CFA難唔難考？考唔考得過？
Facebook 專頁有更多短文: https://www.facebook.com/ivanliresearch
又到五月，CFA會藉又要續期。唔續會點？其實都冇乜嘢，但咪唔用得個梯圖（其實唔係計梯圖，叫的仙喱唇）。啲卡片咪印過晒咯，咪神憎鬼厭。呢，以前舊公司有個同事，唔撚交會費，而嗰個年代我地仲有印實體嘅報告，仲要靚靚釘裝放在公司門口畀人拎。結果咪因為佢唔用得個的仙喱唇，要搵晒啲報告出嚟，好似細個睇鹹片啲海報畫胸圍底褲咁，人手，一份一份咁，幫佢個名後面，油黑CFA三隻字咯。咁梗係唔係佢做，亦唔係我做啦，梗係啲秘書小姐做—當然人地心中屌撚到佢九彩啦。
又同時間見到協會賣廣告（唔知幾錢，但話晒九龍站，都要啲錢），所以咪寫呢篇文。
其實都係類似職場心得系列，不過今次只係適用於金融業。或者有志投身金融業嘅學生。
咁我相信，多數睇呢篇文嘅人，都只係關心兩個問題。第一，難唔難考。第二，應唔應該考。換言之，即係性價比如何，抵唔抵搏，個收獲/付出值博率高唔高。
簡單答你，難考，一定難考。留意，出自學霸本人口中都話難考，就真係難考。即係你問我A Level Pure Maths，我會答你「其實唔難」，根本下半場（兩份paper嘛）中段已經知道自己必A。好撚牙刷事後先咁講？咁就證明你未夠勁啫。你不妨問返個拎A嘅朋友，叫佢評下。
但CFA，就真係幾難考。當然亦可能因為我考CFA嘅年代已經唔再係學霸，腦袋開始退化，又鍾情吃喝玩樂一年去幾次日本，冇好似當年咁專心。隨你點估—但其實你都應該係咁上下。
本人2000年港大畢業，同年去咗英國讀Master，2001年九一一後回港，雙失大半年，2002年開始教書。咁你想像到，2001年我當然就好得閒，我報CFA Level I 都係嗰時嘅事。2002年考，實際日期已唔記得，但記得係踢緊世界盃。我就當然容易過德國對沙地阿拉伯，十分順利。當時仲係在會展考，而當時仲係好少大陸仔。
然後原本係Level II就有點曲折，我去咗教書。2003年沙士嘛，有得選擇下一年先再考，我當然就選擇去到下一年。然後2004年仲係教緊書，唔知冇心機定冇時間，結果就缺席。到2005年，已轉咗去做銀行，我都唔記得，好似係訓過籠冇去之類。
時間就去到2006年，又係世界盃，再戰Level II，第一次真係出現。好似都仲係在會展。結果，就香埋。係喎，原來會肥的。2007年再考，已經去咗機場博覽館（題外話：明顯地場租平咗好多，但會唔會考試費平咗？食撚慒你。以為成本低咗就要減畀你嘅，你都真係唔好話自己係CFA），同埋有大量嘅大陸仔。第二次卒之成功。
然後2008年，又係記得，北京奧運嘛。就完成埋Level III—離我最初報Level I已經7年。冇耐後搵埋現役成員推薦（其實唔難，唔好以為係入馬會或香港會咁），成為一個差他holder。人工仲，哈哈哈哈哈。
寫咗咁多，都係話你知，本人作為一個學霸，都唔係一take pass，所以閣下不妨照下鏡。當然正面地講，呢幾年我都勉勵啲小朋友，本人咁勁都肥啦，所以肥嘅實在冇乜可恥。最緊要可以無限復活，今年唔得下年再嚟，就去少次日本咯（考試費都幾貴）。不過有啲Level I都肥幾次嘅，又真係直接講句，冇能力就冇架啦，唔好夾硬嚟。唔係話你追夢聽日就可以變英超球員的，唔得就係唔得。
之但係，CFA係難考，但唔係不可能的任務。況且梁啟超（其實唔係佢）話頭，人生有咩唔難考呢？你想在金融業發圍就係難架啦，大把勁人。唔想競爭嘅，去做看更咯，聽講都有兩皮嘢，好過唔少金融從業員的說（真的）
舊年又係呢個時節，貼過篇奇文共賞，講個鬼佬在香港考CFA考到懷疑人生。話考CFA等於至少六個月no life喎．正如我當年講：堅係笑咗．你no life啫，大把人唔係咯。唔好你買唔到樓就以為人人都冇錢嘛。香港人好有錢的，正如香港／大陸學生好多勁人．叔叔當年都一路返工一路考仲有時間睇波溝女寫文
結論，係難考的。但，難考先好。廢柴就唔會咁諗。等於考公開試咁，年年訪問啲人講份卷淺，定深，你留意下啲人點答。廢柴一定係想份卷淺，因為冇甄別能力，最好考擲公字。考足球學校就最好射十二碼，考乒乓波就最好打一分過，搏一開波滴死你。（固然深淺同甄別能力唔係同一回事，但有相當關係）。勁人先唔會想咁，最好你出深啲，否則個個識答，自己反而可能大意失賓洲（講美國大選），或者變咗畀人改書法（明顯因為本人字醜先咁驚）（又姐係，本人手咁嘅字，中文都拎A，可想而知啲內容都真係幾勁）
正係因為難考，先有用。再得罪講句，你好似地產經紀牌或股票經紀牌咁（其實有個好聽啲嘅名，但明啦）咁易考嘅，就冇意思。點解呢啲牌要易考？因為太深唔掂嘛，啲友會考唔到，而啲友本身程度低嘛！
考得CFA嘅，都至少要係大學畢業。又得罪講句已經篩走一班人。實務上會去考嘅，我相信亦都係大學入面slightly above median嘅人。但你見歷嚟嘅合格率都唔高，一半左右。固然有人話（我都信）係cap水技倆，但其實亦都見到佢或多或少都有把關，唔會整到阿豬阿狗都pass — 咁所以，你係可以過三關嗰個，咪有意思，可以出嚟鳩威咯。否則（再得罪講句），好似地產經紀排咁，得罪講句有呼吸就考到嘅，有乜意思？有冇人考到地產經紀牌貼上冇鳩威？我好似冇見過。
咁當然，鳩威只係第一步。如果只係為鳩威唔使花咁多時間咁多錢。講完畀你知難考，同埋話你知因為難考所以有意思，下篇文話埋畀你知，點解都係應該考。
Facebook 專頁有更多短文: https://www.facebook.com/ivanliresearch
