朋友 OL 提議行山，幫對新買的行山鞋開齋，預設條件係條路必須易行，冇大上大落，最重要係可以瞓到朝早 10 點，再施施然去起步點。No problem. 去大埔滘林徑啦！男女老幼都應付到，之後坐巴士去大埔墟食嘢超方便。
行山路線：
松仔園巴士站 ＞大埔滘自然護理區 ＞大埔滘林徑（藍路） ＞松仔園巴士站
大埔滘林徑 (Tai Po Kau Forest Walk) 喺大埔滘自然護理區入面。林徑有四條唔同長度的路徑：紅路（ 3 公里）、藍路（ 4 公里）、啡路（ 7 公里）同黃路（ 10 公里），官方估計步行時間由最短的 45 分鐘至最長的 3.5 小時。紅、藍兩路符合晒 OL 的要求，兩條路的基本走線係一樣，只係藍路會行得高啲、長啲，官方話需時 75分鐘。以為 OL 會揀紅路，點知佢嫌 45 分鐘太短，腳投藍路。
喺大埔滘自然護理區入口，沿馬路上斜，經過大埔滘自然教育徑不入，專心繼續上斜，直至見到大埔滘自然護理區個牌，代表到咗大埔滘林徑入口，亦係四色路徑的共用起點。起步後，沿路有清晰標示引路，絕對唔使擔心迷路。
藍路以泥石路為主，間中需要行石級，尾段接回馬路落斜，經過野外研習園（冇入去睇過），返抵大埔滘自然護理區入口，等同行咗一個大圈。大多數時間喺林蔭下行走，唔怕會曬黑，沿路以觀賞花草樹木為主，有機會見到平時少見的雀仔，聽吓佢哋唱歌。
行吓，停吓，用咗超出預算的時間行晒全程，不過真係行得好輕鬆，至少平日唔多運動的 OL 全程冇投訴。最後，行去松仔園 (Tsung Tsai Yuen)巴士站，坐幾分鐘巴士過大埔墟食魚蛋河、炸豬扒同泰國嘢，買埋樹記腐竹返屋企煲糖水，身心大滿足喔。
*** *** ***
行山貼士：
- 大埔滘自然護理區常見有狗主帶同愛犬嚟行山，怕狗的朋友要留意。
- 四色林徑初段會經過一個溪澗區，家長勿讓小朋友單獨在附近遊走。
- 沿路冇補給點，自備足夠糧水；路徑初段有野餐地點及公廁。
- 勿採摘野菇。夏天嚟行，必須做好防蚊措施。
- 藍路的最高位，連接落山馬路，呢度有一個木涼亭，涼亭後方有靚靚山路下行去東鐵大埔墟站，途經龍成堡，沿山塘路落山抵達新達廣場，廣場旁邊就係大埔墟站。
- 藍路中途有小徑轉行紅路，俾機會你縮短行程。
- 完成行程時間：約 2.5 小時
🚌 🚏 🚌 🚏 🚌 🚏 🚌 🚏 🚌 🚏
交通貼士：
- 去程：巴士 72, 72A, 73A, 74A 或小巴 28K，喺松仔園站落車。步行唔使 1 分鐘，就到達大埔滘自然護理區的上斜馬路入口。
- 去大埔墟開餐：喺松仔園巴士站（往大埔方向）坐上述的巴士或小巴，喺廣福道站落車。
