我的辭職記（3/4） —對家出幾多我出幾多！
呢個系列，就講我踏入職場17年（原來都未夠廿年），每一次辭職嘅情況。計埋而家呢份，我做咗7份半工。計成功嘅（即係冇留低嘅）辭職，5次半。爭咁兩次呢？一次畀人掃走，仲有一次係而家呢份。寫咗萬幾字，分四日刊出。夠晒準確，全無保留，早期嘅有埋人工，晚年嘅費事講，驚畀人恥笑。
第一集在此：
第二集在此：
上回講到2006年復活節，我離開蕉行，唔再做銀行，加入耆英證券，做（當時）夢想嘅分析員。然後？然後你都估唔到，一轉眼，就去到2017年。
唔係趕收工，或者畫漫畫發老脾。而係你睇返舊文，我2006年入耆英，2014年被炒，何來有得辭職？
被炒後，2014年春，在高人安排下（再講一次，識人好過識字），我去咗東盛／台灣佬。人工減咗一大截（三份一，即係我要加返五成先追得返）。事後都有諗，其實係咪唔應該咁快自降人工，係咪應該諗多陣。反正當時又唔係手停口停，係結咗婚要供樓（2012結婚2013買樓2014年頭就被炒），但，有儲錢架嘛，仲有畀人炒都有舊錢賠。但沒有如果啦，況且高人搭路，我覺得冇老點我，人工係減，但至少人事唔會出問題。後來果然如此，人工減咗，但埋單都算做得開心。（其實我個人算樂觀，冇乜邊份工我係屌住走，即使星矢圍高達我玩到自己唔撈，我都唔覺有邊個欠咗我負咗我半分）
東盛，基本上就係工商東亞嘅後續。工商東亞就當然搞到大大鑊，自己睇歷史。後來東亞拎返晒，換人改名變咗東盛，我就當時加入，所以係東亞嘅員工，子公司嘛，全資添。再後來賣咗畀台灣佬，永豐金（同我幾廿年朋友兼同學涂國彬間永豐冇關），SINOPAC是也。約係解咗再簽，但唔算辭職。人工福利年資亦冇變
我在東盛／永豐早年係唔多開心。人事係冇問題的，但畢竟人工減咗一截，都話由奢入儉難，當然供樓呀生計呀不成問題，但就冇以前咁豪咯。同埋，公司檔次又低咗呢，對啲客又唔係嗰回事。仲要係畀人炒出嚟，點都會覺得係咪自己唔掂，雖則好明顯好多人一齊被炒，我老細，我老細嘅老細都被炒，其實真係天要下雨娘要嫁人，冇得避。壓力冇乜，但心中係唔多好受。踢開英超轉去中超咁—但係英冠人工呢。
不過後來到台灣佬買咗，反而好咗，台灣佬（在台灣）都算有頭有面，上市公司嘛。時為2015年尾。
更好嘅係，我其實計過下數。當然事先冇走漏風聲，但單刁出咗（東亞同台灣佬都上市公司），到台灣佬正式入主，點都搞你大半年。夠你慢慢做刁啲。
台灣佬買東盛之前，在香港已經有業務。我望一望佢地公司，問一問朋友（下？你冇行家朋友問到嘢？咁就唔好成日上網吹水啦，嗰啲廢柴害死你）嘻，心就定好多。
有機會寫多篇「公司畀人收購如何是好」。我都試過兩次，幾好腳頭。講返，我做刁啲（即係搵人吹水），見到嘅係乜？就係，台灣佬在香港，係冇研究部嘅。咁就掂。除非佢將我成個部門踢走（當然都有可能），否則簡單，佢總唔會大仇口到炒咗我請第個返嚟做。
相反，例如啲部門大家都有嘅，咁你就唔多好玩了。首先，大家都知，協同效應，仙甩治。邊度協同出嚟？咪炒咁啲多餘嘅人。邊個人係多餘？可能係你。兩間公司，兩條添，十個加十個，炒咁兩三件係最低消費。況且，炒嘅人，大半都會係被買嗰間公司，人地梗係睇你啲亡國奴唔順眼。
平等合併？邊有平等，M&A，沒有M只有A。李靜（係，嗰個李靜）親口同我講過，只有人講李靜高禮澤，冇人講高禮澤李靜。旁邊嘅高禮澤亦點頭，好識撈。邊個市值大，邊個做CEO，邊個董事會多人，全部有得睇，誰大誰惡誰正確。舊文寫過，而家仲邊有添惠華寶獲多利一波
有啲職位先天高危，例如做IT，特別係做十卜。兩間公司兩套系統，合併咗當然唔會用兩套，而九成九都係用原本公司嗰套，咁你舊嗰套嘅人，仲有乜用？
兩個部門重覆嘅，就算你留得低，都唔會好過。做Ｏ靚嘅，你估人地睇原本啲馬仔多啲定睇你多啲？咁當然可以橫刀奪愛嘅，舔鞋底舔得大力啲咯。原本仲老細嘅仲大鑊，你去到就under 人地，你估人地點對你？你又點忍？
但幸好，台灣佬在香港係冇研究部嘅。加上舊老細（都有留效）極力推薦，台灣佬保留我部門，仲變相加大咗我少少權力，仲出埋我去做4號牌嘅RO（唔知係乜嘅有得佢，或者記得聽我逢星期五嘅節目職場胃腩）。我亦好自然地扭咗佢加啲人工，有機會再分享。咁又做痴膠線的少年啦，當然做得好滿意啦。
直到某一日，真係人地搵我。耆英嘅舊同事，一早（2007）去咗星矢圍高達。佢地走咗個人，所以佢想搵我過檔。我唔係直接under佢，上司另有其人，佢搭個路咁。但佢話得下事，佢推薦嘅，佢（同我日後）嘅上司都點頭（再講一次，識人好過識字）。
人工，固然加。但唔係加好多（基數大咗啦，仲加50%咁誇咩）。但我都真係義無反顧的（利申：之前台灣佬埋枱我有叫佢加，但呢個屙化冇），鐵了心要走。事實係台灣佬睇得起我，二話不說就「照跟」，星矢出幾多佢出幾多。嘩，堅係受寵若驚。可惜我去意已決。其實中途都有啲想縮沙，我就係咁麻撚煩。但結果都係交咗信，走咗。時為2017年夏天
講返辭職，呢次，都唔係好順利。去到台灣佬公司，我已經係部門主管，小頭目。就直接報告畀啲董事級（其實好多董嘅，嘻），當然係台灣佬。咁董事級梗係大忙人。加上當時嗰位台灣佬，又係好有霸氣（都話我遇過好多霸氣老細）。呀仲有一個我都唔想講，但係事實嘅問題：我啲普通話就普普通通，免得過我都唔同台灣佬傾電話。面談可以，電郵更佳，WeChat最好
咁辭職，一百個一百個都教你啦，當面講。但，呀乜董神龍見首不見尾，我同佢又唔再一個露畸唇返工（我在灣仔佢在尖嘴），話見就見咩。你叫我打畀佢我都係拒絶的 — 都話面談仲好，電話我真係唔想。
結果？我就好核突地，WeChat辭職。台灣佬話遲下面談
然後？某次例會，台灣佬叫我留低傾下，但都只係講咗幾句，佢就將挽留本人嘅事項交咗畀另一個老細，香港人。台灣佬只係講一句星矢出幾多佢出幾多。再講一次，我到而家都受寵若驚。但，都係去意已決。
最後，都好似走得有啲核突，台灣佬嗰期又有啲煩事。我都冇親口同佢道別。只係交低信畀 HR，又係一大堆嘢留在公司（後來有下屬運返畀我），就唔知點咁閃咗了。時為2017年夏天
上一段講過幾次，我由台灣佬去到星矢圍高達，人工固然係加咗，但真係唔係最重要（又，到我講得出呢句嘢，我就覺得自己去到某個層次了）。或者冇咁離地咁講，頂，人工係加咗，但去到星矢圍高達，肯定工作量增長更多，壓力亦大過加嘅人工啦。咁講明未？
咁點解仲去？因為個EGO咯，虛榮咯，想證明自己咯。唔甘心咯。講開甘心，梁芷珊啲文（對，羅神嗰個）我真係唔睇，但呢篇極得：
唔甘心呀？唯有祝你甘心。
無數咁多人都好似我咁，搞一大輪，想證明自己。最後證明咗，係唔得嘅
由耆英嘅太古廣場三期，去到東盛嘅灣仔中國海外，租平咗一大截，樓下姐姐嘅顏值（原諒我蝗語）都係。即係你踢開阿仙奴（是但），叫你去踢卡迪夫咁咯。我心中都係有啲不甘心，都係懷念以前太古廣場三期嘅日子。百幾蚊尺租，廁所乾凈到可以在入面訓。出入嘅係靚女OL，同埋法國佬（傻珍／喪珍 SocGen正係大租戶）。
然後？星矢喎大佬。星矢喎。東盟第一大公司喎（計市值）。我做咁多間公司都冇一間有咁大。耆英都sort of sort of MNC，馬拉大把，印尼柬埔寨（？）都周街見，但真係唔同。你咪當耆英係阿仙奴 — 但而家我去踢，車路士喎，再高一班喎（得罪阿迷了）
再講一次，我未做過一間咁大嘅公司，真係拋出嚟人人識嘅。星矢個研究部，幾十人，香港都真係唔係好多間行有咁大。仲有，我卒之可以由三十蚊尺租嘅灣仔，返返去中環喎，成舊水一尺喎。
都唔使事後睇，當時都知，好多都係虛榮，Vanity．但， 重視能治肚餓 未曾獲得過便知我為何。你拎張卡片出嚟，唔使再講一大輪咩工商東亞，甚至唔使講耆英在坡坡國上市，唔使講馬拉佬買咗你。一個字，星矢，香港邊個唔識？（特別係掉撚咗啲客嘅保險箱之後）
況且，你拎住佢個招牌，出嚟講句嘢都大聲啲。我以前在東盛？巧撚折墮架，去業績會，捉住啲入世未深嘅記者，話畀佢地知我乜水，喂，你可以搵我架。你諗下幾撚烚熟狗頭？Ego咁大嘅我，有時照鏡，都心諗自己：做乜撚嘢啫？
我諗起《春光乍洩》張國榮串梁朝偉： 「晚安晚安請進請進，做乜撚嘢啫？你唔去做鴨？」（真係張國榮先可以講粗口都咁靚仔）
但星矢呢？公司一吹雞，就幾十個記者嚟聽你鳩UP。巧威威。香港咋喎。在坡國仲把撚炮。得罪講句，星矢（類國企咁滯）要見嘅，邊間公司唔畀幾分薄面你？淡馬錫都見你啦（其實係股東，哈）。在坡國做路演有專車接送添呀
（講笑的，唔係坐呢架咁型，截GRAB咋，不過在馬拉就真係有專車。至於咩係路演有機會再解，你當巡迴演唱會咁，當年我呢個就香港站開始，然後泰國站，新加坡站，馬來西亞站，最後一落機玩多場香港站）
總之，其實我最初都有懷疑自己。但都係選擇相信自己，證明自己 — 果然就證明咗係唔得。有啲人就係頂多踢歐霸，去到歐聯就腳軟。講冇用，踢過就知。
你話我係咪好怨氣好灰心，其實都唔係。睇我平時又串嘴又好勝，但都係李天命嗰句，我對外就張狂，對內（即係對自己）謙遜。自己知自己有幾多料。證明咗唔得，咪唔得咯。叫做踩過草皮丫。
至少，波神話齋，柒咗冇嘢架喎，每個人都總柒過，總有啲嘢柒。咩係最柒？試都唔試就最柒。（不過波神好似話一試再試，我就冇了）
