溝通 101：十大禁語（一）「第時你就明」
話說早輪喺啲 group 度同人傾偈見到有人講類似嘅嘢，咩「第時你就明」、「你未遇到啫」、「大個你就知架啦」，個人就有少少 triggered。但作為禮貌大使嘅我又費事喺人哋傾緊計嘅時候打斷人，所以就都係寫篇文算，笑。
我諗文題呢幾句嘢對唔少人嚟講都可以話係耳熟能詳。應該每個人唔多唔少都有聽過人咁樣講過，唔理係長輩定係朋友，甚至係自己就有咁同人講過。呢個句式常見於俾建議人嘅時候，特別係講緊啲人生經歷時，唔少長輩／家長都會對小朋友或者後輩講咁上下嘅嘢。在我而言，呢幾句嘢絕對係十大難聽過粗口嘅句式嚟，基本上唔理咩時候都唔應該咁樣講。（我覺得啦~）
呢個句式有幾個問題，先舉個最典型嘅例子再慢慢講：
「幾時揾個男仔結婚啊？」
「冇揾喎，我自己一個仲開心啦。」
「點同呢？點都要有個人成家立室陪下嘅。」
「唔會啦，我覺得自己一個人生活自由自在仲好。」
「你而家仲細梗係咁講啦，第時你就明㗎啦。」
1. 無視理念分歧
呢幾句嘢背後隱含一個核心訊息「小朋友你入世未深未明白個道理啊。」個重點係個「未」字。佢係假定咗佢講嘅嘢就係世界萬物嘅必然走向，冇其他可能㗎啦；而你就係處於早啲嘅階段，所以你咪唔明囉。講嘅人好理所當然咁將所有潛在嘅人生理念不同當係對方人生經驗不足，再上而下咁「塞錢入對方袋」。喺上面個例子，佢哋係打從心底裏相信婚姻係人生必經嘅階段，每個人去到咁上下年紀就應該成家立室，再下一步自然就係生返個小朋友俾佢哋玩下啦。留意返，我唔係反對呢種價值觀，每個人都有決定佢人生嘅權利；我反對嘅係將呢種價值觀奉作金科玉律。結婚與否唔一定係人生階段嘅唔同，更加可以係人生理念嘅唔同，其他嘅理念亦然。而「第時你就明」呢啲咁嘅說話就係大石砸死蟹咁樣將「唔認同」當係「唔明」，再將自己放喺高地去指點其他人。其實就係換咗樣嘅打稻草人，老實講，淨係呢樣都死罪啦。
2. 放棄溝通
又，我姑且先當第一個 point 唔成立，原來對方真係同你嘅人生理念一樣／單純唔明而唔係唔認同，呢個句式都係有問題嘅：因為佢係放棄／阻止咗同對方嘅進一步溝通。文題呢啲說話通常係用於一段對話嘅結尾，或者話，佢係宣告緊一段對話嘅結尾，基本上講完就終結咗成個討論，你冇得再接落去㗎啦。當佢講完呢句嘢，你之後再講乜佢都可以重覆呢句「你第時就明㗎啦」，好似啲 RPG 入面講哂劇情線索嘅 NPC 咁。所謂「你第時就明」就係講緊「你而家唔明」，更加係講緊「你而家唔會明」。佢否定咗你而家明嘅可能性，阻止咗任何進一步嘅討論，變相啫係同對方講：「你而家都唔明，有咩好傾啫。」用返上面個例子，點解要揾個人成家立室先？其實可以係有理據㗎嘛。點解唔解釋而係直接要人接受個結論，仲要令對方唔好話反駁，係連回應嘅餘地都冇。成件事就係「我袋錢入你袋咋。」咁樣，淨係睇字都覺得難頂啊。明明建議人就係希望對方變好（當係啦，我知有好多例外），「講」係個方法嚟㗎。你講完又唔解釋又唔說服人，咁不如唔好講算啦。
3. 攞尾彩
呢個其實唔係句嘢本身嘅問題，而係啲人用嘅情境。有陣時呢個句式最乞人憎嘅位未必係佢無視其他價值觀存在，亦未必係佢唔嘗試同你溝通解釋，而係大家溝通完之後佢唔夠你講跟住就掟低呢一句嘢。唔夠人講就偃旗息鼓啦，死都要拿返紮沙，成件事真係極其嘔心。仲要呢個句式基本上係地位高對地位低嘅人講（起碼講嘅人係覺得自己有 privilege。），特別多見於長輩對後輩，聽嘅人先天就輸蝕，好難反駁對方，變咗自己谷住道氣，真係諗起都辛苦。
4. 無用廢話
呢樣應該係最大嘅問題。我就當講嗰個人真係啱，對方真係同你價值觀走向一樣而佢而家的確唔會明個道理。咁嘅情況下，「第時就明」可能係客觀描述。但咁跟住呢？句嘢個意義喺邊？如果佢真係第時就明，咁你講唔講呢句佢都會明㗎啦，仲點解要特登咁講？啫係你唔會無啦啦同朋友講「聽日太陽由東邊升起。」㗎嘛。你咁樣講想表達啲咩先？一句嘢係啱唔代表佢有意義，或者話，一句嘢 semantics 上冇問題並唔代表佢 pragmatics 上冇問題㗎嘛。（利申：唔熟語言學，但覺得呢兩個字好正，歡迎指正～）對於聽嘅人嚟講，呢句嘢就好似廢話咁，而俾佢哋個感覺好易就會 fall into 2 或者 3 。既然係咁，不如都係收返埋佢，講嘅人又多啖氣暖肚，聽嘅人又唔洗心煩，雙贏啊！
當然啦，指出問題而唔提出改善方法／方向係壞習慣嚟，會俾人覺得「站着說話不腰疼」。（話說口語大家會點講？大隻講？得把口？）我就講下我覺得應該點表達啦，亦歡迎大家講下自己睇法。
1. 對方冇問你意見就最好唔好講
喺諗點講之前要諗嘅其實係要唔要講。「先問應否，再問如何」應該係做任何嘢嘅原則嚟。好為人師唔知稱唔稱得上係天性，但的確係唔少人嘅通病，甚至我呢篇文都有呢個傾向。但我寫文大家冇興趣可以唔睇，但喺現實生活中俾人「指點」就好難避走。所以喺俾建議人之前首先要諗清楚對方係咪真係想／需要人俾意見佢。除非同對方真係好熟，否則對方冇問嘅話最好都係唔好隨意發表偉論啦；而如果你自覺同對方真係好熟嘅，咁我唯有希望你冇感覺錯啦，笑。
2. 解釋你嘅睇法同時唔好否定對方
但凡俾意見人就應該清晰咁解說返你嘅諗法俾人知。你嘅目的應該係令對方接受，咁又有咩理由用啲對方反感嘅方法。同時，正如上面所講，要分清對方係唔明白你講嘅嘢定係明白不過唔認同，尊重返對方作為獨立個體嘅思考。如果你可以唔認同佢嘅諗法，咁佢都可以唔認同你㗎啫。做人都係 open-minded 啲好，做唔到和而不同咪不相為謀囉，黨同都唔一定要伐異嘅。
3. 用呢句嚟開頭而非結尾
好啦你覺得真係應該/可以講而你又堅持想用呢句嘢（which is weird），用呢句嚟開頭。當佢係一個引子咁去帶出你想講嘅嘢。
「點解你話唔好讀文科嘅？」
「第時你就明㗎啦。原來讀完出到嚟真係會乞食㗎！揾工揾咗十年都揾唔到啊。」
利申：以上為設計對白，讀文科，唔認同。
留有餘地俾聽嘅人可以回應其實真係溝通時嘅基本禮貌嚟。當然啦，有啲人又真係唔係諗住同人溝通，淨係想發表自己嘅偉論嘅。對住呢啲人就真係難啲和而不同，都係你有你嘅生活我有我嘅忙碌算啦。
小結
我諗講到尾其實要留意嘅都只係兩樣嘢：自己講一句嘢時係咩心態？對方聽到又會有咩感受？如果諗得清楚其實就會避免咗好多問題發生。當然啦，有時當局者迷，講嗰下冇為意都真係在所難免，唯有時刻警醒自己又或事後反思啦。
最後想回應下啲會咁講嘅人：你講嘅嘢第時我明唔明我唔知，但我而家就明你咁樣講嘢真係唔太好，笑。好啦，講笑啫。我相信有唔少長輩都真係出於拳拳關愛之意先咁講，但如果佢哋嘅表達方式再好啲，咁就更加好啦。所以我其中一個目標就係第時要做到一個講嘢有道理得嚟又入耳嘅長輩。
後記
話說呢篇野本身諗住求其寫下點知寫寫下越嚟越長，又越拖越耐咁，好在都叫寫完咗。又話說其實所謂十大禁語係虛數嚟，可能有多，可能有少，好似煎釀三寶咁。諗到就寫多啲，諗唔到就寫少啲，再算啦。其實就仲諗咗一兩個嘅，不過唔知幾時寫：我仲有篇講書展嘅文寫緊，咁你就知我拖延有幾嚴重啦，笑。
