我的辭職記（4/4）-戀戰中環
呢個系列，就講我踏入職場17年（原來都未夠廿年），每一次辭職嘅情況。計埋而家呢份，我做咗7份半工。計成功嘅（即係冇留低嘅）辭職，5次半。爭咁兩次呢？一次畀人掃走，仲有一次係而家呢份。寫咗萬幾字，分四日刊出。夠晒準確，全無保留，早期嘅有埋人工，晚年嘅費事講，驚畀人恥笑。
第一集在此：
第二集在此：
第三集在此：
Facebook 專頁有更多短文: https://www.facebook.com/ivanliresearch
上回講到，2017年夏，我在耆英舊同事搭路下（再講一次！識人好過識字！而觀乎咁多次都有人幫我搭下路，證明我個人都唔係真係十分非常之咁西），去咗東盟最大公司，星矢銀行。
在星矢只係一年多啲，我就辭咗職，裸辭，忍無可忍。主要係同上司不合，佢覺得我唔掂我又覺得佢唔掂咁，已不用多講。我以為呢樣嘢唔會發生在我身上，打死都磨到等人炒，但針拮到肉先知痛。但再強調，公司冇欠咗我冇負我。真辭職，絶對冇人明示暗示想玩我迫我之類。我辭職時上司（女的）都有啲錯愕，但亦都冇留我，可見佢亦覺得無可無不可。我唔敢講我走得光榮，唔會光榮得過陳光榮鄧光榮，但至少我都算對得住自己（咁其實好易啫，嘻）。時為2018年秋天
不過，又係辭職辭得好sloppy下。我係半裸（陣間解）辭的，但又係唔知點開口。係喎，上司又係台灣人，不過我同佢講廣東話的，所以唔係語言問題啦。但因為平時冇乜兩句，又係唔知點開口。加上佢唔坐房（巧平等的說），我又冇咗當年坐電梯咁在其他人面前照講嘅勇氣。
結果，都係有一日，佢的我入房（都有房的，佢唔坐啫）傾計，繼續講啲鴻圖大計，叫我幾時要交乜要交物。然後見到我好似心不在焉，問我有冇聽緊。我就話佢知，你啲計劃唔使有我了，因為我唔撈了。
同老校二號一樣，佢有少少錯愕，但好快就回復返business is business嘅模式。打後嘅事，十分簡單。甚至連HR都唔使見，電子化真好。我只係再同上司傾咗一次幾時起身，揀一個我唔使賠錢又最早走得嘅日子。呢啲嘢，傾嘅啫，咩幾將通知有冇得用假扣，全部商業合約之嘛，你唔講公司唔講，冇人理，大家同意就得，大家同意嘅你聽日起身但各不相欠又得。咁一般嚟講你唔係玩到好串嘅，上司都肯同你傾，冇功勞都有肺癆嘛。咁我毋需扮大方話我同上司關係好好，但亦都唔係惡劣到佢會留難我，況且，佢嘅優點係公私分明，唔會玩啲咁嘅小動作。時為2018年夏末秋初
總之，工作證明又自動出畀你，計糧又計埋畀你，啲咩的士錢呀出trip錢呀（幾皮嘢架）計晒畀你，甚至exit interview都電子化，即係慳返。岔開嚟講，本人覺得exit interview係最浪費人類光陰嘅一樣嘢。我都走咯，你公司點，關我撚事。想我畀意見你？如果係in good terms嘅，一早公司都會知啦。如果係bad terms嘅，個員工借機玩鳩你一鑊都得。總之，我唔認為有任何嘢，係平時唔講，而exit interview會知道嘅。呢啲只係HR刷存在感嘅工具。幸好星矢係電子化 — 你話叫我去鰂魚涌同佢玩多次，都真係幾令人沮喪。而結果我打咁多份工，都冇玩過一次exit interview
好，真係尾聲了。樓上講，我在星矢係半裸辭。即係唔係除晒，除凈個胸圍咁。正如最開頭我都話做過7份半工，就係呢度半份。
幾句講完，首先因為時間上太近，習慣上太近嘅嘢我都唔講太多。二來都係有啲敏感。三來涉及朋友。
簡單嚟講，我有位朋友，搞咗間公司，都幾年。佢一路係我讀者，一路好賞識我（拿，寫文寫到有人請呀，呢啲就好讀者），耐唔耐問我意見，我都有畀。後來佢甚至叫我去佢度幫手，但當然出唔到人工。直到我在星矢想走，又問起佢，佢又可以收容我，於是就一拍即合了。對，我離開星矢，去咗佢公司，但唔係金融機構。
咁點解係半份？因為正如頭先講，佢畀唔到人工，但要求我只係返兩日半。咁OK喎，我又有啲錢每個月落袋，又多咗空閒時間，就一拍即合。時為2018年秋天。
往後嘅事，亦又係有啲意外。2019年春天，又係舊同事（唔係上面提過嘅任何一個人。真係再四五強調，識人好過識字）搵我，重新出山，又再做返金融界別。
有全職，當然做返全職。朋友明嘅。由於呢半份工嘅老闆係自己朋友，咁十分簡單，就咁在公司同佢講一句就得了。時為2019年春天。
另外，可能無人care，但在情在理，for sake of completeness 。呢半份嘅同時，另外仲有壇手作仔。亦係我另一個朋友（再六強調，識人好過識字），好欣賞我，搵我去幫幫手。你當係四份一份咁咯。所以理論上係哈利波特咁，七又四份三份工。同樣地，因為自己朋友，辭職時都係好簡單。
寫晒咁多，先發現，其實初乜鬼夜。辭職，咪等於講分手咯。都真係幾一樣。係好難開口，但都要開。最緊要就唔好太多感情，唔好傷害對方。I mean，傷害就梗架啦，但唔好借題發揮，亦唔好畀對方同你泥漿摔角。講事實，唔好讚佢唔好踩佢 — 同炒人一樣 — 上次篇文有講啦
不過呢，都真係，同初夜一樣，無論腦中練習幾多次，睇幾多教學都好，都可以搞到好大件事的。只能盡做。唔好搞到上頭條呀血案呀咁咯。
當然同分手有啲唔同。勾勾手指比不起鑽石戒指。你撇低舊男朋友溝第件，我諗舊愛真係好難好大方咁祝福你，唔斬你九碌已經幾好。但工作唔同，只要你唔係玩得太串，你老細又唔係太過仆街，你有好路數，舊老細係會真心祝福你的。
正如標哥咁，都話曾經佢都幾巴閉，同人講都有人識，之前做歐資大行架。當年同人講起，都話「你老細以前好堅秋架」。當時我初入職場，但都聽得出，重點係「以前」。因乜會搞到去當時在香港毛都冇嘅招行啫？除咗HEA啲同畀到人工佢，我相信，佢火爆嘅脾氣都係佢由大行走出嚟嘅原因。但我冇資格亦唔應該judge佢，佢開心咪得，反正亦搵埋唔少，你咪當球星去中超去日職養老咯。但佢係見過世面嘅，都會同我地講，自己就話蕉行養老等退休啫（事實亦成功），但我地後生嘅，唔通在嗰度一世咩，佢都係叫我地學幾年師好走人。負責任嘅老細應該係咁。至於下屬走咗佢會煩？會架，但，必然階段啦，咁細事都唔想煩嘅，就一世做散仔啦。況且，人走咗之嘛，請過個咯。錢之嘛，又唔係佢嘅錢。
總括返我嘅經驗，都見到，辭得唔順利嘅，就梗係對住啲氣場好勁好火爆嘅老細。但呢啲你控制唔到。另一種就係平時冇乜兩句嘅老細，呢啲我唔知係咪你控制得到。
我係老派人，始終覺得，你冇撚可能whatsapp同人分手。正如唔應該email辭職（雖則我有口話人，我連WeChat辭職都試過）。一夜夫妻百二蚊，同你搞上嘅，值得你親口講分手。正如你呃得飯食嘅，老細點都值得你親口講辭職，無論係西嘅老細 — 唔好忘記，就真係冇人拎支槍迫你嚟返工的。
如果同老細關係唔好，係難開口的。但，人生就係咁架啦。死撚咗佢乜都唔使煩。正經啲講，你唔係做一世散仔嘅，你大把機會要講啲難開口講嘅嘢。例如炒人。辭職你都搞唔掂，你點炒人？或者叫你炒你最睇得起嘅徒弟？甚至乎有一日要炒你師傅？
只要你唔係成世做散仔，稍為你做個小頭目，都有機會做呢啲嘢。係呀，大老細決定炒人，完全你冇得畀意見，甚至你冇得決定邊個死。但佢唔想做醜人，叫你講。咁你點？
所以，同炒人一樣，簡單，直接，講事實。唔好帶任何感情。唔使好抱歉，但又唔好借機踩多人兩腳。真誠而不烚熟咁講，business is business 。
之後，應該係會貼外傳， 「安雅會談」。係，蘇永康個安雅。
講我其實點解唔教書，去咗做銀行。
Facebook 專頁有更多短文: https://www.facebook.com/ivanliresearch
