最愛演唱會之上一個十年（3/3）: 絶色哥基
Facebook 專頁有更多短文: https://www.facebook.com/ivanliresearch
上回講關淑怡有啲趕客。其實唔係想講關淑怡，係想講我自己。正如頭兩篇一大抽嘢都唔係講容祖兒，係講我自己。
關淑怡，對我嚟講，好似係天香樓。呀，其實咁太侮辱天香樓了。應該係等於檀島。你懂的，有招牌，食老本，有忠心粉絲（如我）。但而家真係好撚難食。真係念在舊情先唔鬧。去到後期（即係近幾年）嘅演唱會，我係媽媽聲的。真係念在舊情咋。雖然佢在馬交唱《地盡頭》時我依然好感動。留意嗰種好似完全冇氣嘅唱法，好有味道的，而佢去到最後係用返「正常」唱腔（哲學問題：何謂正常？）。我是鐵粉。
我理解，而家我嘅文章讀者，其實好多都唔係睇咗我啲文好耐 — 可能睇耐啲你就會掟嘢。因為其實近兩三年，真係都不少一啲我嘅鐵粉 — 或者至少係老粉，嚟投訴我，喂，你老味你忘掉初心啦。講緊睇咗我啲文五年甚至十五年嗰啲（少年你太年輕了，我寫咗好耐文）。我相信佢地係真心嘅，覺得我變咗，覺得我唔再係以前嘅我，唔想睇住呀偶像變成咁。仆街，我老婆都未咁講。
對此，我係處之泰然嘅，你亦可以理解做「態度依舊」。我當然話自己冇變過 — 但正如飲醉嘅人話自己冇飲醉。亦有旁人話我冇乜點變過，但正如醉酒佬朋友都可能會話佢冇醉。其實就係冇結論。我有冇變到？總會有。十年，廿年喎，你覺得會一樣？校花都變成同個仔講真真禾特（drink drink water丫）食精油嘅港媽啦。校草都變返大陸叫雞嘅大肚腩黑警啦。我有變，讀者自己亦都有變，甚至個世界都變緊。
而如果真係覺得呀偶像真係慘不忍睹嘅，咪再忍下，好似我去睇關淑怡咁。一場老粉嘛。
咁然後，咪可能總有一下，你覺得忍無可忍，咪以後唔再做粉絲咯。好似我咁，卒之有一次忍無可忍，決定唔再睇佢演唱會。唔會因愛成恨，唔會整爛啲CD（聽聞有幾隻幾值錢），但我已經唔會再去睇關淑怡演唱會。核爆都唔割席？柒爆梗係要割席啦。
你覺得王晶變咗嘅，咪撚睇。你覺得游清源膠咗嘅，咪撚睇。你覺得關淑怡回塘嘅，咪撚睇。有幾難明呢，其實？你會唔會寫信去屌王晶叫佢唔好投共，會唔會打去叫游清源要變返葉孤城（嗰個年代嘅游清源影響我寫文好多），會唔會叫關淑怡：仆街，專業少少啦，回水呀，畀幾舊水入場架。
吾友廖博士話齋，呢個世界上，居然仲有人相信係有得回水的。真可愛。
其實我對好多嘢都係咁。忍到咪忍，忍唔到咪行開以後唔幫襯。有幾難？最緊要有選擇嘛。 — 我對餐廳，對歌手，對女，對朋友，對生命（自己的），對香港，都係咁。
就係咁，某年關淑怡演唱會我真係忍無可忍。自此唔撚睇。就係咁簡單。而唔係我去佢IG或微博 屌一大輪 嘩我睇咗你幾多年呀 你以前唔係咁架 可唔可以畀返《失戀演奏家》（拿，鐵粉呀，我覺得係佢最好嘅蹬）嗰個關淑怡我呀，或者係《當世界無玫瑰》嗰個關淑怡（拿，鐵粉呀，好歌一首，當年我甚至在電話唱過畀女聽）我。忍到，咪忍。忍唔到，咪走。愛人如是，餐廳如是，工作如是。但最緊要有得揀
以上種種，其實係舊友KKK（唔知佢有冇機會睇到）講嘅，回不去了。真的，我們都回不去了。倒唔止係英唔英殖咁簡單。在呢度好似唔係咁多寫自己 — 同其他作者比可能算多，但以我個人標準嚟講唔算多。而我好似講過，我寫咁多咩金融呀足球呀電影呀，全部係引你入嚟睇我呢啲文嘅局。否則邊個有興趣聽講故事？
容祖兒，同埋關淑怡，除咗有胸冇胸嘅分別外（初出道時嘅關淑怡好多人J嘅），對我嚟講仲有一個好大嘅分野：關淑怡，或者譚詠麟張學友Beyond呢啲，係或多或少受我老豆影響嘅。但去到容祖兒，就係我自己選擇嘅。唔好睇少呢樣嘢，將來我寫嘅文都會經常重覆呢個母題。
我老豆健在，我同佢關係唔算好亦唔算太差（以前我以為算好差，後來聽過更多比悲傷更悲傷嘅故事，頓時覺得自己冇乜咁不幸）。但佢在我心目中係既敬（其實冇乜）且畏，或者話我當佢係男神咁佩服佢，當佢係品味男咁跟佢學嘢，多過當佢係老豆咁尊敬佢（其實佢聽聞贍養費都冇畀過，咁做過乜我應該尊敬佢？除咗冇隨手沖咗我出藍巴勒海峽之外）。
往後仲會講更多，我點走出佢嘅陰影，甚至覺得自己超越咗佢 — 例如我在九龍站Ritz Carlton（少年唔知以前在港島呢？）爆房嗰陣。我真係開首李克勤嘅《命運符號》，振臂（痴線，隻手好唔得閒啦）唱返句： 那天我會 含淚說聲 我做到。不如有機會又講下呢個故事。
睇我寫自己嘅文，明顯睇到，我都係懷念過去嘅日子。我未致於活在過去，因為今日我都未算好失敗。有份工有老婆有樓有朋友有讀者，算係咁啦。但不改我不停咁想當年，聽當年嘅歌。可能返唔到去嘅嘢先係最好。
但，始終我係個悲觀嘅樂觀者，好友底，睇我寫股票就知（所以唔好以為睇股票文睇唔到一個人嘅性格）。過去係好，但總要面對現在。感下恩。而其實可以一個香港歌手聽足廿年，鍾意足二十年，係一種福氣。唔只係你堅持，仲要佢都配合。
同你第一下諗嘅唔同。男女情愛，要鍾意一個人廿年，其實唔係好難 — 「因為你可以同時鍾意第二三四五六個」。特別係，得不到嘅單戀暗戀，佢結咗婚你都可以晚晚J佢。
但其實，要鍾意一個香港歌手廿年，唔係咁易的。唔係講自己幾忠貞或者佢點好。而係，你諗下，過去廿年發生咗幾咁多事。 置地記者 話頭，佢鍾意嘅楊千嬅死咗好耐。或者係楊千嬅變咗，或者係置記變咗，或者個社會變咗令佢唔再聽啲慘情K歌。
而容祖兒當然變咗，樣都唔同晒（！）啦，家下佢係身家億億聲（定bil bil 聲）嘅天后，係可以出埋錢畀條仔坐商務嘅天后（其實唔難，佢唔會覺得抵唔抵）。當然唔係當年唱《第一次我想醉》（拿，鐵粉呀）嘅大牙肉醜小鴨。你話佢冇變過，咪玩啦，我畀幾億你你話我知你唔會變？You 北京 kidding me．
亦都得罪講句，其實一般廿年前紅嘅歌手，搵到盤滿砵滿啦。廿年keep住活躍嘅，就唔係好多。女歌手尤其難，因為會嫁人生仔上岸。王菲都要在四合院倒痰罐啦
話時話，原來係曼德拉效應！根本就唔係王菲倒痰罐。無論如何，我嗰時年輕，而家先知道呢張相應該拎普立茲獎。呢啲就係愛情啦。
正如黃子華話齋：你有冇試過，當你既情人沖涼嗰陣，喺同一時間，同一個地點，你喺旁邊大便！ 如果你未試過，你未試過真正嘅愛情！
我當年仲好細個（初中？高中？），覺得好變態又核突。但到我廿幾三十後，發現呢句真係好中！你唔信？你就真係未試過真正嘅愛情呀。
所以，容祖兒投共又好睇文匯大公又好（可能一路都係呢？），唔關我事。我入場聽歌，唔係建設社會。良心就要聽周柏豪嘅，咁我寧願冇良心（而我睇嗰場容祖兒就有周柏豪）。你諗下關淑怡事隔廿年走樣幾多（唔止講外型，講唱歌），就知道，有個歌手聽足廿年，都係值得開心嘅。
正如，你問侯我全家還問侯我全家，但廿年嚟一路畀你問侯而又仲活躍嘅作者，其實有幾多個？你可以鬧足我咁多年，對你對我都係福氣嚟的。正所謂your love make me strong your hate makes me unstoppable
世界變成點，又如何？除咗上次《吳清源》篇文講嘅外。屈原個朋友話頭，唔好唔化啦。人人飲醉嘅，你咪自己隊冧埋自己，清醒好辛苦的。唔想咁嘅，亦冇所謂，河水清咪洗包皮，河水污糟咪洗腳皮。
希望下次唔寫自己嘢。應該真係唔會，至少隔多篇先。
Facebook 專頁有更多短文: https://www.facebook.com/ivanliresearch
