寫一首關於你的詩 — — 向招聘嘅公司求職的情詩。
係架，求職如求偶，點樣表達自己嘅誠意、興趣、才華同能力，就主宰成敗得失。求戀期可以係一夜之間嘅短跑，亦可以係數以年計嘅馬拉松，但求職者擁有嘅，就係一紙履歷，或者多一張 Cover Letter 。正所謂「朝中有人好辦事，朝中冇人靠本事」，履歷 (Curriculum Vitae / CV / Resume) 就係向公司索取面試入場券嘅申請書。
不過，自古以來，人類總係要重複相同嘅錯誤， 肉酸嘅 CV 多不勝數，「一字錯，滿盤皆六索」 (係，我見到有兩個 typo) 嘅 CV 亦比比皆是。亦因為咁，專上學府由傳授知識嘅殿堂，因應現實需要而提供埋幫人執 CV 嘅服務；有投資銀行高層喺商學院開班授徒教人建立專業形象，其中包括執靚個 LinkedIn Profile (你畀五舊水我同你執到風生水起好過啦，用兩個 credit 即係幾千蚊讀埋啲咁嘢？) 。既然係咁，置記又不妨同大家分享下一張好嘅履歷，應該有啲乜、冇啲乜。
簡單講，係三有、三冇。三有：有結構、有取捨、有針對性。三冇：冇倒模、冇失實、冇基本錯誤。
有結構
見過太多 CV ，懶惰地將過往嘅工作經驗同學歷撻成一塊就當係一份履歷。講真，你唔攞盆水照下自己個樣先出街，都顧及下其他雙目健全嘅人嘅感受丫。睇你份履歷嗰位阿哥阿姐，隨時一日睇一百幾十份 CV ，如果份履歷係片字海，咁到底仲睇唔睇落去好呢？
簡單講，一份正路嘅 CV 應該有你嘅高姓大名、聯絡方法 (基本係電郵同電話號碼，住址隨意) 、一個簡短嘅 Executive Summary 、一串工作經驗 (按先後次序，由新至舊) 、一串學歷同專業資格、語言能力、其他技能及興趣。每個環節之間，最好有分隔線清楚劃開楚河漢界。
除咗基本分段之外，工作經驗嗰度要多少少著墨，睇下以下嘅示範：
僱主名稱 （例如：亞美利堅合眾國)
職銜 (例如：總統)
僱用年期 (例如： 2017 年 1 月 至 現在)
一句簡短而有力嘅介紹 (例如：「全球最大民主體制國家的元首，以維護國家利益及世界和平為己任」)
職責 (幾個 Bullet Points)
成就 (又係幾個 Bullet Points)
職責嗰度唔識寫嘅話可以留意返類似崗位嘅 Job Description ，要不卑不亢、適可而止，即係唔好吹太大，又唔好妄自菲薄。講返直屬上司係咩職位，對落有幾多人，日常做乜春，有冇咩決策職能。做咗兩三年嘢嘅一般未必太多嘢可以寫，但係話搞 team building 呀、生日會呀嗰啲，就可以節省少少。
成就呢樣嘢有兩種：一係可以量化，一係唔可以量化。量化即係用數字表達，例如話生意額加咗幾多、客戶數目多咗幾多巴仙、做咗個勁爆 Project 幫公司慳咗幾多經常性開支、或者名列公司 Top Sales Number 1…
