［再見理想］靠公司自動自覺加你人工，就含得撚
Facebook 專頁有更多短文: https://www.facebook.com/ivanliresearch
（明報原文：更多人跌入稅網 來年薪俸稅收料增一成 http://bit.ly/2vCb4cT ）
真係大檸樂，加3%都理想。唔好講買樓咁大劑，望下麥當勞太興加幾多？加租又加幾多？ 「理想」一年都唔止加3%啦（執咗了，discontinued data）。
3%，跑輸通脹啦下話。而我唔係個陰謀論嘅人，但根本唔信官方啲咩通脹數據。況且，你望真啲，邊個話你知CPI（中國，香港都好似係），PCE（美國）代表 「通脹」？PCE冇個I字喎，CPI有，但都唔係埃for 現飛唇
不過借題發揮講下，「其實好合理」。邊個話你知你份糧要跑贏通脹？再仙力啲諗下，而家咁低失業率，所謂工搶人，都只係得3%—你不妨估下到真係支爆跌八成嗰時，你份糧會點？炒晒啲廢老你上位呀可。嗯，慢慢等
係好難聽亦都好殘忍，但見親啲員工咩好感概呀，「我為公司打生打死咁多年」（冇撚出糧畀你？），「公司只係當我地係個數字」（你肯定你份糧在公司報表有咁大？）「公司當我係避孕袋咁用完即棄」（公司掉走你先唔會包好先掉走咁有手尾），就好想笑。
事實就係，諗得仙力啲，殘忍啲，就啱架啦，比較接近現實。再難聽啲講句，就係公司拎萬五蚊請你，因為覺得你帶到萬五蚊返嚟 。我最初聽嗰時都覺得好唔啱聽，但越嚟越發現呢個係真理。 咁當然好多工種唔係咁明顯量度到，先造就到好多人呃飯食，包括你同我。但公司嘅宗旨，同麻甩佬去夜場揀女差不多：八百得嘅，點解要比一千？一係你有額外服務，一係你真係好正，正過平均咯咯。但你肯定自己好正？個個都覺得自己正過平均，呢樣嘢本身已經係謬誤。
另一個更哲學嘅演繹就當然係，你劈炮呢，公司肯留你，都唔係太開心—咁只係代表，公司underpaid 咗你好多年（當然，資訊好寶貴，要時間的，球星轉會加幾倍人工，唔係一夜好波咗幾倍）。又或者，網上流行嘅講法，在可以取代你嘅嗰班人之中，你係最平嘅（但，一路都係咁架啦）。相反，如果三餐唔成問題嘅，當公司炒你，你應該沾沾自喜：即係你搵鳩咗公司笨好多年，你overpaid好多年。
但我冇識過任何一個人話自己overpaid，只有隔離team啲廢柴同坐房啲高層overpaid，本人最撚醒最underpaid，一個人做三個人嘢，同事又針對下屬又廢上司又唔識貨。（但，做乜唔轉工？）
可能因為我畀人炒過，事隔七年都仲有呢啲陰影。我無時無刻都覺得自己有機會起身，亦唔放咁多嘢在公司。呢個亦係方卓如／龔耀輝在《國金外望》教大家嘅。可惜我冇聽，在耆英證券積埋唔少嘢（因為有個櫃，個位亦都夠大）。八年喎，嗯。又或者馬後炮諗，到你開始在公司積好多嘢時，就係complacent，太過鬆懈了，真係以為公司冇咗你唔得，唔會咁殘忍。
所以有種好常見嘅戇鳩行為，叫做同公司／老細講感情。我見金融嘅好少咁天真，可能都知都係一場交易，講感情都要畀錢，最多加三百叫你做老公。咁先好。我耐唔耐見啲人求教，想轉工或者有埋屙化，但咁咁咁係咪好衰。我阿頭好睇我喎（但，唔撚加你人工？咁有幾睇你？），咁走咗會唔會好衰仔？公司好多嘢我跟開喎，我咁忽然走咗真係驚佢地冧，雖則公司一路唔加我人工......但始終（一路都唔加你人工，同你走咗會冧，發唔發現兩者有矛盾？）乜乜乜。
係真的，公司根本冇咩邊個不能取代。你話朋友，家人，另一半，我都仲可能信。公司？你咪撚玩啦兄台。仲係唔信？Steve Jobs都畀人炒，你對公司重要得過佢？
講咁多，無非話你知，真係要狠啲。有啲人真係好得意，平日就日日毒舌上網屌老細屌公司，但埋去見到老細就龜縮，講句加人工都唔敢。叫佢拎個offer兇鳩老細，又諸多理由，又怕畀人知自己搵工，又怕老細之後唔信任你（又返返嗰個問題，好撚信任你，但唔加你人工？咁有幾信任？）
總之，商業世界嘅嘢，一切量化就得。你有幾重要，有幾得寵，老細有幾睇你，全部一個字：錢。冇畀你嘅，全部嘢都係假。Talk is cheap。新喜劇之王查理話齋，得，我繼續讚你都得，你畀錢我就得。點解啲高層咁鍾意搞埋一大堆無聊濕鳩福利？因為唔使點用錢。仲夾埋出面啲乜柒調查出嚟撚化你， 「員工認為錢唔係最重要」 「員工轉工唔只係為咗錢」。好呀，下個月減你份糧出畀我丫。
做得老細嘅，梗係天花龍鳳，乜都講得出。你點廢佢都可以讚力，好有潛質。唯獨係講到錢，就冇得呃。因為讚美，好似打機啲武器咁，無限量化寬鬆。Serve down 玩唔到呀？賠金幣畀你咯，反正印幾多都得（雖然你要用錢買）。佛誕獎賞呀，咪每人醒幾件神器，反正又係整幾多都得，而根本人人都有，你根本冇強到。
（除咗，唔記得log in嘅人，呢啲就係輸家。又，寫到呢度，你開始明白點解不投資向下流未？同一道理）
但錢呢，總唔可以無限畀你，亦唔可以又畀你又畀佢。寫阿丕嫂可以個個好高分，但到分餅仔，個餅得咁大，邊個大份邊個細份？同樣道理，冇加薪嘅升職係廢撚話，比個三軍司令你做都得。但如果有加薪嘅，一樣好現實，全公司得兩個升SVP，咁升邊個呀？呢啲位咪知邊個先真係得寵。你升唔到嘅咪繼續攬住份阿丕嫂打飛機，此人係友誼小姐，下個月拎份阿丕嫂去交租啦。
仲未得閒教大家搵屙化跳草裙舞。但講到尾，一句。你要明白，在大老細（我好似識親都係咁）心中，你唔撚出聲，即係你做得好開心，或者你搵唔到第份工。你做得好開心，搵唔到第份工，咁做乜要加你人工？
呢啲畸屎，每年嘅salary review，全公司一齊加嘅，真係同ESG差不多，做個樣當施捨咋。你靠老細自動自覺加你人工？你就含得撚。除非你做公務員啦，唔係嘅，老細會良心發現，定忽然覺得你做得好好加你人工？不如諗下，佢點解唔加自己？
所以，唯一可以加人工嘅方法，就係拎個屙化返嚟，兇鳩你老細叫佢留你。或者你傾都唔傾，轉去第間公司。兩種方法，都首先你要搵份工。搵唔到嘅，就證明你overpaid，最好感恩，同埋儲定啲錢準備畀人炒。
記住，真係重要，講三次
旨意老細自動自覺加你人工，你就含得撚。
旨意老細自動自覺加你人工，你就含得撚。
旨意老細自動自覺加你人工，你就含得撚。
Facebook 專頁有更多短文: https://www.facebook.com/ivanliresearch
