上文提要（其實同呢篇文無關）。
估唔到阿公呢篇居然咁多人睇同留言，睇人仆街果然最開心。要寫阿公啲神奇事蹟，寫多幾篇都得，不過人都死咗，點到即止、見好就收。寫多一個故事（未必喺其他地方啱寫）：
話說當年大舅父想考入土瓜灣鄧鏡波小學，偏偏佢讀書又麻麻。咁啱阿公識學校負責影印試卷嗰個校工，於是拍膊頭拎咗個問題同答案返嚟（留意，拎埋答案 — 因為屋企好似冇人讀過書，淨係得份卷冇咩用）。之前有傳佢直頭識鄧鏡波校長／神父，直接拎到份卷，後尾我向當時未死嘅阿公求證，佢好撚自豪話係識校工所以拎到份卷同答案。隔咗四五十年仲懶威咁，十足十啲人六十歲仲吹噓自己讀咩幼稚園。
結果？有答案都入唔到就拎去堆填算啦。舅父成功考入鄧鏡波。
不過，舅父讀咗一年就自己主動輟學（定畀人踢咗出校）。條友癲到掛住彈波子，唔見咗個書包，返到屋企佢阿媽（我阿婆）問佢，佢先發現唔見咗個書包！
_________________
1.我喺重慶大廈「首都酒樓夜總會」擺滿月酒，而家重慶站二樓至四樓。咁啱徐小鳳喺首都登台，佢仲唱咗首歌畀我聽（作者啱啱先喺上面串鳩人拎幼椎園啲嘢嚟威威）。無人講返畀我知小鳳姐唱咩，希望係《喜氣洋洋》。神奇地滿月酒阿爸冇出現，因為佢喺嚟酒樓嘅途中撩鳩流浪狗畀狗咬……我老竇真係好撚神奇。
值得留意嘅係，上圖彌敦道重慶門口曾經可以右轉入北京道。
往後住喺尖沙咀嘅幾十年時間，我遇過好多明星。另外亦有唔少電影喺尖沙咀取景，每次睇都有非常熟悉、親切嘅感覺。
_________________
2. 有次喺屋企樓下撞到郭富城拍電視劇。當年超級超級中意郭富城，每隻碟都有買，咩《狂野之城》螢光版（隻碟唔發光，唔知咩叫螢光）、好貴但得兩首歌嘅《你是我的一切》EP、幾十蚊嗰張郭富城着泳衣嘅Yes!card，全部都有。到今時今日，扮佢唱歌依然扮得超似。
