千祈唔好搞同事— 漢堡神偷麥當勞CEO落台
Facebook 專頁有更多短文: https://www.facebook.com/ivanliresearch
- 麥當勞個CEO走咗，原因係因為搞同事。
2. 先講，麥當勞個CEO係乜水？咁當然唔係姓麥嘅兩兄弟或其後人，亦唔係Ray Kroc。照計冇乜人答得出個CEO係邊個。
3. 其實可能係件好事。近年好多科網明星CEO，但留意其實唔少係創辦人。如果冇咗創辦人身份，CEO只係打工仔，冇可能大過間公司。CEO如果太出名，其實係咪花咗時間資源去自己捧自己？
4. 特別係麥當勞呢類公司，固然都好多新花臣（陣間會講），但相對地真係咁多年不變，都係賣咁上下嘅嘢，咁上下嘅生意模式。
5. 諗真啲，麥當勞呢間公司好具代表性。有次我睇完The Founder （港譯「大創業家」，但我在台灣睇，譯做「速食遊戲」），返去同公司小朋友講，佢話我知原來中學讀Commerce定咩企會財，係會讀到Ray Kroc
6. 諗諗下絶對係，在我中學嘅年代，講商業模範，應該不離可口可樂同埋麥當勞。兩者都係美式商管MBA文化嘅極致，企業機器，無堅不摧，征服全世界，包括以為唔會食垃圾食物嘅品味法蘭西。可口可樂攻陷法蘭西係當年嘅企管教材。放到而家，就係星巴克反攻意大利法國奧地利，同埋.....Coco老番屋反攻印度
7. 講返，近年（任你由幾時計，總之近年），你諗都諗到，麥當勞係面臨極大挑戰嘅。首先係誰都不能否認嘅，健康文化，至少要望落健康。我唔係好明啲友飲星巴克甚至珍珠奶茶有幾健康，但型，文青。可口可樂一樣面對呢啲問題，但至少可以開啲副線或者收購。麥當勞？好似冇噃。係有沙律食嘅，但你肯定好多人食？
8. 第二，當然係反全球化，反霸權嘅興起。好奇怪，個個照舊上Facebook ，照舊用iPhone，照樣一年去幾次日本—但話反霸權反跨國企業。而即使係廿年前，麥當勞已經係一間麻煩多多嘅公司。食肥人啦，洗細路仔腦啦，人工低啦，告人誹謗（著名嘅Mclibel case），對動物唔好啦，對環境唔好啦，乜都齊。
9. 你可以慢慢搵其他數去車輪廚我，但我發誓我冇特登揀個Frame出嚟，更唔係射咗龍門先畫框。就咁，你見到，2010-2015呢5年，麥當勞股價，係大幅跑輸標普指數嘅。
10. 點解係5年？點解揀2015？因為，而家嘅CEO，Steve Easterbrook，就係2015年上任，到而家就係差不多5年。
11. 咁你睇下，佢上任前，麥當勞大幅跑輸標普500指數。到佢上任後，大幅跑贏，其實已經唔使討論其他嘢。股東應該相當滿意。呢五年你買麥當勞就升一個開（有人仲嫌少），買標普500指數，升四成左右。咁你啲網友梗係個個賺幾十倍啦。
12. 而最重要係 ，佢算係臨危受命。頭先講過麥當勞嘅種種挑戰，去到2014年直頭銷售倒退，好大件事，12年嚟首次。亦都因為咁上手CEO Don Thopmson 收咗皮。就係Steve Easterbrook帶領麥當勞，呢間當其時被視為走入樽頸嘅巨企，走出谷底。股價真係唔呃人。
13. 講返Steve Easterbrook，佢上任冇耐，就梗係新官三把火。當年佢嘅重組計劃，大家引項已待。結果，佢宣佈重新分過啲業務，分做四味：美國U.S.，國際領先International Lead，高增長, High-Growth，基礎 Foundational．我頂，我以為係漢堡包薯條雪糕麥樂雞！兩千萬美金就整啲咁嘅嘢？我都識啦。
14. 係咯，同你啲網友一樣，講梗係簡單啦。做落你就知。都係嗰句，數字唔呃人。頭先講完股價，再睇埋盤數。識睇嘅都知，趕時間梗係睇頭睇尾，top line收入，bottom line 利潤
15. 紅色圈見到2014年銷售倒退啦？亦因為咁上手Don Thopmson被炒，Steve Easterbrook上任。然後你睇下，其實你見，Steve Easterbrook上任後，銷售一樣年年跌，甚至跌得仲勁
16. 但正如睇女仔唔好只係睇樣咁膚淺，身材都好重要的。銷售跌如何？你見最底，股東最關心嘅嘢，純利，升喎。咁就得啦
17. 點解銷售係咁跌但純利升？小學數學啦，控制成本咯！掐cost掐得夠盡。呢度詳情就不多講啦。但呢個係一個好例子，每逢啲公司出現乜鬼危機，香港啲喱文KOL（特別係啲冇做過Analyst 冇做過會計嘅），梗會出嚟同你講，拿，減成本冇用呀，影響士氣呀，又影響產品質素，要對啲客好啲，多啲人幫襯，開源先係王道
18. Steve Easterbrook表示你都戇撚鳩。股東只在乎盈利，話知點嚟。當然理論上，開源得嚟嘅盈利，好似畀節流高質素啲，始終節流節極有個本。但你睇人地啲cost壓得幾勁？有冇影響服務質素？我屌，去麥當勞講服務質素。
19. 唔好笑，啲人坐經濟艙諸撚多投訴，其實一樣，你比幾錢？有冇諗過廿年前一張機票仲貴過而家？但其他嘢邊樣唔係貴咗？咁邊度變錢出嚟？你至少應用當年嘅易乾同而家嘅特選易乾比先公平（其實應該以前易乾同而家平商務比）
20. 都未講完，銷售跌但成本落得勁快，做到利潤升。更加重要嘅係，真正最底嗰層，淺綠色嘅，EPS，每股盈利。心算都計到，45億純利，上到59億純利，升三成左右咋喎。但個每股盈利，4.8升到7.6，六成喎！
21. 做乜解究會純利升得三成，但每股盈利就升六成？小學雞數學啦，個分母細咗咯！分嘅股數少啲咯，見唔見深綠色？股數少咗好多。點解會少咗？之唔係而家左翼（例如Elizabeth Warren）最憎嘅，股份回購，share buy back咯。有人話係財技，股東dont fucking care．給我EPS，其他免談。咁低息嘅環境，借錢做回購都抵啦。
22. 以上講咗咁多，Steve Easterbrook真係神級了（你去做丫）。但做乜都係掛冠？其實今年麥當勞股價都係唔多好．升得一成，但大市先兩成幾。之前個業績都係麻麻地，股價一出即隊，我仲見CNBC newsletter 質疑公司冇乜「作為」。
23. 不過我理解股東都冇乜投訴，之前贏咁多，有乜所謂。今次佢下馬嘅原因，好簡單，搞同事。
24. 其實大家所知不多，係咪metoo之類，就唔知。根據Steve Easterbrook自己講，係自願嘅（但唔通話自己老強人？），佢同某尊尼亞員工搞上（我估唔係炸薯條個阿嬸掛，又，唔好笑，埃汾都炸過，啲阿嬸教我好多嘢），但完全自願。而且仲有樣嘢，Steve Easterbrook一早離咗婚，理論上男歡女愛，關你撚事
25. 不過，麥當勞有極之嚴格嘅政策。只能講句軍令如山，CEO犯法都同庶同罪。其實係庶民無罪，你去炸薯條，同其他女搞上，我相信係冇問題的，當時我炸薯條都好多靚女的說。
26. 當然呢啲只係官方同佢本人解釋，係咪真係自願？唔知。可能過幾日有人出嚟投訴。但留意佢封email畀晒全世界，我估冇咁大膽講大話吧。又或者，係權鬥嘅一部份？我始終唔係好信，如果一個CEO，冇事冇幹又離埋婚，股價又生性（呢個先係重點呀下，股價唔掂你偷薯條食都可以炒），雙方又自願，真係會咁樣人頭落地？
27. 睇下之後有冇新發展。但幾明顯，股東唔多歡迎。Steve Easterbrook做得好地地，「搞同事之嘛，唔使死呀？」。股價係即插的。
28. 剛見到，賠錢畀佢，都只係賠半年人工，其實真係好少。但亦可以理解為佢身有屎。
29. 彩蛋1：咪講過Steve Easterbrook上手係 Don Thopmson。咁2015年時佢被炒，之後去咗邊？佢去咗一間，當時都冇乜人識嘅公司，叫做Beyond Meat
30. 彩蛋2: 其實有唔少人知，麥當勞表面係賣包，實際上好大程度上係一間地公司。明報之前都做過個報導，唔止香港係咁。吾友高天佑亦寫過，麥當勞其實係間科技公司。係咁多年都係賣包，但都有好多學問嘅。識睇英文可以睇埋彭博篇文，但too long，我都didn’t read 晒。麥當勞可以減到咁多成本，唔止係靠炒人或者減份量咯。
31. 彩蛋3: 其實麥當勞都有customer loyalty。呢位仁兄食咗三萬個Big Mac，Juno 話齋，每個人都會成名十五分鐘。食足四十六年。第一個同第三萬個，同一間。生日食，聖誕食，結婚都食。唯獨係佢老母過身時，遺願叫佢唔好再食，佢停咗幾日。
32. 最後送畀大家，電影中Ray Kroc嘅名句（其實係睇人地嘅書），嗒真啲，以前我都唔信，好似你咁。而家越嚟越信呢句：
Nothing in this world can take the place of persistence. Talent will not; nothing is more common than unsuccessful men with talent. Genius will not; unrewarded genius is almost a proverb. Education will not; the world is full of educated derelicts. Persistence and determination alone are omnipotent.
Facebook 專頁有更多短文: https://www.facebook.com/ivanliresearch
