嚟㗎?呢啲嘢都要問。
如果個漫畫家啲書賣得,買咩claim咩又有咩所謂。如果個漫畫家坐冷板櫈呢?唔…你都係快啲喺新人獎搵個潛力股買定保險啦。