長崎 係真係有長崎蛋糕的
Facebook 專頁有更多無聊短文: https://www.facebook.com/ivanliresearch/
長崎，係真係有長崎蛋糕嘅。亦都唔係昆遊客先後來發揚光大嘅東西，就以我幫襯嘅呢間松翁軒為例，天和元年創業，唔Google都真係唔知係邊個年代（平成昭和大正明治慶應元治，再對上就唔記得了）。嘩，原來係1681年
長崎嘅歷史不在呢度多講，但長崎除咗良美以外，就以三樣嘢出名：原子彈，天主教徒，同埋長崎蛋糕。後兩樣都係同長崎好早對外開放，接觸西洋人有關（第一樣都可能間接有關）。夜景就算數啦，你係香港人就好難覺得長崎夜景有幾靚。
咁，長崎係真係有長崎蛋糕的。儘管當地人就唔係叫長崎蛋糕，甚至日本人都好長時間有唔同嘅叫法，去到而家就全部叫カステラ。用得片假名就估到係來路嘢了，Castella 是也。
Castella就應該係葡萄牙傳教士傳入，就係嚟自Castella王國的蛋糕。睇波嘅可能都知皇家馬德里預備組／B隊 Real Madrid Castilla，亦係呢個字。Castella係現今西班牙嘅一個地區，咁葡萄牙西班牙都唔好分咁細啦
但當然，你在葡萄牙或者西班牙都唔會搵到長崎蛋糕（反而會搵到萄撻同埋西班牙海鮮飯）。聞說因為當時日本根本冇西洋蛋糕嘅焗爐之類，所以用啲唔同嘅方法整出一舊咁的東西。
咁「蜂蜜蛋糕」又係乜東東？簡單嚟講，「蜂蜜蛋糕」就唔係「長崎蛋糕」。長崎蛋糕係唔加蜂蜜嘅，甚至唔使加「正宗」兩個字咁多餘，根本日本嘅「長崎蛋糕」就唔會加蜂蜜。係老翻上再老翻，去到第度（主要係台灣），先會加蜂蜜，或者將「蜂蜜蛋糕」當係「長崎蛋糕」。
長崎蛋糕，係一種十分簡單嘅蛋糕，原料三種，雞蛋，麵粉，糖。但日本人就係好嘢，三種咁簡單嘅材料都畀佢不停改良，變成今日嘅名物「長崎蛋糕」。
另外，要驗明正身的話，可以執著啲。就正如對於拉麵塔利班嚟講，拉麵嘅重點唔係拉麵而係杯冰水，所以對於長崎蛋糕塔利班嚟講，長崎蛋糕最緊要唔係蛋又唔係麵粉，而係糖！望下個底就知。
我唔敢講個底冇一粒粒糖嘅就唔正宗（雖然日本啲拉麵舖又真係十間有十間都有冰水），但，至少四大長崎蛋糕我食過兩間，兩間都係有的，其他等你去慢慢食。好肥架下。
說回呢四大名家，其實都係唔知咩人講起。但講最出名一定係你都可能聽過嘅「文明堂」，亦係我上一次去長崎食嘅東西。
今次呢，有幸早兩年認識咗個長崎女仔（駐香港的，普通話好過我，不過其實唔難），佢極力推薦「松翁軒」，我就去買了。事後諗返其實又唔好太迷信啲咩「日本人都推介」「日本人都排隊」甚至「我老公係日本人佢都話日文點點點講」。仆街，你係個遊客，好可能會見到香港人同你推介喜茶或者澳牛，然後見到耶林閣要排隊，「拿，香港人都食呢啲呀，一定好正宗」。而無數咁多香港人啲中文水平都極低啦，你憑乜覺得「我老公係英國人佢話英文唔會點點點講」係有代表性呢？
講返，今次食嘅就係呢舊「五三燒」，被譽為長崎蛋糕中嘅極品，translation: 最貴嗰種。五三，就係蛋黃同蛋白嘅比例係五比三。平時係幾多？一半半掛。總之話係五三燒就比普通多蛋黃，少蛋白，更加邪惡。
（五比三呢個係我見人講嘅，但官網冇提呢樣，多蛋黃少蛋白係真嘅，但名字由來呢段日文唔識解，用埋Google Translate 都投降：江戸時代、5つの味(全ての味)を凌駕するほど美味という「五味(ごみ)かすてら」の名で生まれたより贅沢なカステラは、明治になって「五三（ごさん）焼カステラ」と呼ばれるようになりました。）
又，呢個「松翁軒」仲有另一名物，應該係佢地發明，就係朱古力長崎蛋糕。聽落好似唔係好西飛利，但明治年代佢地已經賣。仲要唔係可可粉，係落真朱古力塊。買咗未食，搵日再寫。
咁「五三燒」好唔好食？梗係好食啦。香港快運開直航長崎啦（真係唔係廣告），我坐咗史上第二班，你都可以試下。當然誓死唔幫襯大陸公司嘅大可以坐因航去福崗再坐JR，兩個半鐘之嘛，唔delay 的話。JR都會 delay？梗係會，我上次就坐咗五個鐘。
Facebook 專頁有更多無聊短文: https://www.facebook.com/ivanliresearch/
