呢個系列嘅文章，如果喺十年前，我諗你就算困我喺個籠度三個月，我都未必寫得出。唔係冇靈感，而係冇體會。正如我從未試過經痛，你叫我點寫有關經痛嘅文章呢？
同好多人一樣，我後生啲嗰陣（個「啲」字好有意味，即係話我而家都唔係好老，但嗰陣仲後生啲；中年危機喺孔雀開屏之前嘅tingling phase），係非常活躍嘅人，好喜歡運動，除咗打波，一星期仲會做四五日Gym。喺韓國搵食嗰陣（即係《寫字》之前嘅兩三年日子），我每日都會同我嘅美軍鄰居們一齊跑南山（冇錯，就係有座塔嗰個南山，當年我住係山腳嘅美軍基地附近）；因為愛運動，所以病痛亦少，好幾年都唔需要睇一次醫生。
亦都係因為咁，所以亦都唔係好注重健康；煙、酒、劣食，基本上都不離口。冇嘢㗎，恃住自己老虎都打死幾隻，拘拘幾支煙幾杯Johnny Walker點整得死我。事實上亦都係咁，咁多年一直相安無事。
直到好多年後嘅一個早上，我起身返工，落地之際，突然發覺隻左腳好痛。「冇理由吖，我明明都冇扭親，點解會痛呢？唔通瞓覺嗰陣扭親？」我同我老婆都係咁諗。
我仲以為係打籃球傷得多嘅後遺症，但之後睇咗好耐跌打都好唔返晒。於是我返養和睇醫生。題外話：我喺香港住嘅日子，有乜頭暈身慶我都會返養和睇，因為我喺養和出世，我信奉原廠保養，儘管冇免費保養。
結果原廠話我除咗血壓有啲高（140/90；其實都仲係邊緣高血壓）之外，冇乜特別，開咗啲血壓丸俾我就打發我走。而我隻腳又慢慢好返行得走得，所以不了了之。
然後就梗係我繼續我嘅忙碌啦，香港地得閒死唔得閒病，病嘅折墮成本高好多！
然後嚟咗德國。
然後由原本日日都好很多嘢做，變咗日日除咗返學學德文之外都冇乜嘢做。個人好似個吹得好漲嘅汽球俾人放晒啲氣咁，連啲病都放埋出嚟。
最先係隻腳，喺某個晚上同朋友嚟個social beer之後，第二朝起身，隻腳腫到豬蹄咁，近腳眼嘅位置，又紅又腫，掂吓都唔得，行就更加唔使諗。
我又唔係董建華，點解無啦啦隻腳會咁Q痛？
痛都唔緊要，仲要三個星期都唔消腫！又冇跌打醫生，點算？
結果去咗睇普通科。醫生喺一輪驗血驗尿之後，正式宣佈，我患上「高尿酸血症」，嗰啲腳痛，學名叫「痛風」（當然，醫生係講帶有德文口音嘅英文）。
我發誓，喺嗰日之前，我連痛風係乜都未聽過。中風我知，馬上風我都知，點會無啦啦整個痛風出嚟㗎？Gout？你講乜gout呀？
簡單嚟講，就係我嘅幾十年暴飲暴食終於有回報，我血液裡面嘅尿酸已經高到身體冇辦法自然排出，於是積聚體內，慢慢喺啲關節度變成結晶，最終令關節發炎，又紅又腫。
醫生話，痛風冇咩大不了，好多步入中年嘅肥佬（屌你……）都會有。只要服用別嘌醇（Allopurinol）同飲多啲水，等尿酸排出就會冇事。別嘌醇係好安全嘅藥，冇乜副作用，就算長期服用對身體唔會有乜壞影響。
先係血壓丸，然後別嘌醇，我開始發覺，原來我已經到咗一個開始有長期藥物跟身嘅年紀。
咪住先，我當時先得卅五六咋喎屌你！點解搞到好似五十五六咁嘅體魄呀！我開始思索，我究竟做錯啲乜？諗一諗先發覺，我自從返香港之後，凈係掛住做（仲讀多咗個law degree嘅），原來已經差不多有十年冇好好運動過（床上運動另計）。
十年冇郁過部機器，結果係機器生銹。還好發現得早，而家補飛都為時未晚。
我都以為係；起碼我當時真係咁諗。
（待續）
