LikeCoin 移動龍門
寫呢篇文嘅時候,心情仲有啲忿忿不平;如果我未能完全整理好思緒的話,請見諒。
喺兩年前,我曾經寫過一篇有關 Likecoin 嘅使用後感:
儘管喺嗰一刻,我對 LikeCoin 作為創作人賺取讀者嘅讚賞轉化為金錢呢個概念仍然有啲疑惑、覺得有啲唔明朗嘅前境因素(例如幣值過低、交易麻煩等等),但亦冇過份 critic 佢哋;因為我覺得,時間可以係佢哋改善嘅空間 — 大家都係生意人,理應明白對方磨合一個概念嘅難處。
作為第一批課金支持 LikeCoin 發展嘅人,喺三年過後嘅呢一刻,我開始懷疑我當日嘅決定係咪錯誤。
或者,我先簡單咁講吓喺呢三年(2019–2022)嘅日子裏面,LikeCoin 做咗啲乜嘢磨合工作:
- 轉鏈:轉咗兩次— 第一次轉,係因為 ride on 以太坊(Ethereum)嘅鏈 transfer 手續費太貴,我完全同意。第二次轉,係加入 Cosmos Ecosystem,講真我求之不得 — trade LikeCoin 係地球上最麻撚煩嘅動作之一,佢哋入咗 Cosmos 鏈,我可以 IBC transfer,又可以喺 Osmosis 將 LikeCoin 即兌 Atom 或者 Osmos 呢兩隻我持有一定數量嘅 crypto。我作為 Atom 大好友,覺得除笨有精,何樂而不為?
- ISCN:即係 International Standard Content Number,將你嘅任何作品上鏈,同 ISBN 同理,不過係上鏈唔係登記咁解。其實都冇壞,反正呢個年代,任何人都可以將自己啲幼稚園作品擺上去 NFT 賺返筆,我唔介意有人俾條鏈我將自己啲小說擺上鏈;
- 以 DAO、DeFi、Web3 為理由(即係咩理由?唔知,但好處係絕大部分人都唔知,所以可以任吹,同幾年前吹 big data 一樣),將 LikeCoin 由每月付款加入讚賞公民,變成要委託一定數量 LikeCoin 俾 validator、用利息繳付㩒 like 所得嘅 LikeCoin。