一連三日深圳車展，我以某間日系汽車美容公司嘅隨行翻譯身份北上。做過N次唔同活動／團體嘅隨行翻譯，今次係第一次有其他行家成日講嘅「陪客揼骨」呢種體驗。（咩呀，正骨嚟㗎。心邪！深圳都有正骨嘅。）
講真嘅，我係寧願跑圈做GYM都唔揼骨。以前試過一次舊公司旗下業務有按摩，喺動漫節之後用老總特權+員工價去慰勞自己同伙記，但係第一次揼骨嘅體驗，係我嗌到V哇鬼叫，失禮街坊。
所以當成團人話帶住我要照顧嘅日本汽車美容導師去揼骨，我有一秒想舉手投降。我有掙扎過，問「可唔可以淨按腳？」，因為活動企咗咁耐堅係攰。不過偏偏阿導師係個極度十分熱愛按摩嘅日本人，老師話做全身，大家當然「尊師重道」，開開心心跟住大佬去。
呢間骨場係其中一位香港成員介紹，位於深圳一間四星酒店嘅五樓。網上可以用團購價288人仔嘆原價500幾蚊嘅全身推油按摩，連宵夜自助餐。聽落好抵？但原來每位技師都要獨立俾小費，由30～80人仔不等。而且啲自助餐…我都係返香港食魚蛋粉算。
★本篇建議與《銅記鬼佬薩魯曼》一同食用
推油之前沖涼、搓背、桑拿、浸浴，其實對我嚟講，到呢度就ＯＫ，但係個PLAN係全身推油中醫式療養按摩，唯有繼續入房等個中醫式療養按摩師。
間骨場叫做「濟州島SPA」，但係又玩中式嘢，衰在深圳冇商品說明條例，咁都俾佢打開門搵笨。當然，一個韓妹、韓仔都冇，連個所謂「中醫式療養按摩師」，都係嚟自中國廣西嘅「女按摩師」。後來聽香港啲員工話，叫「骨妹」都冇問題。
問題嚟喇。
我揼得骨少，原來啲骨妹咁多嘢講㗎咩？
按足個半鐘，佢就講足個半鐘，仲要成日問我嘢。
WELL，講咗冇耐我就冇再講嘢，由得骨妹自己盡訴心中情，然後繼續趴喺度忍住痛，一邊玩手機同用KINDLE睇書。
